A FILƐ kojuguba min kɛra! U ye Yezu faga. U ye puwɛntiw kɛ k’a bolo n’a seenw sɔgɔ k’a gwengwe yiri kan. Mun na u ye nin kɛ Yezu la do?

O kɛra sabu Yezu koo tun man di mɔgɔ dɔw ye. I b’a lɔn mɔgɔ minw lo wa? Mɛlɛkɛjugu Sutana Naafigi ye u la dɔ ye. Ale lo ye Adama ni Awa lasun u ye Jehova kaan bila. Ale Sutana kelen nin lo ye Yezu juguw lasun u ye kojuguba nin kɛ.

Sanni Yezu juguw k’a gwengwe yiri kan, u y’a lɔgɔbɔ cogo sifa bɛɛ la. I hakili b’a la cogo min na u y’a minɛ Zɛtisemane nankɔ kɔnɔ wa? Mɔgɔ jumanw lo tun ye Yezu juguw ye? Diinan kuntigiw tun lo. Ayiwa, an k’a filɛ min kɛra a minɛnin kɔ.

Tuma min na diinan kuntigiw ye Yezu minɛ, a ka cidenw bolila k’a to yen sabu u siranna. Nka, ciden Piyɛri ni Zan ma boli ka janfa. U kɔsegira ka na a filɛ fɛɛn min tun bena Yezu sɔrɔ.

Sarakalasebagaw tagara ni Yezu ye u ka kuntigiba kɔrɔ Anɛ fɛ. Nka, jama ma mɛɛn n’a ye o yɔrɔ la. O kɔ, u tagara n’a ye Kayifu ka soo, ale lo tun ye sarakalasebagaw kuntigiba ye sisan. Diinan kuntigi caaman lajɛnnin tun be yen.

U ye kiti tigɛ Yezu kan Kayifu ka soo. U ye mɔgɔw weele ka na ngalon la a kan. Diinan kuntigiw bɛɛ ko: ‘Yezu ka kan ka faga.’ O kɔ, u ye daji tu a ɲɛda la ani k’a bugɔ ni u bolokuruw ye.

O wagati kelen na, Piyɛri tun be kɛnɛma luu kɔnɔ. Mɔgɔw tun be tasuma jara yen sabu nɛnɛ tun be yen o suu la. Baaraden musoman dɔ ye Piyɛri filɛ k’a fɔ ko: ‘Cɛɛ nin tun be ni Yezu ye.’

Piyɛri y’a jaabi ko: ‘Ayi, ne tɛ!’

U y’a fɔ Piyɛri ye siɲɛ saba ko a tun be ni Yezu ye. Nka, o siɲɛ saba bɛɛ la Piyɛri ko tiɲɛn tɛ. A siɲɛ sabanan na, Yezu yɛlɛmana ka Piyɛri filɛ. Piyɛri nimisara kosɔbɛ o ngalon tigɛli kosɔn, ani a bɔra kɛnɛma ka kasi.

Jumalon sɔgɔmada fɛ, sarakalasebagaw tagara ni Yezu ye u ka kititigɛ jamakulu ka ɲɔgɔnye boon kɔnɔ. O yɔrɔ la, u ye ɲɔgɔn ɲininga u bena min kɛ Yezu la. U y’a minɛ ka taga n’a ye Pɔnsi Pilati fɛ, ale lo tun be Zude mara kun na.

Sarakalasebagaw y’a fɔ Pilati ye ko: ‘Cɛɛ nin ye kojugukɛla ye. A ka kan ka faga.’ Pilati ye Yezu ɲininga, ani a y’a fɔ ko: “Ne ma jalakiyɔrɔ ye cɛɛ nin na.” O kɔ, Pilati ye Yezu bila ka taga Erɔdi Antipasi fɛ o min tun be Galile mara kun na, nka a tun nana bɔ Zeruzalɛmu. Erɔdi fana ma jalakiyɔrɔ si ye Yezu la, o kama a y’a kɔsegi Pilati ma.

Pilati tun b’a fɛ ka Yezu labila. Nka, Yezu juguw tun b’a fɛ kasoden wɛrɛ lo ka labila. O kasoden tun ye soncɛ Barabasi lo ye. O kama, Pilati bɔra ni Yezu ye kɛnɛma, midi wagati tun lo. A y’a fɔ jama ye ko: “A’ ye aw ka masacɛ filɛ.” Nka, u y’a jaabi ko: “A ka faga, a ka faga lɔgɔ kan!” O la, Pilati ye Barabasi labila ani a ye Yezu don u bolo walisa u k’a faga.

O jumalon wulada fɛ, u ye Yezu gwengwe yiri kan. U ye kojugukɛla fila dɔw fana gwengwe a gɛrɛfɛ, kelen a numanbolo fɛ ani tɔɔ kelen a kinibolo fɛ. Olu ma yira jaa nin kan. Dɔɔni sanni Yezu ka sa, kojugukɛla kelen y’a fɔ a ye ko: “Matigi, n’i nana sigi i ka masaya la tuma min na, i k’i hakili to ne la.” Yezu y’a jaabi ko: “Tiɲɛ na, ne b’a fɔ i ye, i bena kɛ ne fɛ arijana na.”

Nin ye layidu ɲuman ye dɛ! I b’a lɔn Yezu kaan be alijɛnɛ min ma wa? Ala tun ye alijɛnɛ fɔlɔ min dilan, o tun be min le? Dugukolo kan kɛ! Tuma min na Yezu bena to sankolo la ka kuntigiya kɛ, a bena o cɛɛ lakunu alijɛnɛ kura kɔnɔ dugukolo kan. Yala nin tɛ ninsɔndiyako ye wa?