BIRO min ka baara ɲɛsinnin be hakiliɲagami bana koo ma Etazini, ale mɔgɔw ye bangebaga dɔw ɲininga. O bangebagaw sera k’u deenw lamɔ koɲuman. O deenw sii tɛmɛna saan 21 kan, “u bɛɛ be baara la ani a be komi koow be ɲɛna u bolo.” U y’o bangebagaw ɲininga ko: “Ka kɛɲɛ n’aw deenw lamɔcogo ye, ladili ɲuman juman lo b’aw fɛ k’a di bangebaga tɔɔw ma?” U fanba y’o ɲiningali jaabi  ko: “Aw k’aw deenw kanu kosɔbɛ,” “aw k’u kolo cogo nafaman na,” “aw ka wagati kɛ n’u ye,” “aw k’u kalan u ka ɲuman ni juguman lɔn ka bɔ ɲɔgɔn na,” “aw ka ɲɔgɔn bonya,” “aw k’u lamɛn koɲuman,” “aw ka ladiliw di u ma sanni ka kuma caaman,” ani “aw ka koow kɛ k’a dama kɛɲɛ.”

Nka walisa deenw ka kɛ baliku ɲumanw ye, o tɛ bangebagaw dɔrɔn ka kunkanbaara ye. Kalanfaw fana lɔyɔrɔ ka bon kosɔbɛ o koo la. Lakɔlisow ka ladilidibaga ɲuman dɔ y’a fɔ ko: “Lakɔlikalan kuun jɔnjɔn ye ka bangebagaw dɛmɛ walisa u deenw ka kɛ baliku setigiw ye minw be koo caaman lɔn ani u be koow kɛ k’a dama kɛɲɛ.”

O la, bangebagaw ni kalanfaw ka laɲinita ye kelen ye. O ye ka denmisɛnw dɛmɛ u ka kɔrɔbaya ka kɛ baliku ɲumanw ye minw be koow kɛ k’a dama kɛɲɛ, u be ɲɛnamaya diyabɔ ani u b’u sigiɲɔgɔnw n’u yɛrɛ mako ɲɛ.

Ni bangebagaw tɛ jɛn ka koow kɛ ni kalanfaw ye, o be na ni gwɛlɛyaw ye. Misali la, bangebaga dɔw b’u bolo bɔ pewu u deenw ka kalan koo la. Dɔw fana b’a ɲini ka sanga ni kalanfaw ye. Faransi ka zurunali dɔ y’a fɔ o koo la ko: “Sisan, kalanfa dɔrɔn lo tɛ lakɔliden kuntigi ye klasi kɔnɔ. Min be bangebagaw kuun na, o ye ko u deenw ka lakɔlikalan ka ɲɛ. O kama, u be lakɔligafew sɛgɛsɛgɛ walisa ka fiɲɛ sɔrɔ u la, u be kalanfa jalaki ani k’a kɔrɔfɔ a ka kalankɛcogo kosɔn. N’u deen ma baara kɛ lakɔliso la, u be sin ka wuli kalanfa kama.” O koow be se ka kalanfaw bali u k’u ka baara kɛ ka ɲɛ.

Jehova Seerew b’a jati ko u deenw bena kalan ɲuman sɔrɔ n’olu be jɛn ka baara kɛ ni kalanfaw ye u kɛtɔ k’u mako don koɲuman u deenw ka kalanko la. Olu fɛ, a kɔrɔtanin lo u ka jɛn ka baara kɛ ni aw kalanfaw ye sabu aw ka baara be gwɛlɛyara ka taga le.

Gwɛlɛya minw be duniɲa kɔnɔ, o lo be lakɔlisow la fana. Saan o saan, o gwɛlɛyaw be juguyara ka taga lakɔlisow la. Zurunali dɔ ye Etazini ka lakɔliso dɔ ka koow lakali ko: “Lakɔlidenw be sinɔgɔ klasi kɔnɔ, u be ɲɔgɔn bagabaga kuluwariw (couloirs) la. O kuluwariw la, jaaw ɲɛgɛɲɛgɛnin be kogow yɔrɔ bɛɛ la. U be lakɔliden ɲumanw lɔgɔbɔ. . . . Gwɛlɛyaw be lakɔlidenw fanba kan, i n’a fɔ: dɔw b’u janto u ka denɲɛninw na, dɔw bangebagaw be kaso la ani dɔw ka ɲi k’u yɛrɛ tanga bandiw ma. Loon o loon, lakɔliden duuru kan, kelen ɲɔgɔn tɛ na klasi kɔnɔ.”—The New York Times.

Min yɛrɛ be mɔgɔ nina ban, o ye ko duniɲa kuru bɛɛ kɔnɔ, dɔ be farala fariyakow kan lakɔlisow kɔnɔ. Fɔlɔ la,  lakɔlidenw tun be kɛlɛ kɛ tuma kelen kelen le ani u tun be ɲɔgɔn ɲɔndi ɲɔndi dɔrɔn le. Nka sisan, u be kɛlɛ kɛ ni marifaw ni muruw lo ye. Marifa be lakɔliden minw fɛ, dɔ be farala u hakɛ kan. Fariyakow be juguyara ka taga sabu denmisɛnw ka teli ka fariyakow kɛ ani u b’o daminɛ kabi u fitinin tuma.

Tiɲɛn lo ko koow man jugu o cogo la jamanaw bɛɛ la. Nka, gwɛlɛya dɔw be kalanfa caaman kan duniɲa kuru bɛɛ kɔnɔ, i n’a fɔ minw kofɔra Faransi ka zurunali dɔ kɔnɔ. O zurunali be bɔ lɔgɔkun o lɔgɔkun ani a fɔra a kɔnɔ ko: “Mɔgɔw tɛ kalanfa bonya tugun, u t’a ka kuntigiya jati tugun.”—Le Point.

Mɔgɔw tɛ kuntigiya bonya minkɛ, o ye faratiba ye denmisɛnw ma. O kama, Jehova Seerew b’u deenw kalan u ka kolo u kuntigiw ye ani u k’u bonya. Lakɔlidenw fanba t’o kɛ bi.