YEZU siginin filɛ yan. A be mɔgɔ nunu bɛɛ kalanna kulu dɔ kan Galile mara la. Minw siginin be a gɛrɛfɛ, olu ye a ka kalandenw ye. A ye mɔgɔ 12 sugandi olu cɛma k’u kɛ a ka cidenw ye. O cidenw ye Yezu ka kalandenw ye minw ni tɔɔw tɛ kelen ye. I be u tɔgɔw lɔn wa?

Simɔn Piyɛri n’a dɔgɔcɛ Andere be yen. Zaki n’a dɔgɔcɛ Zan fana be yen. Ciden fila wɛrɛ fana tɔgɔ ko Zaki ani Simɔn. Ciden fila tɔgɔ ko Zuda: u la kelen ye Zuda Isikariyɔti ye ani tɔɔ kelen be weele fana ko Tade. Ka fara olu kan, Filipu ni Natanayɛli (min be weele fana ko Baritelemi)ani Matiyo ni Toma fana be yen.

Yezu kɔseginin kɔ ka bɔ Samari, a y’a daminɛ siɲɛ fɔlɔ la ka waajuli kɛ ko: “Sankolo masaya waati surunyana.” I b’a lɔn o Masaya ye fɛɛn min ye wa? O ye Ala ka gofɛrɛnɛman yɛrɛ yɛrɛ lo ye. Yezu ye o Masaya ka masacɛ ye. A bena to sankolo la ka kuntigiya kɛ ani ka hɛɛrɛ lase dugukolo ma. Ala ka Masaya bena dugukolo kuru bɛɛ kɛ alijɛnɛ cɛɲumanba ye.

Yezu siginin be yan ka mɔgɔw kalan Masaya koo la. A b’a ɲɛfɔra u ye ko: “Aw ka kan ka Ala daali cogo min na, o filɛ: ‘An Faa min be sankolo la, i tɔgɔ ka boɲa. I ka masaya ka na. I sago ka kɛ dugukolo kan i ko a be kɛ sankolo la cogo min na.’ ” Mɔgɔ caaman b’o delili weele ko ‘Matigi ka delili.’ Dɔ wɛrɛw b’a weele ko: ‘An Faa min be sankolo la.’ I be se k’o delili bɛɛ fɔ i kun fɛ wa?

Yezu be mɔgɔw kalanna u ka kan ka ɲɔgɔn minɛ cogo min na. A ko: “Aw b’a fɛ mɔgɔ tɔw ka koo min kɛ aw ye, aw fana k’o ɲɔgɔn kɛ u ye.” Ni mɔgɔw b’i minɛ ka ɲɛ, o man di i ye wa? O kama, Yezu b’a fɔra ko an ka kan ka mɔgɔw minɛ ka ɲɛ. Tuma min na bɛɛ bena nin ladili sira tagama alijɛnɛ kɔnɔ dugukolo kan, o bena kɛ hɛɛrɛko ye dɛ!