CƐDENNIN fila minw be jaa nin kan, u tɛ kelen ye fewu, tiɲɛn tɛ? I be u tɔgɔw lɔn wa? Min be donsoya kɛra o ye Ezawu ye, ani saga be min bolo, o ye Yakuba ye.

Ezawu ni Yakuba tun ye filaninw ye, Isiyaka ni Erebɛka ka deenw tun lo. Ezawu koo tun ka di u facɛ Isiyaka ye kosɔbɛ sabu donsocɛ ŋana tun lo, a tun be na ni sogo ye a somɔgɔw fɛ. Nka, Erebɛka kɔni tun be Yakuba lo kanu ka tɛmɛ sabu a ɲɛmalɔnin tun lo ani kɛlɛ tun man di a ye.

U mamacɛ Ibrayima tun bele be sii la. Ni a tun be kumana Jehova koo la, an ka miiri k’a filɛ cogo min na a tun ka di Yakuba ye k’a lamɛn. Ibrayima sara a saan 175nan na, o tuma na filaninw tun ye saan 15 sɔrɔ.

Ezawu saan 40nan na, a ye muso fila furu minw tun ye Kanankaw ye. O koo ye Isiyaka ni Erebɛka dusu kasi kosɔbɛ sabu o musow tun tɛ Jehova bato.

O kɔ, loon dɔ la, koo dɔ kɛra min y’a to Ezawu dimina kosɔbɛ a balimacɛ Yakuba kɔrɔ. Wagati nana se, Isiyaka tun ka kan ka duga kɛ a dencɛ fɔlɔ ye. Komi Ezawu tun ka kɔrɔ ni Yakuba ye, a miirila ko ale lo tun ka kan k’o duga sɔrɔ. Nka, Ezawu tun kɔnna k’a ka kɔrɔya tɔnɔ feere Yakuba ma. Ka fara o kan, o filaninw wolotuma na, Ala tun y’a fɔ ko Yakuba lo tun bena o duga nin sɔrɔ. Ani o lo kɛra. Isiyaka ye duga kɛ a dencɛ Yakuba ye.

Kɔfɛ, Ezawu nana o mɛn minkɛ, a dimina Yakuba kɔrɔ. A dimina kosɔbɛ fɔɔ a y’a fɔ ko a bena Yakuba faga. Erebɛka ye o koo mɛn tuma min na, a siranna kosɔbɛ. O kama a y’a fɔ a cɛɛ Isiyaka ye ko: ‘Ni Yakuba fana ye Kananka dɔ furu, o bena kɛ dusukasiba ye dɛ!’

O la, Isiyaka y’a dencɛ Yakuba weele k’a fɔ a ye ko: ‘I kana Kanaan sunguru furu. Wuli ka taga i mamacɛ Betuwɛli ka soo Aran. I k’a dencɛ Laban ka denmuso dɔ furu.’

Yakuba ye mɛnni kɛ a facɛ fɛ ani a sinna ka tagama jan kɛ ka taga a somɔgɔw fɛ Aran.