I HAKILI be kanbele saba nunu koo la wa? Daniyɛli teri saba lo minw tun banna masacɛ ka dumuni na. Babilɔnikaw tun b’u weele ko Sadiraki, Mesaki ani Abɛdenego. Nka, u filɛ sisan. Mun na u ma sɔn ka biri jaa jamanjanba nin ɲɛɛ kɔrɔ i ko mɔgɔ tɔɔw y’a kɛ cogo min na? An k’o lajɛ.

Jehova yɛrɛ tun ye sariya minw sɛbɛ n’u be weele ko Cikan Tan, i hakili b’u la wa? U la fɔlɔ ko: “Aw kana fɛɛn wɛrɛ bato fɔɔ ne kelenpe.” Kanbele saba nunu b’o sariya lo labatora hali n’a man nɔgɔ u fɛ.

Babilɔni masacɛ Nabukodonozɔri ye jaa nin lɔ ani ka jamana faaman caaman weele u ka na a bato. A y’a fɔ jama bɛɛ ye ko: ‘ N’aw ye buru kaan mɛn, ni gɔni ani fɔliminan sifa wɛrɛw kaan mɛn dɔrɔn, aw ka biri ka sanu jaa nin bato. Ni mɔgɔ min ma biri k’a bato, o tigi bena fili dingɛ tasumaman kɔnɔ o wagati yɛrɛ la.’

Nabukodonozɔri y’a mɛn tuma min na ko Sadiraki, Mesaki ani Abɛdenego ma sɔn ka biri, a dimina kosɔbɛ. A y’a fɔ k’u ka na n’u ye ale fɛ. A y’a fɔ u ye ko n’u ye fɔlikan mɛn tugun u ka biri k’ale ka jaa bato. Nka, kanbele nunu jigi lanin be Jehova kan. U y’a fɔ masacɛ ye ko: ‘Anw be Ala min bato, ale be se k’an kisi. Hali n’a m’o kɛ fana, i k’a lɔn ko an tɛna i ka jaa sanulaman nin bato.’

Nabukodonozɔri y’o kuma mɛn tuma min na a dimina kosɔbɛ. Dingɛ tasumaman dɔ tun yɔrɔ man jan. Masacɛ ye cii di ko: ‘Aw ye tasuma nin bonya siɲɛ wolonfila ka tɛmɛ fɔlɔ kan!’ O kɔ, a y’a fɔ a ka kɛlɛden kɔgɔnin dɔw ye k’u ka Sadiraki, Mesaki ani Abɛdenego siri ani k’u fili dingɛ tasumaman nin kɔnɔ. Dingɛ nin tasuma bonyakojugu kosɔn, tamɛnɛ ye masacɛ ka kɛlɛden kɔgɔninw faga. Nka, kanbele saba minw filila o tasuma kɔnɔ, mun lo y’olu sɔrɔ do?

Masacɛ ye filɛri kɛ dingɛ kɔnɔ, ani a hakili ɲagamina. A ye ɲiningali kɛ ko: “An ma mɔgɔ saba le siri k’u fili tasuma kɔnɔ wa?”

A ka baaradenw y’a jaabi ko: “Jaati, masacɛ!”

Masacɛ ko: ‘Ne ɲɛɛ be mɔgɔ naani na, u be tagamana tasuma kɔnɔ, u si sirinin tɛ ani tasuma tɛ foyi kɛra u la. Mɔgɔ naaninan bɔnin be mɛlɛkɛ dɔ fɛ.’ O la, masacɛ gwɛrɛla dingɛ daa la ka pɛrɛn ko: “Sadiraki, Mesaki, Abɛdenego, Fɛɛn bɛɛ kuntigi Ala ka baarakɛlaw, aw ye bɔ yan!”

U bɔra tuma min na, bɛɛ y’a ye ko tasuma m’u jɛni. O kɔ, masacɛ ko: ‘Sadiraki, ni Mesaki ani Abɛdenego ka Ala ka tanu! Ale min y’a ka mɛlɛkɛ ci ka n’a ka baarakɛlaw kisi sabu u ma sɔn ka biri ka fɛɛn wɛrɛ bato u ka Ala kɔ.’

Nin ye kantigiya kɛcogo ɲuman ye Jehova ta fan fɛ dɛ! Yala an man kan ka nin kantigiya ɲɔgɔn ladegi wa?