N’I YE mɔgɔ jamanjan dɔ ye a be nana i fan fɛ, a ka jan fɔɔ a kuun be ɲini ka se i ka boon tɔli ma, i bena mun lo miiri do? O tigi ye mɔgɔ jamanjanba ye dɛ! Wagati dɔ la, o mɔgɔ jamanjanbaw ɲɔgɔn tun be dugukolo kan yɛrɛ yɛrɛ la. Bibulu b’a yira ko u facɛw tun ye mɛlɛkɛw ye ka bɔ sankolo la. Nka, o tun be se ka kɛ cogo di?

I hakili to a la ko mɛlɛkɛ jugu Sutana jijanin tun lo ka koo ɲagaminin kɛ. A yɛrɛ y’a ɲini ka Ala ka mɛlɛkɛ dɔw lasun u ka koo jugu kɛ. Wagati dɔ la, u dɔw y’a daminɛ ka mɛnni kɛ Sutana fɛ. Ala ye baara min di u ma sankolo la, u y’o dabila. U jigira dugukolo kan ani ka adamadenw cogoya ta. I b’a lɔn fɛɛn min kama wa?

Bibulu b’a fɔ ko o Ala dencɛw ye muso cɛɲumanw ye dugukolo kan ani u tun b’a fɛ ka jɛn n’u ye. O kama, u nana dugukolo kan ani k’o musow furu. Bibulu b’a fɔ ko o tun ye kojugu ye sabu Ala ye mɛlɛkɛw dan u ka ɲɛnamaya kɛ sankolo lo la.

O mɛlɛkɛw n’u ka musow ye deen minw sɔrɔ, olu tun be dan na tɔɔw la. O wolotuma na, a tun tɛ ye k’u be dan na tɔɔw la. Nka, u tora ka bonya ani ka fangaba sɔrɔ fɔɔ u nana kɛ mɔgɔ jamanjanbaw ye.

O mɔgɔ jamanjanbaw tun ka jugu. U ka bonya n’u ka fanga kabakoman kosɔn, u tun be mɔgɔw niin tɔɔrɔ. U tun b’a fɛ bɛɛ ka kɛ mɔgɔ juguw ye i n’a fɔ olu.

Enɔki tun sara, nka cɛɛ ɲuman wɛrɛ tun be yen tugun dugukolo kan. O cɛɛ tɔgɔ tun ko Nuhun. Nuhun tun be mɛnni kɛ Ala fɛ tuma bɛɛ.

Loon dɔ, Ala y’a fɔ Nuhun ye ko wagati sera ale fɛ ka mɔgɔ juguw bɛɛ halaki. Nka, Ala ko ale bena Nuhun n’a ka denbaya ani bɛgɛnw ni kongosogo caaman kisi. An k’a filɛ Ala y’o kɛ cogo min na.