ZOZUWE filɛ. A b’a fɔra ko: “Tile, i ka lɔ!” Tile lɔra. A lɔra sankolo cɛmancɛ la ka tile kelen kuru bɛɛ kɛ. Jehova lo y’a to o kɛra! Ayiwa, an k’a filɛ fɛɛn min kama Zozuwe b’a fɛ tile ka lɔ ka to ka yeelen bɔ.

Tuma min na Kanaan jamana masacɛ jugu duuru nana ko olu be Gabawɔnkaw kɛlɛ, Gabawɔnkaw ye cɛɛ dɔ ci ka taga dɛmɛ ɲini Zozuwe fɛ. A y’a fɔ Zozuwe ye ko: ‘Na joona k’an kisi! Masacɛ minw bɛɛ be kuluyɔrɔw la, olu nana i ka baaradenw kama.’

O yɔrɔnin bɛɛ, Zozuwe n’a ka kɛlɛdenw bɛɛ wulila ka taga. U ye suu bɛɛ kɛ tagama na. U sera Gabawɔn tuma min na, masacɛ duuru nunu ka kɛlɛdenw siranna ani u y’a daminɛ ka boli. O kama, Jehova y’a kɛ sanbɛrɛbabaw bɔra sanfɛ ka to ka ben u kan. O bɛrɛw ye mɔgɔ minw faga, olu cayara ka tɛmɛ Zozuwe ka kɛlɛdenw ka mɔgɔ faganinw kan.

Zozuwe y’a ye ko tile be ɲini ka ben, dibi bena don ani masacɛ duuru nunu ka kɛlɛden caaman bena boli ka kisi. O lo kama, Zozuwe ye Jehova deli ani k’a fɔ ko: “Tile, i ka lɔ!” Tile tora ka yeelen bɔ ani Israɛldenw sera u juguw kɔrɔ.

Masacɛ jugu caaman tun be Kanaan jamana na, minw tun be Ala ka jama kɔniya. Zozuwe n’a ka kɛlɛbolow ye saan wɔɔrɔ ɲɔgɔn kɛ ka sɔrɔ ka see sɔrɔ masacɛ 31 kan. O kɔ, Israɛl siya minw tun ma yɔrɔ sɔrɔ fɔlɔ, Zozuwe ye Kanaan jamana tilantilan ka di olu ma.

Saan caaman tɛmɛna, ani a laban Zozuwe sara. A sii tun ye saan 110 ye. Ka Zozuwe n’a teriw to sii la, jama ye Jehova kaan minɛ. Nka o cɛɛ ɲumanw sannin kɔ, jama y’a daminɛ ka kojugu kɛ ani u ye bɔnɛ sɔrɔ. O kama u makoya gwɛlɛ tun be Ala ka dɛmɛ na.