MUN lo kɛra Zeriko lamini kogow be benna? A kɛra komi bɔnbuba dɔ lo benna u kan. Nka, bɔnbu tun tɛ yen o wagati la, marifaw yɛrɛ tun tɛ yen. Jehova ka kabako dɔ wɛrɛ lo! An k’a filɛ o koo kɛra cogo min na.

Jehova y’a fɔ Zozuwe ye ko: ‘Ele n’i ka kɛlɛkɛ cɛɛw, aw ka tagama ka dugu lamini. Aw ka tagama k’a lamini loon o loon siɲɛ kelen fɔɔ tile wɔɔrɔ. Aw ka taga ni layidu tagamasiɲɛ kɛsu ye. Sarakalasebaga mɔgɔ wolonfila bena tagama a ɲɛ n’u be buruw fiyɛ.’

‘Tile wolonfilanan loon, aw ka kan ka tagama ka dugu lamini siɲɛ wolonfila. O kɔ, a’ ye buru fiyɛ ka mɛɛn, ani jama bɛɛ ka kɛlɛ kulekanba ci. O yɔrɔnin bɛɛ, dugu lamini kogow bena ben!’

Jehova y’a fɔ cogo min na, Zozuwe ni jama y’a kɛ ten. U tagamatɔ, kumakan foyi tun tɛ mɛn. Buru fiyɛ kaan ani seenw mankan dɔrɔn lo tun be mɛn. Zeriko dugu kɔnɔ, i be taga a sɔrɔ mɔgɔw tun sirannin lo kosɔbɛ. I ɲɛɛ be juru wulen dulonnin na finɛtiri dɔ la wa? O ye jɔn ka finɛtiri lo ye? Ayiwa, kolajɛbaga fila tun ye min fɔ Rahab ye, a y’o kɛ. A ni a ka somɔgɔw bɛɛ be kɔnɔni kɛra a ka boon kɔnɔ.

Loon wolonfilanan na, Israɛl mɔgɔw tagamana ka dugu lamini siɲɛ wolonfila. O kɔ, u ye buru fiyɛ, kɛlɛkɛ cɛɛw kulera ani kogow benna. Zozuwe ko: ‘Aw ka dugumɔgɔw bɛɛ faga ani ka dugu jɛni. Aw k’a kɔnɔfɛnw bɛɛ jɛni. Aw kana warigwɛ, sanu, ziranɛgɛ ani nɛgɛ jɛni, aw ye u bila Jehova ka nafolo mara yɔrɔ la.’

Zozuwe y’a fɔ kolajɛbaga fila nunu ye ko: ‘Aw ye don Rahab ka boon kɔnɔ k’a minɛ ka bɔ n’a ye ani a ka somɔgɔw bɛɛ.’ Rahab n’a ka somɔgɔw kisira i ko kolajɛbagaw tun y’a fɔ a ye cogo min na.