SAAN caaman tɛmɛna. Nuhun dencɛw ye deen caaman sɔrɔ. O deenw bonyana ani olu fana ye deen caaman wolo. A ma mɛɛn, mɔgɔw cayara dugukolo kan.

O mɔgɔw cɛma, dɔ tɔgɔ tun ko Nɛmurɔdi, Nuhun ka tulomasama dɔ tun lo. Mɔgɔ jugu tun lo min tun be kongosogow ni mɔgɔw faga. Nɛmurɔdi tun y’a yɛrɛ kɛ kuntigi ye walisa ka tɔɔw mara. A koo tun man di Ala ye.

O wagati la, mɔgɔw bɛɛ tun be kaan kelen lo fɔ. Nɛmurɔdi tun b’a fɛ ka mɔgɔw bɛɛ kɛ ɲɔgɔn kan walisa ale ka se k’u mara. O la, i b’a lɔn a ye min kɛ wa? A y’a fɔ mɔgɔw ye k’u ka dugu sigi ani ka sangasojan lɔ a kɔnɔ. U filɛ jaa kan u be birikiw gosira.

O baara ma diya Jehova Ala ye. Ala tun b’a fɛ mɔgɔw ka jɛnsɛn ka dugukolo bɛɛ fa. Nka mɔgɔw y’a fɔ ɲɔgɔn ye ko: ‘Aw ye na an ka dugu sigi, ka sangasojan lɔ a kɔnɔ, a kuun ka se fɔɔ sankolo la. O la, an bena tɔgɔba sɔrɔ.’ Mɔgɔw tun b’a fɛ ka nɔɔrɔ la u yɛrɛw kan, u tun t’a fɛ k’a la Ala kan.

O kama, Ala y’a kɛ u ye o sangasojan lɔli dabila. I b’a lɔn a y’o kɛ cogo min na wa? Ala barila k’a kɛ u tɛ kaan kelen fɔ tugun. O la, sangasojan lɔbagaw tun tɛ ɲɔgɔn faamu tugun. O lo kama, u ka dugu tɔgɔ lara ko Babɛli, wala Babiloni, o kɔrɔ “Ɲagamini.”

Mɔgɔw y’a daminɛ sisan ka bɔ Babɛli dugu kɔnɔ. Minw tun be kaan kelen fɔ, olu jɛnna ka taga sigi dugukolo faan wɛrɛw la.