CƐDENNIN nin filɛ a be baro kɛra ni cɛkɔrɔba nunu ye. Karamɔgɔw lo Alabatosoba kɔnɔ Zeruzalɛmu. Cɛdennin nin ye Yezu lo ye. A bonyana sisan ani a sii ye saan 12 ye.

Karamɔgɔw kabakoyara kosɔbɛ k’a ye ko Yezu be koo caaman lɔn Ala koo la ani Bibulu kɔnɔnakow la. Nka, mun na Yusufu ni Mariyamu tɛ n’a ye yan? U be min do? An k’o lajɛ.

Saan o saan, Yusufu n’a ka denbaya be taga Zeruzalɛmu seli kɛrɛnkɛrɛnnin dɔ kama min be weele ko Tɛmɛnkan seli. O ye tagama jan ye ka bɔ Nazarɛti ka taga Zeruzalɛmu. Mobili tɛ mɔgɔ si fɛ ani tɛrɛn fana tɛ yen. Olu si tun tɛ yen o wagati la. Mɔgɔ caaman be tagama le ani u be tile saba ɲɔgɔn lo kɛ sira kan.

Sisan, Yusufu ka denbaya mɔgɔw cayara. O kama, u ka kan k’u janto Yezu dɔgɔcɛw n’a dɔgɔmusow la. Ayiwa nin saan nin na, Yusufu ni Mariyamu kɔsegitɔ Nazarɛti, u tun be n’u deen tɔɔw ye. U y’a miiri ko Yezu be n’u tagamaɲɔgɔnw ye. Nka, u lɔra tuma min na tileben tuma na, u ma Yezu ye. U y’a ɲini u somɔgɔw n’u teriw cɛma, nka u m’a ye. O kosɔn, u kɔsegira ka taga a ɲini Zeruzalɛmu.

A laban, u ye Yezu ye yan karamɔgɔw fɛ. A siginin tun be u cɛma k’u lamɛn ani k’u ɲininga. A lamɛnbagaw bɛɛ kabakoyara a ka hakilitigiya koo la. Nka Mariyamu ko: ‘N deen, mun y’a to i ye nin kɛ an na? A filɛ, ne n’i facɛ hakili ɲagaminin b’i yɔrɔ ɲinina.’

Yezu y’a jaabi ko: ‘Mun na aw be ne yɔrɔ ɲini? Aw m’a lɔn ko ne ka kan ka sɔrɔ n Faa ka soo kɔnɔ wa?’

Tiɲɛn na, Yezu tun be se ka Alako kalan sɔrɔ yɔrɔ min na, a tun ka di a ye ka sɔrɔ o yɔrɔ lo la. Yala an fana man kan ka kɛ n’o miiriya ɲɔgɔn ye wa? A ka dugu la Nazarɛti, Yezu tun be taga lajɛnw na lɔgɔkun o lɔgɔkun ka Ala bato. Komi a tun b’a janto kalan na tuma bɛɛ, a ye fɛɛn caaman lɔn ka bɔ Bibulu kɔnɔ. An ka tugu Yezu ka ɲɛyirali kɔ.