LƆNNIKƐLA dɔ be bɔ Peyiba ani a tɔgɔ ko Spinoza. A ko: “N’ ye n’ seko bɛɛ kɛ walisa n’ kana mɔgɔw lɔgɔbɔ, k’u jalaki wala k’u kɔniya u ka kɛtaw kosɔn. N’ ye n’ jija k’u faamu.” I ye kalanfa ye minkɛ, baaraba b’i bolo. I b’i jija k’i ka lakɔlidenw miiricogo, u ka koow cogoya ani u ka lannakow faamu. O lakɔliden dɔw bangebagaw ye Jehova Seerew ye. Tuma dɔw la, o lakɔlidenw be se k’a ɲini ka koow kɛ cogo wɛrɛ la min be dan na mɔgɔw fanba ka kokɛcogo la. Nka, n’a gwɛnin lo ko lakɔliden dɔ ka lannakow n’a ka delinanko ɲumanw lo b’a lasun k’o kɛ, a ka ɲi i k’i janto o la. Jehova Seerew lo ye sɛbɛ nin labɛn walisa kalanden minw ye Jehova Seerew ye, i ka se k’olu faamu ka ɲɛ. An jigi b’a la ko i bena wagati ta k’a kalan koɲuman.

Ka mɔgɔ ka lannakow faamu, o kɔrɔ tɛ ko i be sɔn u ma wala ko i b’u labato. Ka kunnafoniw di mɔgɔ ma i ka lannakow koo la, o kɔrɔ tɛ fana ko i b’a fɛ k’a kuun yɛlɛma. Sɛbɛ nin kuun tɛ ka ele ni lakɔliden tɔɔw waajibiya aw ka sɔn Jehova Seerew ka lannakow ma. Lakɔliden minw bangebagaw ye Jehova Seerew ye, an ka laɲinita ye k’i dɛmɛ i k’a lɔn olu bangebagaw y’u kalan sariyakolow ani lannako minw na. O la, i bena se k’o lakɔlidenw faamu ani k’u kalan koɲuman. Tiɲɛn lo ko bangebagaw b’u deenw kalan koo minw na, deenw t’o sira tagama tuma bɛɛ sabu deen kelen kelen bɛɛ lo b’a latigɛ a bena kɛ mɔgɔ sifa min ye.

I ko bangebagaw fanba, Jehova Seerew b’a fɛ u deenw ka nafa sɔrɔ bɛrɛbɛrɛ u ka lakɔlikalan na. O kama, u b’u deenw kalan ko u ka mɛnni kɛ u ka kalanfaw fɛ. A ka di Jehova Seerew n’u deenw ye fana ni kalanfaw b’u faamu ani ka bonya la u kan.

Jehova Seerew ye kerecɛnw ye ani u lɔnnin lo duniɲa kuru bɛɛ kɔnɔ. Nka tuma dɔw la, mɔgɔw t’u faamu. Denmisɛn minw ye Jehova Seerew ye ani u kalifara i ma, an jigi b’a la ko sɛbɛ nin bena i dɛmɛ i k’u faamu koɲuman. An jigi b’a la fana ko i bena a faamu fɛɛn min kama koo tigitigi dɔw la u bena a ɲini i fɛ i k’a to u be koow kɛ cogo wɛrɛ la.