1, 2. Mun na i be Jehova Ala kanu?

I BE Ala kanu wa? N’a sɔrɔ i b’a kanu fɔɔ i ye i yɛrɛkun di a ma. N’a sɔrɔ i b’a jati ko Ala lo ye i teri sɔbɛ ye. Nka sanni i yɛrɛ k’a daminɛ ka Jehova kanu, ale tun b’i kanu ka ban. Bibulu b’a fɔ ko: “Anw kɔni, kanuya b’an na, bari Ala le kɔnna k’an kanu.”—1 Zan 4:19.

² Miiri k’a filɛ Jehova y’a yira cogo caaman minw na ko a b’an kanu. A ye dugukolo di an ma k’o kɛ sigiyɔrɔ ɲuman ye an fɛ. An mako be fɛɛn o fɛɛn na ka ɲɛnamaya diyabɔ, a y’o di an ma fana (Matiyo 5:43-48; Yirali 4:11). A b’a fɛ an ka jɛnɲɔgɔnya ɲuman kɛ n’ale ye. O kama, a ye labɛn kɛ walisa an ka se k’ale lɔn. N’an be Bibulu kalan, a be komi an be mɛnni kɛra Jehova fɛ. N’an be delili kɛ, a b’an lamɛn (Zaburuw 65:3). A b’an ɲɛminɛ ani a be fanga di an ma a ka hakili senu barikaman sababu fɛ (Luka 11:13). A yɛrɛ y’a Dencɛ kanulen ci ka na dugukolo kan walisa k’an kisi jurumu ni saya ma.—Zan 3:16; Ɔrɔmukaw 5:8 kalan.

3. Teriya sɔbɛ min be an ni Jehova cɛ, an be se k’o mara cogo di?

 ³ Miiri k’a filɛ i teri sɔbɛ dɔ koo la: a kɛra n’i ye wagati diimanw ani wagati gwɛlɛw na. O teriya sɔbɛ ɲɔgɔn tɛ se ka to aw cɛ n’i ma jijaliba kɛ. O kelen lo fana n’i b’a fɛ ka teriya sɔbɛ diyabɔ ni Jehova ye. Jehova y’an teri sɔbɛ ye min ɲɔgɔn tɛ yen. Teriya min be an n’ale cɛ, o be se ka mɛɛn fɔɔ abada. O kama, Bibulu b’a fɔ an ye ko: “Aw ka to Ala ka kanuya la.” (Zude 21). An be se k’o kɛ cogo di? Bibulu b’a fɔ ko: “Ka Ala kanu, o ye nin de ye, ka a ka ci fɔlenw mara. A ka ci fɔlenw man gɛlɛn.”—1 Zan 5:3, ABM.

4, 5. I y’a daminɛ ka Jehova kanu cogo min na, o ɲɛfɔ.

⁴ “Ka Ala kanu,” ciden Zan tun b’a fɛ ka mun lo fɔ ten? I hakili b’a la cogo min na i y’a daminɛ ka Jehova kanu wa?

⁵ Tuma min na i y’a mɛn i siɲɛ fɔlɔ la ko Jehova b’a fɛ i ka ɲɛnamaya kɛ fɔɔ abada a ka duniɲa kura kɔnɔ, miiri k’a filɛ o koo ye min kɛ i la. Jehova ye labɛn minw bɛɛ kɛ o kama, i y’o faamu: a y’a Dencɛ ci ka na dugukolo kan. I y’a faamu k’o ye nilifɛn nafamanba yɛrɛ lo ye (Matiyo 20:28; Zan 8:29; Ɔrɔmukaw 5:12, 18). Komi i bɔra a kala ma ko Jehova b’i kanu kosɔbɛ, o ye i dusukun sɔrɔ ani i y’a daminɛ ka Ala kanu fana.—1 Zan 4:9, 10 kalan.

6. N’i be mɔgɔ dɔ kanu, o b’i lasun ka mun lo kɛ? Komi i be Ala kanu, o y’i lasun ka mun lo kɛ?

⁶ Nka, o tun ye koow daminɛ dɔrɔn lo ye. Ɲɛyirali fɛ, n’an be mɔgɔ dɔ kanu, an t’a fɔ an daa la dɔrɔn  ko: “I koo ka di n’ ye.” Kanuya b’an lasun k’a tigi diyanankow kɛ. O cogo kelen na, komi i be Jehova kanu, o y’i lasun ka ɲɛnamaya kɛ cogo dɔ la min ka di a ye. Komi o kanuya ye barika sɔrɔ, o y’i lasun k’i yɛrɛkun di Jehova ma ani ka batize. O cogo la, i ye i daa di Jehova ma ko i bena baara kɛ a ye fɔɔ abada (Ɔrɔmukaw 14:7, 8 kalan). I be se k’o layidu dafa cogo di?

7. N’an be Jehova kanu, o bena an lasun ka mun lo kɛ? Jehova ka cifɔlen dɔw fɔ.

⁷ Komi an be Jehova kanu, o kama an b’a “ka ci fɔlenw mara.” An b’o kɛ cogo di? An be mɛnni kɛ a fɛ. Jehova b’a fɛ an ka ɲɛnamaya kɛ cogo min na, Bibulu b’o yira an na. Ɲɛyirali fɛ, Jehova b’a fɔ an ye ko dɔlɔtɔya, sonyali ni ngalontigɛ man ɲi. Ka la ni mɔgɔ dɔ ye min tɛ an furuɲɔgɔn ye, ka fɛɛn wɛrɛ wala mɔgɔ wɛrɛ bato Jehova kɔ, o fana man ɲi.—1 Korɛntikaw 5:11; 6:18; 10:14; Efɛzikaw 4:28; Kɔlɔsikaw 3:9.

8, 9. Bibulu tɛ sariya tigitigi di koo minw na, an be se ka Jehova ka miiriya lɔn cogo di o koow la? Ɲɛyirali dɔ fɔ.

⁸ Nka, walisa k’an koo diya Jehova ye, a daan tɛ k’a ka cifɔlenw sira tagama dɔrɔn. Jehova t’an degun ni sariya caaman ye minw ɲɛsinna an ka ɲɛnamaya faan kelen kelen bɛɛ ma. O kama tuma dɔw la, koo dɔw be se k’an sɔrɔ ani Bibulu ka sariya tigitigi si tɛ kuma u koo la. O la, an be se ka desizɔn ɲumanw ta dogo di? (Efɛzikaw 5:17). Sariyakolo dɔw be sɔrɔ Bibulu kɔnɔ minw b’an dɛmɛ ka Jehova ka miiriya lɔn. N’u ko sariyakolo, o ye tiɲɛn jɔnjɔn  dɔ lo ye. N’an be Bibulu kalan, o b’an dɛmɛ k’a lɔn Jehova ye mɔgɔ sifa min ye: a be koow jati cogo min na, min ka di a ye ani min ka gwo a ye.—Zaburuw 97:10 kalan; Talenw 6:16-19; Kunnafoni wɛrɛw lajɛ, a fɔlɔ.

⁹ Ɲɛyirali fɛ, an be se ka min filɛ ani an man ɲi ka min filɛ telewisɔn wala ɛntɛrɛnɛti kan, an be se k’o lɔn cogo di? An ka ɲi ka min kɛ tigitigi, Jehova t’o fɔ an ye. Nka a ye sariyakolo minw di an ma, u b’an dɛmɛ ka desizɔn ɲumanw ta. Bi, fariyakow ni kakalayakow fanin lo ɲɛnagwɛko caaman na. Jehova b’a fɔ an ye Bibulu kɔnɔ ko “fariya ka di tigi min ye, o tigi koo man d’a ye.” A b’a fɔ fana ko a “bena ɲamɔgɔyakɛlaw ni kakalaw kiti.” (Zaburuw 11:5; Eburuw 13:4). O sariyakolow be se k’an dɛmɛ cogo di ka desizɔn ɲumanw ta? N’an b’a lɔn ko koo dɔ ka gwo Jehova ye wala ko a b’o jati kakalayako ye, an man kan k’o kɛ fewu.

10, 11. Mun na an be mɛnni kɛ Jehova fɛ?

¹⁰ Mun na an be mɛnni kɛ Jehova fɛ? A ma kɛ komi an be siranna ko a bena an ɲangi le. A fana ma kɛ komi an t’a fɛ ka kunko sɔrɔ an ka desizɔn jugu dɔw kosɔn (Galatikaw 6:7). An be mɛnni kɛ Jehova fɛ sabu an b’a kanu le. An b’a fɛ k’an sankolola Faa dusu diya i ko denmisɛnw b’a fɛ k’u faa dusu diya cogo min na. K’a lɔn ko an koo ka di Jehova ye, foyi tɛ mɔgɔ ninsɔndiya ka se o ma!—Zaburuw 5:13; Talenw 12:2; Kunnafoni wɛrɛw lajɛ, a 2nan.

¹¹ An tɛ mɛnni kɛ Jehova fɛ ni koow ka nɔgɔ dɔrɔn wala n’an bolomakotɛ. An fana t’a sugandi k’a  ka sariya dɔw sira tagama ani ka dɔ wɛrɛw to yen (Deteronɔmu 12:32). Nka, an be mɛnni kɛ a fɛ koo bɛɛ la i ko Zaburu sɛbɛbaga y’a kɛ cogo min na. Ale y’a fɔ ko: “E ka fɔta le ka di ne ye, ne b’i ka fɔta kanu.” (Zaburuw 119:47; Ɔrɔmukaw 6:17). An b’a fɛ ka kɛ i ko Nuhun: ale y’a yira ko a be Jehova kanu. Cogo di do? Jehova ye min fɔ a ye, a y’o bɛɛ kɛ. Bibulu b’a fɔ a koo la ko: “Ala ye min fɔ Nuhun ye, a y’o bɛɛ kɛ.” (Zɛnɛzi 6:22). I b’a fɛ Jehova k’o ɲɔgɔn fɔ i koo la wa?

12. An be se ka Jehova ninsɔndiya cogo di?

¹² N’an be mɛnni kɛ Jehova fɛ, o be mun lo kɛ a la? O b’a “nisɔndiya” (Talenw 11:20; 27:11). Miiri k’a filɛ! An be duniɲa kuru bɛɛ Danbaga ninsɔndiya n’an be mɛnni kɛ a fɛ. Nka a t’an waajibiya k’o kɛ fewu. A y’an dan ka see di an ma an ka koow latigɛ an yɛrɛ ma. O kɔrɔ ko see b’an ye k’a latigɛ ka koo ɲuman kɛ wala ka koo jugu kɛ. An be ni kanuya min ye Jehova koo la, a b’a fɛ o lo k’an lasun ka desizɔn ɲumanw ta walisa an ka se ka ɲɛnamaya diyabɔ a ɲɛɛ ma.—Deteronɔmu 30:15, 16, 19, 20; Kunnafoni wɛrɛw lajɛ, a 3nan.

13, 14. An b’a lɔn cogo di ko Ala ka sariyaw man gwɛlɛ kojugu? Ɲɛyirali dɔ fɔ.

¹³ Nka n’i b’a miiri ko Jehova ka sariyaw ka gwɛlɛ kojugu wala ko u bena i bali k’i diyanankow kɛ do? Bibulu b’a fɔ ka gwɛ ko: “A ka ci fɔlenw man gɛlɛn.” (1 Zan 5:3, ABM). Gɛrɛkikan kumaden min bayɛlɛmana ko “gɛlɛn”, o kɔrɔ ko “gwiliman.”  Vɛrise wɛrɛw kɔnɔ, o kumaden ɲɛsinna adamadenw ka sariya dɔw ma minw be mɔgɔ niin degun. A ɲɛsinna fana mɔgɔ dɔw ma minw b’a ɲini ka tɔɔw mara wala k’u niin tɔɔrɔ (Matiyo 23:4; Kɛwaliw 20:29, 30). Jehova ka sariyaw man ‘gwili,’ o kɔrɔ, a ka nɔgɔ k’u sira tagama. A be min ɲini an fɛ, o dama kɛɲɛnin lo tuma bɛɛ.

¹⁴ An ka ɲɛyirali dɔ lajɛ. Miiri k’a filɛ: I b’i teri sɔbɛ dɔ dɛmɛna ka yɛlɛma luu wɛrɛ kɔnɔ. A y’a ka minanw bɛɛ siri k’u don kɛsuw kɔnɔ. U dɔw man gwili. Nka dɔ wɛrɛw ka gwili ani mɔgɔ kelen dɔrɔn tɛ se u kɔrɔ. Kɛsu minw ka gwili kosɔbɛ, yala i teri ben’a ɲini i fɛ i k’olu dɔ ɲun i kelen dɔrɔn wa? Ayi dɛ! Mun na do? Sabu a t’a fɛ i ka mandimi. O cogo kelen na, Jehova tɛna koo si ɲini an fɛ min ka gwɛlɛ kojugu (Deteronɔmu 30:11-14). Jehova b’an seko daan lɔn. “An danna ni fɛɛn min ye, a b’o lɔn. A hakili b’a la ko an ye buguri ye.”—Zaburuw 103:14.

15. Mun na an lanin b’a la ko Jehova ka cikanw b’an nafa?

¹⁵ Musa y’a fɔ Israɛldenw ye ko Jehova y’a ka sariyaw di u ma walisa u “ka to hɛrɛ la waati bɛɛ.” U ‘ɲanaman tun bena to’ n’u y’o sariyaw labato (Deteronɔmu 5:28-33; 6:24). O kelen lo bi. Jehova be fɛɛn o fɛɛn ɲini an fɛ, o bena an ka ɲɛnamaya kɛcogo fisaya (Ezayi 48:17 kalan). Min ka fisa an ma, an Faa Jehova b’o lɔn tuma bɛɛ (Ɔrɔmukaw 11:33). Bibulu b’a fɔ an ye ko: “ N’i ko Ala, i ko kanuya le.” (1 Zan 4:8). O kɔrɔ ko Jehova be koo o koo fɔ ani a be koo o koo kɛ, kanuya lo b’a lasun o la.

16. An ye jurumutɔw ye ani duniɲa nin ka jugu. Nka, an b’a lɔn cogo di ko an be se ka mɛnni kɛ Ala fɛ?

 ¹⁶ A man nɔgɔ ka mɛnni kɛ Ala fɛ tuma bɛɛ. Duniɲa juguman nin be Sitanɛ fanga kɔrɔ. A b’a ɲini ka mɔgɔw lasun u ka koo jugu kɛ (1 Zan 5:19). An ka kan fana ka bondori kɛ n’an farisogo jurumutɔ ye. Mun na do? Sabu an ka miiriyaw n’an dusukunnakow be se k’an lasun ka Ala ka sariyaw tiɲɛ (Ɔrɔmukaw 7:21-25). Nka komi an be Jehova kanu, o be fanga di an ma ka koo ɲuman kɛ. An be jijali min kɛ ka mɛnni kɛ a fɛ, a b’o kɔrɔsi. Ani, a b’a ka hakili senu barikaman di an ma walisa k’an dɛmɛ (1 Samuyɛli 15:22, 23; Kɛwaliw 5:32). Hakili senu b’an dɛmɛ ka kɛ ni jogo dɔw ye. O b’a to a ka nɔgɔ an ma ka mɛnni kɛ Ala fɛ.—Galatikaw 5:22, 23.

17, 18. a) An bena mun lo lajɛ gafe nin kɔnɔ? b) An bena mun lo ye kalansen nata la?

¹⁷ Gafe nin ben’a yira an ka ɲi ka ɲɛnamaya kɛ cogo min na walisa k’an koo diya Jehova ye. An ben’a ye an be se ka Ala ka sariyakolow sira tagama cogo min na. A to i hakili la ko Jehova t’an waajibiya abada ka mɛnni kɛ a fɛ. N’an y’a latigɛ ka mɛnni kɛ a fɛ, an ka ɲɛnamaya kɛcogo bena fisaya ani an bena siniɲasigi ɲuman sɔrɔ. Min yɛrɛ kɔrɔtanin lo, o ye ko an bena a yira Ala la ko an b’a kanu kosɔbɛ.—Kunnafoni wɛrɛw lajɛ, a 4nan.

¹⁸ Walisa k’an dɛmɛ ka koo ɲuman ni koo jugu faranfasi, Jehova ye an kelen kelen bɛɛ dan ni dusukun ye. N’an y’an dusukun kolo, a be se k’an dɛmɛ “ka a ka ci fɔlenw mara.” An kaan be dusukun min ma, o ye mun lo ye? An be se k’a kolo cogo di? An k’o lajɛ.