Aw minw be Jehova Ala kanu ani a ka Kuma, Bibulu, ka di aw ye:

Yezu y’a fɔ ko: “Aw bena tiɲɛ lɔn, o tiɲɛ le bena aw kɛ hɔrɔnw ye.” (Zan 8:32). I siɲɛ fɔlɔ ye tiɲɛn lɔn Bibulu koo la tuma min na, miiri k’a filɛ o koo ye min kɛ i la! I ɲagalila k’a lɔn ko hali ni duniɲa nin fanin lo ngalonkow la, mɔgɔ be se ka tiɲɛn lɔn.—2 Timote 3:1.

Jehova Ala b’a fɛ an ka tiɲɛn lɔn. An be mɔgɔw kanu minkɛ, an b’a fɛ k’u dɛmɛ ka tiɲɛn lɔn. Nka, o dama tɛ bɔri kɛ n’an b’a fɛ ka Ala sago kɛ. An ka ɲi k’an seko bɛɛ kɛ ka kerecɛnya sira tagama sabu Jehova ka sariyakolow koo ka di an ye kosɔbɛ. An be se k’a yira cogo jɔnjɔn min na ko an be Ala kanu, Yezu y’o ɲɛfɔ an ye. A y’a fɔ ko: “N’aw be ne ka ciiw bato, aw fana be to ne ka kanuya la, i n’a fɔ ne be n Faa ka ciiw bato cogo min na ka to a ka kanuya la.”—Zan 15:10.

Yezu b’a Faa kanu kosɔbɛ. Ani, a mana min o min ɲini a fɛ, a b’o kɛ. N’an be Yezu ladegi an ka ɲɛnamaya kɛcogo la, an koo bena diya Jehova ye ani an bena kɛ hɛɛrɛ la sɔbɛ la. I ko Yezu y’a fɔ cogo min na, “sisan aw y’o koo lɔn, n’aw y’o koo nin kɛ, aw dagamuna.”—Zan 13:17.

Tiɲɛnkalan lo be sɔrɔ Bibulu kɔnɔ. An jigi b’a la ko gafe nin bena i dɛmɛ i ka se k’o tiɲɛnkalan sira tagama ani ka kɛ Ala teri ye. I be ni kanuya min ye Ala koo la, an be Jehova deli a k’i dɛmɛ o barika ka bonya ani i ka “to Ala ka kanuya la, . . . ka [ɲɛnamaya] banbali kɔnɔ.”—Zude 21.