DENBAYABA nin filɛ. Yakuba ka dencɛ 12 lo. A ye denmusow sɔrɔ fana. I be o deenw la kelen tɔgɔ lɔn wa? An k’a ɲini k’u dɔw tɔgɔ lɔn.

Leya ye Urubɛn, Simeyɔn, Levi ani Zuda wolo. Arasɛli y’a ye ko a tɛ deen sɔrɔla minkɛ, a dusu kasira kosɔbɛ. O kama a y’a ka baaraden Bila di Yakuba ma. Bila ye dencɛ fila wolo minw tɔgɔw ko Dan ni Nɛfutali. O kɔ, Leya fana y’a ka baaraden Zilipa di Yakuba ma. Zilipa ye Gadi ni Asɛri wolo. A laban, Leya ye dencɛ fila wɛrɛ wolo, Isakar ani Zabulɔn.

Nin bɛɛ kɔ le, Arasɛli sɔrɔla ka deen dɔ wolo. A y’a tɔgɔ la ko Yusufu. Kɔfɛ, an bena koo caaman faamu Yusufu koo la, sabu a nana kɛ mɔgɔba ye. Nunu ye Yakuba ka dencɛ 11 ye, a ye minw sɔrɔ k’a to Arasɛli facɛ Laban ka soo.

Yakuba ye denmusow fana sɔrɔ. Nka, Bibulu be u la kelen dɔrɔn tɔgɔ yira. A tɔgɔ ko Dina.

Wagati dɔ nana se, Yakuba y’a latigɛ ko a bena bɔ Laban fɛ ka kɔsegi Kanaan jamana na. O la, a y’a ka denbayaba n’a ka bɛgɛnkulubaw lajɛn, ani a ye tagama jan daminɛ.

Yakuba n’a ka denbaya kɔseginin kɔ Kanaan jamana na, Arasɛli ye dencɛ wɛrɛ wolo. A wolola k’u to tagama na. Wolo gwɛlɛyara Arasɛli ma fɔɔ a niin tora a la o deen bangeli kɔ. Nka, denɲɛnin kisira, foyi ma kɛ a la. Yakuba y’a tɔgɔ la ko Bɛnzamɛn.

An ka Yakuba ka dencɛ 12 tɔgɔw to an hakili la sabu Israɛl siyaw bɛɛ bɔra olu lo la. Tiɲɛn na, Yakuba ka dencɛw la 10 ani Yusufu ka dencɛ 2 lo tɔgɔw lara Israɛl siya 12 kan. Deen nunu bɛɛ wolonin kɔ, Isiyaka ye sii jan sɔrɔ. Siga t’a la, a dusu diyara ka mamaden caaman sɔrɔ. Nka, an k’a filɛ koo min ye a mamaden Dina sɔrɔ.