FILISIKAW nana Israɛl kɛlɛyɔrɔ tugun. Dawuda kɔrɔcɛ saba kɛra Sayuli ka kɛlɛdenw ye sisan. O kama, loon dɔ Zese y’a fɔ Dawuda ye ko: ‘Suman yirannin ni burukun dɔw ta ka taga o di i kɔrɔw ma. I k’a filɛ n’u ka kɛnɛ.’

Dawuda sera yen tuma min na, a bolila ka taga kɛlɛyɔrɔ la k’a kɔrɔw filɛ. Filisitika cɛɛ jamanjanba Goliyati bɔra ka to ka Israɛldenw nɛni. A tun b’o kɛ loon o loon sɔgɔma ani wulafɛ kabi tile 40. A tun be kule ko: ‘Aw ye mɔgɔ kelen bɔ aw cɛma a ka na ne fɛ yan n b’a kɛlɛ. N’a sera ka ne faga, an bena kɛ aw ka jɔɔnw ye. Nka, ni ne sera a kɔrɔ k’a faga, aw bena kɛ an ka jɔɔnw ye. Aw ka mɔgɔ kelen di ne ma an be kɛlɛ kɛ.’

Dawuda ye kɛlɛden dɔw ɲininga ko: ‘Mɔgɔ min sera ka Filisitika nin faga ka maloya bɔ Israɛldenw kan, o bena mun lo di o tigi ma?’

Kɛlɛden dɔ y’a jaabi ko: ‘Sayuli bena nafolo caaman di o tigi ma ani a bena a denmuso fana di a ma.’

Nka, Israɛldenw bɛɛ tun be siran Goliyati ɲɛ sabu a tun ka jan kojugu. A janya tun be se mɛtɛrɛ saba ɲɔgɔn ma. Kɛlɛden wɛrɛ tun be tagama a ɲɛfɛ n’a ka nɛgɛkunbɛnna ye.

Kɛlɛden dɔw tagara a fɔ masacɛ Sayuli ye ko Dawuda b’a fɛ ka Goliyati kɛlɛ. Nka, Sayuli y’a fɔ Dawuda ye ko: ‘I tɛ se ka Filisitika nin kɛlɛ, bari i ye denmisɛn ye, cɛɛ nin be kɛlɛkɛ la kabini a kanbele tuma.’ Dawuda y’a jaabi ko: ‘Urusi wara ni jara tun nana ne facɛ ka sagaw minɛ, ne ye u faga. N bena Filisitika nin faga o cogo kelen na. Jehova bena ne dɛmɛ.’ O la, Sayuli y’a fɔ a ye ko: ‘Taga, Jehova ka kɛ n’i ye.’

Dawuda tagara bɛrɛ ɲuman duuru tɔmɔ jida la k’u don a ka bɔrɔ dennin kɔnɔ. O kɔ, a tagara Goliyati fan fɛ n’a ka bɛrɛbonna ye a bolo. Goliyati ye Dawuda ye tuma min na, a m’a jati foyi ye. A tun b’a miiri ko Dawuda fagako tɛna gwɛlɛya ale ma fewu.

Goliyati y’a fɔ ko: “Na yan, ne b’i faga k’i suu fili kɔnɔw ni kongosogow ye!” Nka Dawuda y’a jaabi ko: ‘I be na ne kama ni murujan ye, ani taman ni kɛlɛkɛbere. Ne be taga i kama Jehova tɔgɔ la. Bi Jehova bena i di ne ma, n b’i faga.’

O la, Dawuda bolila ka taga Goliyati fan fɛ. A ye bɛrɛ dɔ bɔ a ka bɔrɔ dennin kɔnɔ k’a don bɛrɛbonna kɔnɔ ani ka Goliyati bon n’a fanga bɛɛ ye. Bɛrɛ sinna ka taga Goliyati teen sɔgɔ ka don, a bɔra ka ben ka sa! Filisitikaw y’a ye k’u ka kɛlɛmasa benna minkɛ, u bɛɛ bolila. Israɛldenw bolila ka tugu u kɔ ka see sɔrɔ u kan.