A FILƐ cɛɛ nin be fɛɛn min dogora dingɛ kɔnɔ a ka fanibugu la! Forokiya cɛɲumanba dɔ, sanukuru ani warigwɛ kuru dɔw. A y’u ta Zeriko dugu kɔnɔ. Nka, Zeriko kɔnɔfɛnw tun ka kan ka kɛ cogo di? Yala i hakili b’o la wa?

O fɛɛnw tun ka kan ka jɛni, ani sanu ni warigwɛ tun ka kan ka bila Jehova ka nafolo mara yɔrɔ la ɲɔgɔnkunbɛn fanibugu kɔnɔ. O la, mɔgɔ nunu ma kanminɛli kɛ. Fɛɛn minw ka kan ka di Ala ma, u y’o soɲɛ. Cɛɛ nin tɔgɔ ko Akan, ani a ka somɔgɔw lo be n’a ye. An k’a filɛ fɛɛn min kɛra.

O fɛɛnw soɲɛni kɔ le Zozuwe ye cɛɛ dɔw ci ka taga Ayi dugu kɛlɛ. Ayikaw sera o cɛɛw kɔrɔ kɛlɛ la. U ye dɔw faga ani tɔɔw bolila. Zozuwe dusu tiɲɛna kosɔbɛ. A y’a ɲɛɛ biri duguma ka Jehova deli ko: ‘Mun na i y’a to nin koo ye an sɔrɔ?’

Jehova y’a jaabi ko: ‘Wuli! Israɛldenw ye jurumu kɛ. Fɛɛn minw tun ka kan ka jɛni wala ka di Jehova ka nafolo mara yɔrɔ la, u y’u dɔw ta. U ye forokiya cɛɲumanba dɔ soɲɛ ani k’a dogo. Ne tɛna aw duga, fɔɔ ni aw y’o fɛɛnw n’u tabaga halaki.’ Jehova y’a fɔ ko a bena o mɔgɔ jugu nin yira Zozuwe la.

O kama, Zozuwe ye jama bɛɛ lajɛn, ani Jehova y’a yira ko o mɔgɔ jugu nin ye Akan lo ye. Akan ko: ‘Ne ye jurumu kɛ. Ne ye forokiya cɛɲumanba dɔ ye ni sanukuru ani warigwɛ kuru dɔw. U nege donna ne la kosɔbɛ, ne y’u ta. Aw bena u dogonin ye ne ka fanibugu la dingɛn dɔ kɔnɔ.’

O fɛɛnw yera tuma min na ka na di Zozuwe ma, a y’a fɔ Akan ye ko: ‘Mun na i ye nin bɔnɛ lase an ma? Sisan, Jehova bena bɔnɛ lase ele fana ma.’ O kɔ, jama bɛɛ ye kabakuruw ta ka Akan n’a somɔgɔw bon k’u faga. Yala nin tɛ a yira an na ko fɛɛn min tɛ an ta ye, an man kan k’o ta abada wa?

O kɔ, Israɛldenw segira ka taga Ayi dugu kɛlɛ. Nin seen nin na, Jehova ye a ka mɔgɔw dɛmɛ, ani u ye see sɔrɔ kɛlɛ la.