I ƝƐƐ be cɛden min na jaa kan, a dusu kasinin lo dɛ! Yusufu lo. A balimacɛw b’a feerela jagokɛla dɔw ma minw be tagara Misira jamana na. Yusufu bena kɛ jɔɔn ye o jamana na. Mun na a fadenw ye nin kojugu kɛ a la? Ɲangoya lo y’a to u ye o kɛ.

U facɛ Yakuba tun be Yusufu kanu ka tɛmɛ olu kan. O kosɔn a ye forokiya cɛɲumanba dɔ kalan k’a di a ma. A kɔrɔcɛ 10 y’a ye ko Yusufu lo koo ka di Yakuba ye ka tɛmɛ olu kan minkɛ, ɲangoya donna u la ani u y’a daminɛ k’a kɔniya. Nka, u tun b’a kɔniya koo wɛrɛ kosɔn tugun.

Yusufu ye siko fila kɛ. A ka siko fila la, a balimacɛw tun b’u kunbiri gwan a ɲɛɛ kɔrɔ. Yusufu ye o sikow lakali a balimacɛw ye tuma min na, u y’a kɔniya kosɔbɛ tugun.

Sisan, loon dɔ la, a kɔrɔcɛw tun tagara u facɛ ka sagaw dɛndɛ yɔrɔ. Yakuba ye Yusufu ci ko a ka taga u yɔrɔ filɛ ni u be hɛɛrɛ la. Tuma min na Yusufu kɔrɔcɛw y’a natɔ ye, u dɔw ko: ‘An k’a faga!’ Nka u bɛɛ kɔrɔcɛ Urubɛn y’a fɔ ko: ‘Ayi, aw kana o kɛ!’ O la, sanni u ka Yusufu faga, u y’a minɛ k’a fili kɔlɔn kolon dɔ kɔnɔ. O kɔ, u sigira ka miiri ka filɛ u bena min kɛ a la.

O tuma na, u ye Isimayɛliden dɔw tɛmɛtɔ ye u gɛrɛfɛ. Zuda y’a fɔ a fadenw ye ko: ‘An k’a feere Isimayɛliden nunu ma.’ Ani u y’o lo kɛ. U ye Yusufu feere warigwɛ 20 la. O tun ye kɔnɔjuguya daan ye dɛ!

U do bena mun lo fɔ u facɛ ye sa? U ye bakɔrɔnin dɔ faga ka o joli kɛ kɛ Yusufu ka forokiya cɛɲumanba la. O kɔ, u ye forokiya ta ka taga a yira u facɛ Yakuba la soo k’a fɔ ko: ‘An ye nin sɔrɔ. A filɛ ni Yusufu ka forokiya tɛ.’

Yakuba y’a ye ko o lo. A kulera ko: ‘Wara jugu dɔ y’a faga!’ Yusufu balimacɛw tun b’a fɛ u facɛ ka o lo miiri cɔ. Yakuba dusu kasira kosɔbɛ. A y’a deen suu kasi tile caaman kɔnɔ. Nka, Yusufu tun ma sa. An k’a filɛ min kɛra a la Misira jamana na.