I B’A lɔn sungurunin be min fɔra wa? A be Jehova ka kira Elize koo lo fɔra muso nin ye ani Jehova ye Elize dɛmɛ ka kabako minw kɛ. Muso nin tɛ foyi lɔn Jehova koo la sabu a tɛ Israɛlden dɔ ye. An k’a filɛ fɔlɔ mun na sungurunin nin be muso nin ka soo kɔnɔ.

Muso nin ye Sirika lo ye. A cɛɛ Naaman lo ye Siri kɛlɛdenw kuntigi ye. Sungurunin nin ye Israɛlden ye. Sirikaw y’a minɛ ani u tagara n’a ye k’a kɛ Naaman muso ka baaraden ye.

Kuna bana tun be Naaman na. O bana be se ka mɔgɔ farisogo yɔrɔ dɔ ɲimi. O lo y’a to sungurunin nin b’a fɔra Naaman muso ye ko: ‘Ne b’a fɛ ne matigi ka taga Jehova ka kira fɛ Israɛl jamana na. A bena a kɛ a ka kuna bana ka ban.’ Kɔfɛ, muso cɛɛ ye o kuma mɛn.

Naaman tun b’a fɛ kosɔbɛ ka kɛnɛya, o kama a y’a latigɛ ko a be taga Israɛl. A sera yen tuma min na, a tagara Elize ka soo. Elize y’a ka baaraden ci k’a fɔ Naaman ye ko a ka taga ko Zurudɛn baji la siɲɛ wolonfila. O kuma ye Naaman dimi kosɔbɛ ani a y’a fɔ ko: ‘Ne ka jamana bajiw man fisa ni Israɛl bajiw bɛɛ ye wa?’ Naaman y’o kumaw fɔ ka ban tuma min na, a kɔsegira.

Nka, a ka baaraden dɔ y’a fɔ a ye ko: ‘Ni kira tun ye koo gwɛlɛ dɔ fɔ i ye, i tun tɛna o kɛ wa? Sisan, mun na i do tɛ se ka taga ko i n’a fɔ a y’a fɔ cogo min na?’ Naaman y’a ka baaraden ka kuma lamɛn ani a tagara ko siɲɛ wolonfila Zurudɛn baji la. A y’o kɛ tuma min na, a ka kuna bana banna pewu!

Naaman ninsɔndiyara kosɔbɛ. A segira ka taga Elize fɛ k’a fɔ a ye ko: “Sisan, ne y’a lɔn ko Ala wɛrɛ te yɔrɔ si dugukolo kan ni Isirayɛli ta tɛ. O la, i ka boɲafɛn nin minɛ.” Nka, Elize y’a jaabi ko: ‘Ayi, ne tɛna foyi minɛ.’ Elize y’a faamu ko a man ɲi a ka boɲafɛn minɛ Naaman fɛ sabu Jehova lo y’a ka bana kɛnɛya. Nka, Elize ka baaraden Geyazi b’a fɛ ka boɲafɛn minɛ a yɛrɛ ye.

Ayiwa, Geyazi y’o lo kɛ. Naaman taganin kɔ, Geyazi bolila ka tugu a kɔ. A y’a fɔ Naaman ye ko: ‘Elize lo ye ne ci ka na a fɔ i ye ko a teriw nana a fɛ, o kama a be boɲafɛn dɔ ɲini i fɛ k’a di u ma.’ O kuma tun ye ngalon ye. Nka, Naaman tun t’o kala ma, o kama a ye fɛɛn dɔw di Geyazi ma.

Geyazi kɔsegira soo tuma min na, Elize y’a lɔn a ye koo min kɛ. Jehova tun y’o fɔ a ye. O la, Elize y’a fɔ Geyazi ye ko: ‘Komi i ye koo jugu nin kɛ, Naaman ka kuna bana bena yɛlɛma i la.’ O yɔrɔnin bɛɛ Geyazi kɛra kunatɔ ye.

An be kalan juman sɔrɔ koo nunu bɛɛ la? A fɔlɔ, an ka kan ka to ka Jehova koo fɔ mɔgɔw ye i ko sungurunin nin y’a kɛ cogo min na. Nafa caaman be se ka sɔrɔ o la. A filanan, an man kan ka kɛ kuncɛbaw ye i ko Naaman kɔnna ka min kɛ, an ka kan ka mɛnni kɛ Ala sagokɛlaw fɛ. A sabanan, an man kan ka ngalon tigɛ i ko Geyazi y’a kɛ cogo min na. Yala an tɛ koo caaman faamu n’an be Bibulu kalan wa?