I ƝƐƐ be mɔgɔ minw na yan, Yezu ka kalandenw lo. U tora Zeruzalɛmu i ko Yezu tun y’a ɲini u fɛ cogo min na. K’u bɛɛ to kɔnɔni na ɲɔgɔn fɛ, mankanba dɔ ye boon fa. A tun be i n’a fɔ fɔɲɔba mankan. U ye nɛnkun dɔw ye i ko tasuma manaw, minw tilantilanna ka sigi kalanden bɛɛ kelen kelen kuun na. I ɲɛɛ tɛ tasuma na u kelen kelen bɛɛ kuun na wa? Nin bɛɛ kɔrɔ ye mun ye?

Kabako lo! Yezu kɔsegira sankolo la a Faa fɛ, ani a ye Ala ka hakili senu jigi a ka kalandenw kan. I b’a lɔn o hakili senu y’u lasun ka fɛɛn min kɛ wa? U bɛɛ y’a daminɛ ka kaan wɛrɛw fɔ.

Mankan min kɛra i ko fɔɲɔba, mɔgɔ caaman y’o mɛn Zeruzalɛmu kɔnɔ ani u nana a filɛ fɛɛn min kɛra. U dɔw tun bɔra jamana wɛrɛw la ka na Israɛldenw ka Pantekɔti fɛti la. O lonanw kabakoyara fɔɔ k’a dama tɛmɛ! Kalandenw tun be Ala ka kooba kɛnin minw fɔra, u bɛɛ tun b’o mɛnna u ka kaanw na.

Lonanw ko: “Mɔgɔ minw be kumana wo, u bɛɛ te Galilekaw ye wa? A do kɛra di n’an bɛɛ b’u ka kuma mɛnna an ka kaan na?”

O la, Piyɛri wulila ka kuma ta. A y’a kaan kɔrɔta ani a y’a ɲɛfɔ jama ye cogo min na u ye Yezu faga ani Jehova y’a kunu k’a bɔ saya la. Piyɛri ko: ‘Sisan, Yezu siginin be Ala kinibolo fɛ sankolo la. Ani a tun ye layidu ta hakili senu min koo la, a y’o lo jigi an kan. Aw ɲɛɛw ani aw tulow be o lo la.’

Ayiwa, o kuma mɛnnin kɔ, mɔgɔ caaman dusu tiɲɛna Yezu ka tɔɔrɔ kosɔn. U ye Piyɛri ɲininga ko: “An ka kan ka mun kɛ?” A y’u jaabi ko: ‘ A’ ye aw ka ɲɛnamaya kɛcogo yɛlɛma ani ka batize.’ O loon yɛrɛ la mɔgɔ waa saba ɲɔgɔn batizera ka kɛ Yezu ka kalandenw ye.