YUSUFU ma se k’a yɛrɛ minɛ tugun. A y’a fɔ a ka baaradenw ye ko u bɛɛ ka bɔ. Tuma min na a kelen tora n’a balimacɛw ye, a ye kasi daminɛ. An ka miiri ka filɛ o koo barila a balimacɛw la cogo min na sabu u m’a lɔn fɛɛn min kama a be kasira. A laban, a y’a fɔ ko: ‘Ne ye Yusufu ye. N facɛ bele be sii la wa?’

A balimacɛw kabakoyara fɔɔ u ma se ka kuma. U siranna. Nka Yusufu y’a fɔ ko: ‘ A’ ye gwɛrɛ ne la.’ U gwɛrɛla tuma min na, a y’a fɔ ko: ‘Ne ye aw balimacɛ Yusufu ye, aw ye min feere Misirakaw ma.’

Yusufu tora ka kuma ɲumanw fɔ u ye ko: ‘Aw kana aw yɛrɛ jalaki ko aw ye ne feere. Tiɲɛn na, Ala lo tun ye ne ci Misira walisa ka mɔgɔw niin kisi. Farahuna ye ne kɛ jamana bɛɛ kuntigi ye. O kama sisan, a’ ye teliya ka kɔsegi ka taga o kibaru fɔ n facɛ ye. Ani aw k’a fɔ a ye ko a ka na sigi yan.’

O kɔ, Yusufu ye i meleke a balimacɛw la k’u bɛɛ daa susu. Farahuna y’a mɛn ko Yusufu balimacɛw nana a fɛ minkɛ, a y’a fɔ a ye ko: ‘U ka wotorow ta yan ka taga n’u ye k’u facɛ n’u ka denbayaw ta ka na yan. Ne bena Misira jamana yɔrɔ ɲanaman di u ma.’

U ye o lo kɛ. Yakuba n’a somɔgɔw bɛɛ tagara Misira. I ɲɛɛ be Yusufu la a b’a facɛ kunbɛnna wa?

Yakuba ka somɔgɔw tun cayara kosɔbɛ. Yakuba n’a deenw n’a mamadenw minw nana sigi Misira, u bɛɛ lajɛnnin tun ye mɔgɔ 70 ye. Musow ni baaraden caaman ma jati. U bɛɛ nana sigi Misira. U tun be weele ko Israɛldenw sabu Ala tun ye Yakuba tɔgɔ yɛlɛma ka fɔ ko Israɛl. Israɛldenw nana kɛ Ala ka mɔgɔ ɲɛnatɔmɔninw ye. An bena baro kɛ o kan kɔfɛ.