YIRI jamanjan nunu filɛ, ani filɛru ɲumanw ni kulu jamanjanw fana. Yɔrɔ nin cɛ ka ɲi dɛ, tiɲɛn tɛ? Kongosogo nin filɛ a be dumuni kɛra cɛdennin bolo kɔnɔ. Jaraw lanin filɛ, ani olu kɔfɛ soow be biin ɲimina. A tɛna diya i ye ka ɲɛnamaya kɛ yɔrɔ cɛɲumanba nin ɲɔgɔn kɔnɔ wa?

Ala b’a fɛ i ka ɲɛnamaya kɛ kudayi alijɛnɛ kɔnɔ dugukolo kan. Dimi ni tɔɔrɔ minw be mɔgɔw kan bi a t’a fɛ u si ka kɛ i la. Mɔgɔ minw bena sigi alijɛnɛ kɔnɔ, Bibulu ka layidu nin ɲɛsinna u ma ko: ‘Ala bena to u cɛma. Mɔgɔ tɛna sa, mɔgɔ tɛna kasi, mɔgɔ tɛna tɔɔrɔ tugun. Koo kɔrɔw bɛɛ tununa bugubugu.’

O yɛlɛmani kabakoman bena kɛ Yezu sababu lo fɛ. A bena o kɛ tuma juman? A bena o kɛ juguya ni mɔgɔ juguw bɛɛ bɔnin kɔ dugukolo kan. Kana ɲinɛ ko tuma min na Yezu tun be dugukolo kan, a ye banabagatɔ sifaw bɛɛ kɛnɛya ani ka suuw yɛrɛ lakunu. A y’o kɛ k’a yira a bena min kɛ dugukolo kuru bɛɛ kan tuma min na a bena kɛ Ala ka Masaya kuntigi ye.

Miiri k’a filɛ ɲɛnamaya bena diya cogo min na alijɛnɛ kura kɔnɔ dugukolo kan! Yezu ye mɔgɔ minw sugandi, ale ni olu bena kuntigiya kɛ k’u to sankolo la. O kuntigiw bena u janto mɔgɔw bɛɛ la dugukolo kan walisa u ka to hɛɛrɛ la. Sisan, an k’a filɛ an ka kan ka min kɛ walisa Ala ka ɲɛnamaya banbali di an ma a ka alijɛnɛ kura kɔnɔ.