K’u to jɔnya la Babilɔni, koo caaman ye Israɛldenw ka limaniya kɔrɔbɔ. U ye Sadiraki, Mesaki ani Abɛdenego fili dingɛ tasumaman kɔnɔ, nka Ala y’u kisi. Mɛdiw ni Pɛrɛsiw nana Babilɔni kɛlɛ ka see sɔrɔ a kan. O kɔ, u ye Daniyɛli fili jaraw ka dingɛ kɔnɔ, nka Ala y’a tanga fana a kɛtɔ ka jaraw daa siri.

A laban, Pɛrɛsikaw ka masacɛ Sirusi ye Israɛldenw hɔɔrɔnya ka bɔ jɔnya la. U kɔsegira ka taga u faso la saan 70 kɛnin kɔ Babilɔni jamana na. U ye koo fɔlɔ min kɛ u kɔseginin kɔ Zeruzalɛmu, o ye ka Jehova ka batosoba lɔni daminɛ. Nka a ma mɛɛn, u juguw y’o baara lalɔ. O kama, Alabatosoba lɔni baara mɛɛnna fɔɔ saan 22 ɲɔgɔn ka sɔrɔ ka ban.

An fana bena Ɛsidirasi ka koo kalan. A nana Zeruzalɛmu ka Alabatosoba masiri. A y’a ka baara daminɛ k’a sɔrɔ Alabatosoba lɔra ka ban kabi saan 47. Saan 13 o kɔ, Neemi nana u dɛmɛ ka Zeruzalɛmu lamini kogow lɔ kokura. Maana minw be sɔrɔ nin YƆRƆ 5NAN kɔnɔ, u bɛɛ lajɛnnin kɛra saan 152 kɔnɔ.