I ƝƐƐ be kanbele min na ciden Pol gɛrɛfɛ, Timote lo. Timote n’a somɔgɔw tun siginin be Lisitire (Lisitɔrɔ) dugu la. A bamuso tɔgɔ ko Unisi ani a mamamuso tɔgɔ ko Loyisi.

Pol tagako sabanan tun lo Lisitire dugu la. A saan kelen ɲɔgɔn ye nin ye Pol ni Barinabasi nana yan a siɲɛ fɔlɔ la ka waajuli kɛ. Ani sisan, Pol segira ka na tugun n’a tericɛ Silasi ye.

I b’a lɔn Pol be min fɔra Timote ye wa? A b’a ɲiningara ko: ‘I b’a fɛ ka na fara ne ni Silasi kan wa? I be se k’an dɛmɛ ka yɔrɔjan mɔgɔw waaju.’

Timote sɔnna. A ma mɛɛn, Timote ye a somɔgɔw bila ka taga jɛn ni Pol ni Silasi ye. Sanni an ka kuma u ka tagama koo la, an k’a filɛ fɔlɔ min kɛra Pol la. A saan 17 ɲɔgɔn ye nin ye Yezu tun y’a yɛrɛ yira a la Damasi sira kan.

O wagati la, Pol tun be tagara Damasi Yezu ka kalandenw tɔɔrɔ yɔrɔ. Nka sisan, ale yɛrɛ kɛra kalanden dɔ ye! Kɔfɛ, jugu dɔw y’a ɲini ka Pol faga sabu a tun be kalan min kɛra Yezu koo la, o tun man di u ye. Nka, kalandenw y’a dɛmɛ a sera ka boli. U y’a don segi dɔ kɔnɔ ani k’a lajigi dugu kogo kɔfɛ.

O kɔ, Pol tagara waajuli kɛ Antiyɔsi. O yɔrɔ lo la u y’a daminɛ ka Yezu ka kalandenw weele ko kerecɛnw. O kɔ, Pol ni Barinabasi cira ka taga waajuli kɛ dugu jan dɔw la. U tɛmɛna dugu minw kɔnɔ, u la kelen ye Timote ka dugu Lisitire ye.

Sisan, saan kelen o kɔ, Pol ye tagamako filanan kɛ ka na Lisitire. Tuma min na Timote bɔra ka tugu Pol ni Silasi kɔ, i b’a lɔn u tagara yɔrɔ min na wa? An ka kariti lajɛ.

Fɔlɔ, u tagara Lisitire dafɛdugu dɔ la min tɔgɔ ko Ikoniyɔmu, ani o kɔ u sera Antiyɔsi dugu la. Kɔfɛ, u tagara Torowasi, Filipi, Tesaloniki ani Bere. I ɲɛɛ be Atɛni na kariti kan wa? Pol ye waajuli kɛ o dugu kɔnɔ. O kɔ, u ye waajuli kɛ saan kelen ni tilan Korɛnti dugu kɔnɔ. A laban, u ye wagati dɔɔni kɛ Efɛzi ani o kɔ u ye kurun ta ka kɔsegi Sezare ani u tagara Antiyɔsi. Pol tora yen.

O cogo la, Timote ye kilomɛtɛrɛ caaman caaman kɛ walisa ka Pol dɛmɛ ka “kibaru diman” waajuli kɛ ani ka kerecɛn kafo caaman juu sigi. N’i kɔrɔbayara, yala i bena kɛ Ala sagokɛla kantigiman ye i n’a fɔ Timote wa?