KOMI a kɔrɔtanin lo kosɔbɛ Jehova Seerew fɛ ka mɔgɔw kalan Bibulu koo la, dɔw be se k’a miiri ko u t’u mako don lakɔlikalan na. Nka, o tɛ tiɲɛn ye. Walisa ka se ka mɔgɔ wɛrɛw kalan, kalanfa ka ɲi ka koo dɔw degi fɔlɔ. O do tɛ ɲɛ fɔrɔmasɔn ni kalan ɲuman kɔ. O kama, Jehova Seerew b’a jati ko lakɔlikalan nafa ka bon kosɔbɛ. A saan caaman ye nin ye, u ka sigiyɔrɔsoba be  fɔrɔmasɔnw ani lakɔli caaman labɛn u ye fana. O fɔrɔmasɔnw n’o lakɔliw ye Jehova Seerew ani mɔgɔ wɛrɛw dɛmɛ k’u hakili diya, ka kɛ ni tagamacogo ɲuman ye ani k’u ka Alako fisaya.

Misali la, jamana caaman na, Jehova Seerew ye see sɔrɔ gwɛlɛyaba dɔ kan: Mɔgɔ minw ma kalan bɛrɛ kɛ, wala u ma kalan kɛ fewu, u y’o ɲɔgɔnna mɔgɔw dɛmɛ u sera sɛbɛri ni kalangwɛ kɛcogo la. Walisa k’o laɲinita dafa, u ye labɛnw kɛ walisa mɔgɔw ka se ka kalan sɔrɔ.

Misali la, Nizeriya jamana na, kabi saan 1949, Jehova Seerew be mɔgɔw dɛmɛna u ka kalan lɔn. O sababu la, mɔgɔ waa caaman sera kalangwɛ kɛcogo la o jamana na. Sɛgɛsɛgɛri dɔ y’a yira ko Nizeriya, Jehova Seere kɛmɛ kan, mɔgɔ bikɔnɔntɔn ni kɔ lo be se kalangwɛ ni sɛbɛri la. K’a sɔrɔ o jamana kuru bɛɛ la, mɔgɔ kɛmɛ kan, minw be se kalan na, u ma se mɔgɔ biduuru ma. Mɛkisiki jamana na, Jehova Seerew be mɔgɔw dɛmɛna u ka kalan lɔn kabi saan 1946. Saan kelen kɔnɔ, u sera ka mɔgɔ 6 500 ni kɔ lo dɛmɛ u sera sɛbɛri ni kalangwɛ kɛcogo la. Tiɲɛn na, u ye mɔgɔ minw dɛmɛ ka kalan lɔn, u tɛmɛna mɔgɔ 100 000 kan fɔɔ ka taga ka na. Jehova Seerew ye kalan degi mɔgɔw la jamana caaman wɛrɛw la, i n’a fɔ Bolivi, Kameruni, Nepali ani Zanbi. Jehova Seerew ye gafe nin deen miliyɔn 7 ni kɔ lo bɔ kaan 100 ni kɔ la: I k’i timinandiya kalangwɛ ani sɛbɛri la.

Jamana minw na o balikukalanw be kɛ, tuma caaman na faaman minw be kalankow kun na, olu ye Jehova Seerew waleɲuman lɔn o kosɔn. Misali la, Mɛkisiki jamana na, faaman dɔ ye lɛtɛrɛ ci Jehova Seerew ma ko: “N’ b’aw fo aw ka dɛmɛ kosɔn. Mɔgɔ minw tɛ se kalan na, aw be baara ɲuman min kɛra k’u degi kalangwɛ ni sɛbɛri kɛcogo la, ne b’aw fo k’aw waleɲuman lɔn o kosɔn gofɛrɛnɛman tɔgɔ la! . . . Aw be baara min kɛra ten, n’ b’a fɛ o ka ɲɛ aw bolo.”

A kɔrɔtanin lo kosɔbɛ Jehova Seerew fɛ ka mɔgɔw kalan Bibulu la. O kama, u be Bibulu ka kalanw ɲɛfɔ mɔgɔw ye cogo min na, u b’u jija kosɔbɛ k’o kɛcogo fisaya. Misali la, kalandenw be fɔrɔmasɔn sɔrɔla kafo 119 000 ni kɔ kɔnɔ duniɲa kuru bɛɛ la. O fɔrɔmasɔn b’u dɛmɛ u ka se kalangwɛ ani kumacogo la jama ɲɛfɛ. Hali denmisɛn fitinin minw be se kalangwɛ la, olu be se k’u tɔgɔ sɛbɛ walisa k’o fɔrɔmasɔn sɔrɔ. O fɔrɔmasɔn b’u dɛmɛ cogo caaman na, hali u ka lakɔlikalan yɛrɛ la. Kalanfa caaman y’a fɔ ko lakɔliden minw ye Jehova Seerew ye, olu be se kumacogo la koɲuman.

Ka fara o kan, Jehova Seerew be biblotɛki dɔ labɛn u ka Masaya Boonw kelen kelen bɛɛ kɔnɔ, yɔrɔ minw na u  be lajɛnw kɛ. O biblotɛki kɔnɔ, Bibulu sɛgɛsɛgɛrikɛ minanw, daɲɛgafew ani kitabu wɛrɛw be sɔrɔ. Mɔgɔ minw bɛɛ be na lajɛnw na, o biblotɛki labilanin lo olu ye. Jehova Seerew ka kafow kɔnɔ, u be bɛɛ jija kalangwɛ la. U be denbayaw jija fana u ka kɛ n’u tɔgɔla biblotɛki ye ani u ka gafe sifa caaman bila a kɔnɔ walisa ka denmisɛnw ni balikuw mako wasa.

Jehova Seerew ye lakɔli dɔw sigi sen kan fana. U dɔw la, u be fɔrɔmasɔn di cɛɛw ni musow ma misɔndenya baara kama. Dɔ wɛrɛw la, u be  fɔrɔmasɔn di cɛɛw ma minw be ni kunkanbaaraw ye kafow kɔnɔ. O labɛnw b’a yira ka gwɛ ko kalanko kɔrɔtanin lo kosɔbɛ Jehova Seerew fɛ.