A FILƐ tuganin be jigira cɛɛ nin kuun kan. Cɛɛ nin ye Yezu lo ye. A sii ye saan 30 ɲɔgɔn ye sisan. Cɛɛ min be n’a ye, ale tɔgɔ ko Zan. An ye koo dɔw kalan ale koo la ka tɛmɛ. Tuma min na Mariyamu tagara bɔ a balimamuso Elizabɛti ye, ani deen lamagara Elizabɛti kɔnɔ ninsɔndiya fɛ, i hakili b’o la wa? O deen min tun ma wolo fɔlɔ, o tun ye Zan ye. Nka, Zan ni Yezu be mun lo kɛra sisan?

Zan tun ye Yezu fari kuturu bɛɛ tunu Zurudɛn baji la. U be mɔgɔ batize nin cogo lo la. U be kɔn k’a tigi fari kuturu bɛɛ tunu jii la ani a tigi be segi ka bɔ jii la. Komi Zan tun b’o lo kɛ mɔgɔw la, o kama a be weele ko Zan Batizelikɛla. Nka, mun na Zan ye Yezu batize do?

Ayiwa, Zan y’o kɛ sabu Yezu lo nana a ɲini a fɛ ko a k’ale batize. Mɔgɔ minw b’a fɛ k’a yira k’u nimisara u ka kɛwale juguw kɛli la, Zan b’olu lo batize. Nka, yala Yezu ye kɛwale jugu dɔ kɛ a ka kan ka nimisa min na wa? Ayi, Yezu ma kɛwale jugu si kɛ sabu Ala yɛrɛ Dencɛ lo ka bɔ sankolo la. O la, a y’a ɲini Zan fɛ a k’ale batize kuun wɛrɛ lo kama. An k’a filɛ a y’o kɛ kuun min kama.

Sanni Yezu ka na Zan yɔrɔ, a tun be miniziye baara lo kɛ. Miniziye lo be yiri lɛsɛ ka fɛɛn dɔw dilan i n’a fɔ tabaliw, sigilanw ani baanw. Mariyamu cɛɛ Yusufu tun ye miniziye ye, ani a ye Yezu degi o baara la. Nka, Jehova tun m’a Dencɛ ci dugukolo kan miniziye baara kama. A tun y’a ci baara kɛrɛnkɛrɛnnin dɔ lo kama, ani o baara daminɛwagati tun sera. O kama, walisa k’a yira ko a tun labɛnnin lo sisan k’a Faa sago kɛ, Yezu y’a ɲini Zan fɛ a k’ale batize. Yala o diyara Ala ye wa?

O diyara a ye, sabu Yezu bɔtɔ jii la, kumakan dɔ bɔra sankolo la k’a fɔ ko: ‘Nin ye ne Dencɛ ye min koo ka di ne ye.’ A kɛra i n’a fɔ sankolo dayɛlɛla ani tuganin nin jigira Yezu kan. Nka, tuganin yɛrɛ yɛrɛ tun tɛ. Ala ka hakili senu tun lo min ye tuganin cogoya ta.

Sisan, Yezu ka kan ka miiri koo caaman kan. O kama, a tagara yɔrɔ dɔ la a kelen na ka tile 40 kɛ. Sutana gwɛrɛla a la o yɔrɔ la. Siɲɛ saba bɛɛ, a y’a ɲini Yezu fɛ a ka koo dɔ kɛ min be Ala ka sariya tiɲɛ. Nka, Yezu ma sɔn.

O kɔ, Yezu kɔsegira ani a ye mɔgɔ dɔw kunbɛn minw nana kɛ a ka kalanden fɔlɔw ye. U dɔw tɔgɔ ko: Andere, Piyɛri (min be weele fana ko Simɔn), Filipu ani Natanayɛli (min be weele fana ko Baritelemi). Yezu n’a ka kalanden kuraw tagara Galile mara la. O yɔrɔ la, u lɔra Kana, o min ye Natanayɛli wolodugu ye. Furu ɲɛnagwɛba dɔ tun be kɛra yen. Yezu tagara yen ani a y’a ka kabako fɔlɔ kɛ o yɔrɔ la. I b’a lɔn a ye min kɛ wa? A ye jii yɛlɛma k’a kɛ diwɛn ye.