YƆRƆ 7NAN
K’a ta Yezu lakununi ma ka taga se Pol donni ma kaso la
Tile sabanan loon Yezu sanin kɔ, a kununa. O loon na, a y’a yɛrɛ yira a ka kalandenw na siɲɛ duuru. Tile 40 kɔnɔ, a tora k’a yɛrɛ yira u la. O kɔ, k’a to a ka kalanden dɔw b’a filɛra, Yezu kɔrɔtara ka taga sankolo la. Tile tan o kɔ, ka Yezu ka kalandenw to u be kɔnɔni kɛra Zeruzalɛmu, Ala ye hakili senu jigi u kan.
O kɔ, Ala ka juguw ye cidenw minɛ k’u don kaso kɔnɔ, nka mɛlɛkɛ dɔ nana u labɔ yen. Ala ka mɔgɔw kɛlɛbagaw ye ciden Etiyɛni bon k’a faga ni kabakuruw ye. Nka, an bena a ye cogo min na Yezu ye mɔgɔ dɔ sugandi a kɛlɛbagaw cɛma k’a kɛ a ka baaraden kɛrɛnkɛrɛnnin ye. O cɛɛ kɛra ciden Pol ye. Saan saba ni tilan Yezu sanin kɔ, Ala ye ciden Piyɛri ci a ka taga Kɔrinɛyi n’a somɔgɔw waaju, olu tun tɛ Yahutuw ye.
Saan 13 ɲɔgɔn o kɔ, Pol y’a ka tagama fɔlɔ daminɛ waajuli baara la. A ka tagama filanan na, Timote tagara n’a ye. An bena a ye cogo min na Pol n’a tagamaɲɔgɔnw ye wagati diiman kɛ Ala ka baara la. O kɔ, u ye Pol don kaso kɔnɔ Ɔrɔmu. Saan fila o kɔ, u y’a labɔ. Nka o kɔ, u y’a don tugun kaso kɔnɔ ani k’a faga. YƆRƆ 7NAN nin be maana minw lakali, u kɛra saan 32 ɲɔgɔn kɔnɔ.