A FILƐ, kurun be farati la! A be karikarila ka tiɲɛ! A kɔnɔ mɔgɔw panna ka cun jii kɔnɔ. U dɔw yɛrɛ bɔra ka ban jii kɔnɔ. Minw bɔra, i ɲɛɛ be Pol la u cɛma wa? An k’a filɛ koo min y’a sɔrɔ.

I hakili b’a la ko Pol ye saan fila kɛ kaso la Sezare wa? O kɔ, u ye ale ni kasoden dɔw don kurun kɔnɔ ka Ɔrɔmu sira minɛ n’u ye. U tɛmɛtɔ Kɛrɛti guun gɛrɛfɛ, fɔɲɔba dɔ ye kurun gosi. Fɔɲɔ barika tun ka bon fɔɔ u ma se ka kurun boli tugun. Ani u tun tɛ se ka tile ye tilefɛ ani ka lolow ye sufɛ. A laban, kurun kɔnɔ mɔgɔw jigi tigɛra, u y’a miiri k’u tɛna kisi fewu.

O la, Pol wulila ka lɔ k’a fɔ ko: ‘Aw si nii tɛna to a la, nga an bena bɔnɔ kurun le la, bari Ala ka mɛlɛkɛ dɔ ye a yɛrɛ yira ne la kunu sufɛ k’a fɔ n ye ko: “I kana siran Pɔli, wajibi lo fɔɔ i ka se Ɔrɔmu masacɛ fɛ k’i ka koow ɲafɔ a ye. Ayiwa, Ala bena i taamaɲɔgɔn nunu bɛɛ kisi.” ’

Fɔɲɔba tile 14nan loon dugutilama, kurun bolilaw y’a ye ko jii tun man dun kojugu tugun. Komi u tun be siranna ko kurun kana taga kabakuru dɔw susu dibi la, u ye kurun lalɔfɛnw bila jii la. O dugusagwɛ, u ye dugukolo jalan dɔ ye. U tun b’a fɛ ka taga kurun lɔ o yɔrɔ la.

Nka, kurun tagara bari cɛncɛn dɔ la jii jukɔrɔ ani a lɔra. O la, jikuruw ye kurun gosi ani a y’a daminɛ ka karikari. Sɔrɔdasi ɲɛmɔgɔ y’a fɔ ko: ‘Minw bɛɛ be jii lɔn, olu ka kɔn ka jigi ka dugukolo sɛgɛrɛ. Tɔɔw ka la yirifɛn dɔw kan, walima kurun lɔgɔ cininw kan ka banba n’o ye ka bɔ.’ U ye o lo kɛ. O la, kurun kɔnɔ mɔgɔ 276 bɛɛ ɲuman sera kɔgɔjida la dugukolo jalan kan i ko mɛlɛkɛ tun y’a fɔ cogo min na.

U tun be guun min kan, o be weele ko Maliti. O yɔrɔ mɔgɔw y’u minɛ ka ɲɛ. Wagati ɲɛɛ fisayara tuma min na, u ye Pol don kurun wɛrɛ kɔnɔ ka taga n’a ye Ɔrɔmu.