YUSUFU b’a fɛ k’a lɔn ni a kɔrɔcɛ 10 kɔnɔ tun ka jugu hali bi. O kama a y’a fɔ ko: ‘Aw nana ka jamana cogoya lo lajɛ. Barika tɛ jamana yɔrɔ minw na, aw nana janko k’o lɔn.’

U y’a fɔ ko: ‘Ayi, an ma na o kama. An ye hɔɔrɔnw ye. An bɛɛ ye balimacɛw ye. An tun ye mɔgɔ 12 ye. Nka kelen tɛ yen tugun ani an dɔgɔnin be soo an faa fɛ.’

Yusufu y’a kɛ i n’a fɔ a ma la u la. A ye u balimacɛ simeyɔn minɛ ka don kaso la ani a ye suman di tɔɔw ma k’u bila ka taga soo. Nka a y’a fɔ u ye ko: ‘Ni aw be kɔsegira ka na, aw dɔgɔnin min tora soo, aw ka na n’a ye.’

U sera Kanaan tuma min na, u y’o koo bɛɛ lakali u facɛ Yakuba ye. Yakuba dusu kasira kosɔbɛ. A kulera ko: ‘Yusufu tɛ yen tugun, sisan, Simeyɔn fana tɛ yen. Ayi, ne tɛna a to aw ka taga ni ne ka lagare Bɛnzamɛn ye.’ Nka, u ka suman be banna tuma min na, Yakuba waajibiyara ka Bɛnzamɛn bila ka taga n’u ye Misira walisa u ka se ka dumuni sɔrɔ tugun.

Sisan, Yusufu ɲɛɛ be a balimacɛw natɔ la. A ninsɔn diyara kosɔbɛ k’a dɔgɔcɛ Bɛnzamɛn ye. Nka, u si m’a lɔn ko nin mɔgɔba ye Yusufu ye. Sisan, Yusufu bena koo dɔ kɛ walisa k’a faden 10 kɔrɔbɔ ka filɛ.

A ko a ka baaradenw k’u ka bɔrɔw fa suman na. Nka, a fana ko u k’ale ka warigwɛ jifilen don Bɛnzamɛn ka bɔrɔ kɔnɔ u ɲina ma. U bɛɛ bɔnin kɔ dugu kɔnɔ ka janfa dɔɔni, Yusufu ye a ka baaradenw bila k’u nɔgwɛn. U sera u ma tuma min na, u y’a fɔ u ye ko: ‘Mun na aw ye an matigi ka warigwɛ jifilen soɲɛ?’

U bɛɛ y’a fɔ ko: ‘An ma a ka jifilen soɲɛ. Ni aw ye jifilen nin ye an dɔ fɛ, o tigi ka faga.’

O la, baaradenw ye bɔrɔw bɛɛ kɔnɔ wɔgɔbi ka filɛ ani u ye jifilen nin sɔrɔ Bɛnzamɛn ka bɔrɔ kɔnɔ i n’a fɔ i ɲɛɛ b’a la cogo min na. Baaradenw y’a fɔ u ye ko: ‘Aw be se ka taga nka, Bɛnzamɛn ka kan ka tugu an kɔ.’ Faden 10 nunu bena mun lo kɛ sisan sa?

U bɛɛ kɔsegira ni Bɛnzamɛn ye ka taga Yusufu ka soo. Yusufu y’a fɔ u ye ko: ‘Aw bɛɛ be se ka taga soo, nka Bɛnzamɛn kɔni ka kan ka to yan ka kɛ ne ka jɔɔn ye.’

O tuma na, Zuda y’a fɔ ko: ‘Ni ne ma taga ni deen nin ye, n facɛ bena sa sabu a koo ka di a ye kosɔbɛ. O kama, sabari ka ne kɛ i ka jɔɔn ye, nka i ka deen nin bila ka taga soo.’

Yusufu y’a ye ko a balimacɛw sɔɔn yɛlɛmana. U si kɔnɔ tun man jugu tugun. An k’a filɛ sisan Yusufu bena min kɛ.