SƐBƐ nin kuun tɛ ka Jehova Seerew ka lannakow bɛɛ ɲɛfɔ. Nka an lanin be sariyakolo minw na, an y’an jija k’olu dɔw lo ɲɛfɔ i ye. An y’an jija fana k’a yira ka gwɛ i ka lakɔliden dɔw somɔgɔw be nɔɔ min to u kan n’a y’a sɔrɔ u wolobaga dɔ wala u fila bɛɛ ye Jehova Seerew ye.

Koo minw kɔrɔtanin lo kosɔbɛ Jehova Seerew fɛ, u dɔ ye u deenw ka Alako ye sabu u lanin b’a la k’o be u deenw nafa koo wɛrɛw la. U ka lannakow ani u be sariyakolo minw sira tagama, olu b’u dɛmɛ ka kuun sɔrɔ u ka ɲɛnamaya la ani k’u ka loon o loon gwɛlɛyaw muɲu. O lannakow n’o sariyakolow b’u lasun fana u ka kɛ lakɔliden ɲumanw ye ani jamanaden ɲumanw ye u sii bɛɛ la.

Jehova Seerew b’u jija ka ɲɛnamaya koo jati k’a dama kɛɲɛ. O kama, lakɔlikalan kɔrɔtanin lo u fɛ kosɔbɛ. U b’a fɛ k’u seko bɛɛ kɛ k’i dɛmɛ i ka baara la. O la, u ka soow kɔnɔ ani u ka batolikɛyɔrɔw la duniɲa kuru bɛɛ la, u bena to k’u deenw jija u k’u sɔbɛ don walisa lakɔlikalan ka ɲɛ u bolo.