Yezu lo ye kerecɛn kafo Kuntigi ye (Efɛzikaw 5:23). Bi, k’a to sankolo la, a b’a ka kalandenw ɲɛminɛna dugukolo kan “jɔncɛ kantigiman hakiliman” sababu fɛ. Bibulu b’a fɔ ko: “Jɔncɛ kantigiman hakiliman min Matigi y’a bila a ka baaradenw kun na walisa k’u ka dumuni di u ma a wagati la, o ye jɔn lo ye?” (Matiyo 24:45, NW). Yezu yɛrɛ lo y’o “jɔncɛ” sigi o baara la. O la, kuntigiya dɔ dira a ma. O n’a ta bɛɛ, a ye Krista ka jɔɔn ye ani a ka baara ye ka Krista balimaw mako ɲɛ. O “jɔncɛ” ye jɔn lo ye, ani a be mun lo kɛ an ye?

1. “Jɔncɛ kantigiman hakiliman” ye jɔn lo ye?

Kabi sanga ni wagati bɛɛ, Jehova be tɛmɛ cɛɛ dɔ fɛ, wala jɛnkuludennin dɔ fɛ k’a sagokɛlaw ɲɛminɛ (Malasi 2:7; Eburuw 1:1). Yezu sanin kɔ, a ka cidenw ani Zeruzalɛmu ka diinan mɔgɔkɔrɔw lo tun be kafo ɲɛminɛna (Kɛwaliw 15:2). Bi fana, diinan mɔgɔkɔrɔw jɛnkuludennin dɔ lo be kafo ɲɛminɛna. O jɛnkuludennin be weele ko Jehova Seerew ka Koow Ɲɛnabɔla Jɛnkulu. A be dumuni di an ma Alako ta fan fɛ ani a be waajuli baara ɲɛminɛ. O jɛnkulu lo ye “jɔncɛ kantigiman hakiliman” ye, Yezu ye min “bila a ka baaradenw kun na.” (Matiyo 24:45a). Koow Ɲɛnabɔla Jɛnkulu mɔgɔw bɛɛ ye kerecɛn mɔlenw ye. U jigi b’a la ko u sanin kɔ, u bena taga fara Krista kan sankolo Masaya la.

2. Jɔncɛ kantigiman hakiliman be dumuni min di Alako ta fan fɛ, o ye mun lo ye?

Yezu y’a fɔ ko jɔncɛ kantigiman tun bena “dumuni di [a kerecɛnɲɔgɔnw] ma a wagati la.” (Matiyo 24:45b). An be dumuni min dumu, o b’an dɛmɛ ka fanga sɔrɔ ani ka to kɛnɛya la. O cogo kelen na, an be dumuni min sɔrɔ Alako ta fan fɛ, o b’an dɛmɛ ka kantigiya kɛ Jehova ye. Yezu ye baara min kalifa an ma, o dumuni b’an dɛmɛ fana k’o baara kɛ (1 Timote 4:6). An b’o dumuni sɔrɔ lajɛnw na, lajɛnbaw la, an ka gafew n’an ka videwow kɔnɔ. U bɛɛ b’an dɛmɛ k’a faamu Ala sagonata ye min ye. Teriya min be an ni Ala cɛ, u b’an dɛmɛ fana k’o barika bonya.

 A ƝINI KA DƆ LƆN TUGUN

3. Jehova sagokɛlaw: u be koow kɛ cogo labɛnnin na

Yezu be Koow Ɲɛnabɔla Jɛnkulu ɲɛminɛ. Ani, a b’a dɛmɛ ka Jehova Seerew ka baaraw labɛn. Yezu tun ye kerecɛn fɔlɔw ɲɛminɛ o cogo kelen lo la. A’ ye VIDEWO filɛ.

1 Korɛntikaw 14:33, 40 kalan. O kɔ, a’ ye ɲiningali nin kɛ ani ka baro kɛ o kan:

• O vɛrisew b’a yira cogo di ko Jehova b’a fɛ a Seerew ka koow kɛ cogo labɛnnin na?

4. Jɔncɛ kantigiman b’an ka waajuli baara koo labɛn

Waajuli baara tun ye kerecɛn fɔlɔw ɲɛnako fɔlɔ ye. Kɛwaliw 8:14, 25 kalan. O kɔ, a’ ye ɲiningali nunu kɛ ani ka baro kɛ u kan:

• Kerecɛn fɔlɔw cɛma, jɔn lo tun be waajuli baara ɲɛminɛ?

• Ciden tɔɔw ye cikan minw di, Piyɛri ni Zan y’u ta cogo di?

Koow Ɲɛnabɔla Jɛnkulu be baara minw labɛn, waajuli baara lo kɔrɔtanin lo ka tɛmɛ u bɛɛ kan. A’ ye VIDEWO filɛ.

 Yezu y’a fɔ ko waajuli baara kɔrɔtanin lo kosɔbɛ. Mariki 13:10 kalan. O kɔ, a’ ye ɲiningali nunu kɛ ani ka baro kɛ u kan:

• Mun na waajuli baara kɔrɔtanin lo ten Koow Ɲɛnabɔla Jɛnkulu fɛ?

• Mun na “jɔncɛ kantigiman hakiliman” ka ɲi k’o baara labɛn duniɲa kuru bɛɛ la?

5. Jɔncɛ kantigiman be cikanw di an ma

Koow Ɲɛnabɔla Jɛnkulu be cikanw di kerecɛnw ma duniɲa kuru bɛɛ kɔnɔ. A b’a ka desizɔnw ta cogo di? An k’a filɛ Koow Ɲɛnabɔla Jɛnkulu tun b’o kɛ cogo min na kerecɛn fɔlɔw ka wagati la. Kɛwaliw 15:1, 2 kalan. O kɔ, a’ ye ɲiningali nunu kɛ ani ka baro kɛ u kan:

• Koo jumanw lo tun kɛra bɛnbaliya sababu ye kerecɛn fɔlɔw cɛ?

• Pol, Barnabasi, ani balima wɛrɛw tagara jɔn lo ye walisa k’o koo ɲɛnabɔ?

Kɛwaliw 15:12-18, 23-29 kalan. O kɔ, a’ ye ɲiningali nin kɛ ani ka baro kɛ o kan:

• Koow Ɲɛnabɔla Jɛnkulu ye mun lo kɛ walisa Ala k’u dɛmɛ ka desizɔn ɲuman ta?—Vɛrise 12, 15, ani 28 lajɛ.

Kɛwaliw 15:30, 31 ani 16:4, 5 kalan. O kɔ, a’ ye ɲiningali nunu kɛ ani ka baro kɛ u kan:

• Koow Ɲɛnabɔla Jɛnkulu ye cikan minw di, kerecɛn fɔlɔw y’u ta cogo di?

• Jehova y’u duga cogo di u ka kanminɛli kosɔn?

2 Timote 3:16 ani Zaki 1:5 kalan. O kɔ, a’ ye ɲiningali nin kɛ ani ka baro kɛ o kan:

• Bi, ni Koow Ɲɛnabɔla Jɛnkulu b’a fɛ ka desizɔn dɔ ta, a be basigi mun lo kan?

 MIIRIYA JƆNJƆN

Koow Ɲɛnabɔla Jɛnkulu lo ye “jɔncɛ kantigiman hakiliman” ye, Krista ye min sigi. Duniɲa kuru bɛɛ la, ale lo be kerecɛnw ɲɛminɛ ani ka dumuni di u ma Alako ta fan fɛ.

I ye mun lo faamu?

• Jɔn lo ye “jɔncɛ kantigiman hakiliman” sigi a ka baara la?

• Koow Ɲɛnabɔla Jɛnkulu be mun lo kɛ an ye?

• I lanin b’a la ko Koow Ɲɛnabɔla Jɛnkulu lo ye “jɔncɛ kantigiman hakiliman” ye wa?