I B’A lɔn fɛɛn min kama cɛɛ nin b’a ka forokiya faranna wa? Jehova lo ko a k’o kɛ. Cɛɛ nin ye Ala ka kira Aya lo ye. I b’a lɔn kira ye mɔgɔ min ye wa? Mɔgɔ dɔ lo, Ala be koo nataw fɔ min ye.

Jaa nin kan, Aya be kumana ni Zerobowamu lo ye. Solomani tun ye Zerobowamu sigi a ka bonlɔbaara dɔw kun na. I ko i ɲɛɛ b’a la, tuma min na Aya ye Zerobowamu kunbɛn sira kan, a ye kabako dɔ kɛ. Forokiya kura min tun b’a kaan na, a y’o bɔ ani k’a faran faran yɔrɔ 12. A y’a fo Zerobowamu ye ko: ‘E ka yɔrɔ 10 ta.’ I b’a lɔn fɛɛn min kama Aya ye forokiya tilanyɔrɔ 10 di Zerobowamu ma wa?

Aya y’a ɲɛfɔ ko Jehova bena masaya bɔsi Solomani bolo. A ko Jehova bena Israɛl siya 10 di Zerobowamu ma. O kɔrɔ ko Solomani dencɛ Orobowamu bena mara kɛ Israɛl siya fila dɔrɔn lo kun na.

Aya ye min fɔ Zerobowamu ye, Solomani y’o mɛn tuma min na, a dimina kosɔbɛ. A y’a ɲini ka Zerobowamu faga. Nka, Zerobowamu bolila ka taga Misira jamana na. Wagati dɔɔni o kɔ, Solomani sara. A ye masaya kɛ saan 40 kɔnɔ. Sisan, a dencɛ Orobowamu lo sigira masaya la. Zerobowamu tora Misira k’a mɛn ko Solomani sara, o kama a segira ka na Israɛl jamana na.

Orobowamu ma kɛ masacɛ ɲuman ye. A ye jama niin tɔɔrɔ ka tɛmɛ a faa Solomani yɛrɛ kan. Zerobowamu ni jama ɲɛmɔgɔ dɔw tagara a fɔ Orobowamu ye ko a ka jama minɛ koɲuman. Nka, Orobowamu ma mɛnni kɛ u fɛ. A yɛrɛ fariyara tugun ka tɛmɛ fɔlɔ kan. O kama, jama ye Zerobowamu sigi masaya la Israɛl siya 10 kun na, nka Bɛnzamɛn ni Zuda siya tora Orobowamu ka masaya kɔrɔ.

Zerobowamu tun t’a fɛ a ka jama ka taga Jehova bato Alabatosoba kɔnɔ Zeruzalɛmu. O kama, a ye sanu misiden fila dilan ani k’a kɛ Israɛl siya 10 ka masaya mɔgɔw k’u bato. Dɔɔni, kojugubaw ni fariyakow ye jamana fa.

Gwɛlɛyaw be yen fana Israɛl siya fila ka masaya kɔnɔ. Orobowamu kɛra masacɛ ye a yɛrɛ ma saan duuru dafa fɔlɔ, Misira masacɛ nana ka Zeruzalɛmu kɛlɛ. A ye Jehova batosoba kɔnɔ nafolo caaman cɛ ka taga n’u ye. O la, Alabatosoba ma to a lɔcogo la ka mɛn.