1-3. a) Mɔgɔ caaman b’u ka baara jati cogo di? b) An bena ɲiningali jumanw lo jaabi kalansen nin na?

DUNIƝA kuru bɛɛ la, mɔgɔw be baaraba kɛ walisa k’u yɛrɛ n’u ka denbaya balo. Mɔgɔ caaman ka baara man di u ye ani dɔw yɛrɛ be siran ka taga baara la loon o loon. N’i fana b’i ka baara jati o cogo lo la, i be se ka mun lo kɛ walisa i ka baara ka diya i ye kosɔbɛ? I be se ka ninsɔndiya sɔrɔ i ka baara la cogo di?

² Jehova ko: “Ni mɔgɔ o mɔgɔ be dumuni kɛ, ka minni kɛ, ka nisɔndiya a ka baara bɛɛ la, o ye Ala ka dɛmɛ ye.” (Waajulikɛla 3:13). Jehova y’an dan ka baara nege don an na. A b’a fɛ an ka ninsɔndiya sɔrɔ an ka baara la.—Waajulikɛla 2:24; 5:17 kalan.

³ O la, mun lo be se k’a to an ka baara be diya an ye? Kerecɛnw man ɲi ka baara sifa jumanw lo kɛ? An be se ka mun lo kɛ walisa an ka baloɲini baara kana an ka Alakow nagasi? An be se ka baara juman lo kɛ min kɔrɔtanin lo ka tɛmɛ baara bɛɛ kan?

4, 5. Jehova be baara koo jati cogo di?

⁴ Baara ka di Jehova ye. Zɛnɛzi 1:1 b’a fɔ ko:  “Ala y’a ka danni daminɛ tuma min na, a kɔnna ka sankolo ni dugukolo le dan.” Ala ye dugukolo n’a kɔnɔnafɛnw bɛɛ dan ka ban tuma min na, a y’a fɔ “k’o ɲɛna kosɔbɛ.” (Zɛnɛzi 1:31). An Danbaga Jehova ye fɛɛn minw bɛɛ dan, o diyara a ye.—1 Timote 1:11, NW.

⁵ Jehova ma baara kɛli dabila fewu! Yezu y’a fɔ ko: “N Faa be baara la halibi.” (Zan 5:17). Jehova be fɛɛn ɲuman minw kɛra, hali n’an t’u bɛɛ lɔn, an kɔni b’u dɔw lɔn. Mɔgɔ minw bena masaya kɛ ni Yezu Krista ye sankolo la, Jehova b’olu sugandira (2 Korɛntikaw 5:17). Jehova be koo caaman kɛ ka adamadenw ɲɛminɛ fana ani k’a janto u la. Waajuli baara be kɛra duniɲa kuru bɛɛ kɔnɔ. O kɛra sababu ye mɔgɔ miliyɔn caaman ye lɔnniya sɔrɔ Jehova koo la ani u jigi b’a la ka ɲɛnamaya kɛ fɔɔ abada alijɛnɛ kɔnɔ dugukolo kan.—Zan 6:44; Ɔrɔmukaw 6:23.

6, 7. Yezu tun ye baarakɛla sifa juman lo ye?

⁶ I ko a Faa Jehova, baara ka di Yezu fana ye. Sanni Yezu ka na dugukolo kan, a tun be Ala ka “baaraɲamɔgɔya” la. A ye baara kɛ ni Jehova ye ka sankololafɛnw ni dugukolokanfɛnw bɛɛ dan (Talenw 8:22-31; Kɔlɔsikaw 1:15-17). K’a to dugukolo kan, Yezu tora ka baara kɛ kosɔbɛ! A kanbele tuma na, a tun ye miniziye ŋana ye. N’a sɔrɔ a tun be minanw dilan, ani ka boonw lɔ. Yezu tun be se a ka baara la koɲuman fɔɔ u tun b’a weele ko “miniziye.”—Mariki 6:3.

⁷ Nka baara min tun kɔrɔtanin lo Yezu fɛ ka tɛmɛ baara bɛɛ kan, o tun ye ka kibaro diiman fɔ ani ka  mɔgɔw kalan Jehova koo la. A tun ka ɲi k’o baara kɛ k’a dafa saan saba ni kalo wɔɔrɔ kɔnɔ. A tun be wuli sɔgɔmada joona k’o baara kɛ fɔɔ ka taga suu ko (Luka 21:37, 38; Zan 3:2). Yezu tun be kilomɛtɛrɛ caaman kɛ tagama na sira wulenw kan ka kibaro diiman fɔ mɔgɔ caamanba ye.—Luka 8:1.

8, 9. Mun na Yezu ka baara tun ka di a ye?

⁸ Ka Ala ka baara kɛ, o tun be komi dumuni Yezu fɛ. O baara tun be barika don a la ani ka fanga di a ma. Loon dɔw la, Yezu tun be baara kɛ fɔɔ a yɛrɛ tun tɛ wagati sɔrɔ ka dumuni kɛ (Zan 4:31-38). A tun be tɛmɛ sababu bɛɛ fɛ ka mɔgɔw dɛmɛ u k’a Faa lɔn. O lo y’a to a sera k’a fɔ Jehova ye ko: “Ne y’i boɲa ka ban dugukolo kan, i tun ye baara minw di ne ma, ne y’olu bɛɛ kɛ ka ban.”—Zan 17:4.

⁹ Tiɲɛn na, Jehova ni Yezu be baara kɛ kosɔbɛ. U ka baara b’u ninsɔndiya ani k’u wasa. An b’a fɛ ka “Ala ladege” ani ka Yezu seen “nɔɔ ta” (Efɛzikaw 5:1; 1 Piyɛri 2:21). O kama an be baara kɛ kosɔbɛ ani n’an be fɛɛn o fɛɛn kɛ, an b’an sɔbɛ don o la.

10, 11. Mun lo be se k’an dɛmɛ ka kɛ ni miiriya ɲuman ye an ka baara koo la?

¹⁰ An minw ye Jehova sagokɛlaw ye, an b’an jija ka baara kɛ walisa k’an yɛrɛ, ani an ka denbaya balo. An b’a fɛ an ka baara ka diya an ye. Nka, o be se ka gwɛlɛya an ma. O la, an be se ka mun lo kɛ n’an ka baara man di an ye?

¹¹ Koow filɛ ni ɲɛɛ ɲuman ye. An be baara min  kɛ, wala an be wagati min kɛ baara la, n’a sɔrɔ an tɛ se k’o yɛlɛma. Nka an kɔni be se k’an ka miiriya yɛlɛma. N’an b’a faamu Jehova be min ɲini an fɛ, o be se k’an dɛmɛ. Ɲɛyirali fɛ, Jehova b’a ɲini gwatigiw fɛ u k’u seko bɛɛ kɛ k’u ka denbaya mako wasa. Tiɲɛn na, mɔgɔ min t’a janto a somɔgɔw la, Bibulu b’a fɔ ko “mɔgɔ min ma la Ala la, ale yɛrɛ ka fisa n’a ye.” (1 Timote 5:8). N’i ye gwatigi ye, o kɔrɔ ko i b’i jija ka baara kɛ k’i ka denbaya mako wasa. I ka baara ka di i ye wo, a man di i ye wo, i b’a lɔn ko a b’i dɛmɛ k’i ka denbaya mako wasa ani o lo ka di Jehova ye.

12. N’an b’an jija ka baara kɛ ni kɔnɔgwɛ ye, o b’an nafa cogo di?

¹² I jija i ka baara la ani i kɔnɔ gwɛ k’a kɛ. O be se k’a to i ka baara be diya i ye (Talenw 12:24; 22:29). O la, i ka patɔrɔn bena se ka la i la. Baaraden minw ye hɔɔrɔnw ye, olu lo ka di patɔrɔnw ye sabu u tɛ wari ni minɛw soɲɛ ani u tɛ baarakɛ wagati ta ka koo wɛrɛ kɛ (Efɛzikaw 4:28). Min yɛrɛ kɔrɔtanin lo, o ye ko n’i b’i jija baara la ani n’i b’i kɔnɔ gwɛ k’o kɛ, Jehova b’o lɔn. I be se ka kɛ ni dusukun ɲuman ye sabu i b’a lɔn ko i be Ala min kanu, i b’a ninsɔndiyara.—Eburuw 13:18; Kɔlɔsikaw 3:22-24.

13. N’an ye mɔgɔ hɔɔrɔn ye baara la, nafa wɛrɛ juman lo b’o la?

¹³ A lɔn ko n’i ka kɛwalew ka ɲi baarakɛyɔrɔ la, o be se ka nɔɔrɔ la Jehova kan. O fana be se k’a to i ka baara koo be diya i ye (Titi 2:9, 10). N’a sɔrɔ i ka baarakɛɲɔgɔn dɔ yɛrɛ bena a ɲini ka bibulukalan kɛ i ka ɲɛyirali ɲuman kosɔn.—Talenw 27:11; 1 Piyɛri 2:12 kalan.

14-16. N’an b’a fɛ ka sɔn baara dɔ la, an ka ɲi ka miiri mun lo la fɔlɔ?

¹⁴ Bibulu t’a fɔ k’a pereperelatigɛ kerecɛn be se ka baara sifa minw bɛɛ kɛ wala a tɛ se ka baara sifa minw bɛɛ kɛ. Nka Bibulu ka sariyakolo dɔw be se k’an dɛmɛ ka desizɔn ɲumanw ta baara koo la (Talenw 2:6). An be se ka basigi Bibulu ka sariyakolow kan k’an yɛrɛ ɲininga ko:

¹⁵ O baara ben’a to n’ be koo dɔ kɛ min man di Jehova ye wa? An y’a ye ko Jehova be koo dɔw  kɔniya i n’a fɔ soɲɛni, ani ngalontigɛ (Ɛkizɔdi 20:4; Kɛwaliw 15:29; Efɛzikaw 4:28; Yirali 21:8). O kama, ni baara dɔ b’a ka sariyakolow kɛlɛ, an ka ɲi ka ban o la.—1 Zan 5:3 kalan.

¹⁶ Yala o baara ben’a to n’ be dɛmɛ don koo dɔ la min ka gwo Jehova ye wa? Ɲɛyirali fɛ, an b’a lɔn ko sekeretɛri baara tɛ koo jugu ye. Nka, ni kerecɛn dɔ b’o baara kɛra loteri boon na do? Tiɲɛn lo k’o baara t’a to a be loteri tikew feere. Nka, yala o baara sen fɛ a tɛ mɔgɔw lasunna ka loteri zuwe wa? O koo do man di Ala ye.—Efɛzikaw 5:3-5.

17. Mun lo be se k’an dɛmɛ ka desizɔnw ta minw ka di Ala ye?

¹⁷ N’an be Bibulu ka sariyakolow sira tagama, an bena kɛ i n’a fɔ mɔgɔ minw kofɔra Eburuw 5:14 na. O vɛrise ko: “U delila o la minkɛ, u ye hakili sɔrɔ ka ɲumaman ni juguman lɔn ka bɔ ɲɔgɔn na.” I yɛrɛ ɲininga ko: “Ni n’ sɔnna baara nin na, o bena tɔɔw kunnatiɲɛ wa? Yala o baara bena a to n’ be n’ furuɲɔgɔn ni n’ deenw to yen ka taga jamana wɛrɛ la wa? O bena mun lo kɛ u la?”

18. Mun na a man nɔgɔ ka Ala batoliko kɛ an ɲɛnako fɔlɔ ye?

¹⁸ Laban loon nunu ka gwɛlɛ kosɔbɛ (2 Timote 3:1). O kama, a be se ka gwɛlɛya an ma ka Jehova batoliko kɛ an ɲɛnako fɔlɔ ye. A man nɔgɔ hali dɔɔni ka baara sɔrɔ ani k’o mara. Tiɲɛn lo ko an ka kan k’an ka denbaya ladon. Nka, an b’a lɔn ko Jehova batoliko lo ka ɲi ka kɛ an ɲɛnako fɔlɔ ye. An man kan k’a to bololafɛnw koo k’an kuun bɛɛ ta (1 Timote 6:9, 10). O la do, “fɛɛn minw kɔrɔtanin  lo kosɔbɛ,” an be se k’olu faranfasi k’u lɔn cogo di ani k’an ka denbaya ladon o wagati kelen na?—Filipikaw 1:10, NW.

19. N’an b’an jigi la Jehova kan, o b’an dɛmɛ cogo di ka baara koo jati k’a dama kɛɲɛ?

¹⁹ I jigi bɛɛ la Jehova kan (Talenw 3:5, 6 kalan). An mako be min na tigitigi, an b’a lɔn ko Ala b’o kala ma ani ko a b’a janto an na kosɔbɛ (Zaburuw 37:25; 1 Piyɛri 5:7). A b’a fɔ an ye ko: “Wari ɲiniko kana fiɲɛ don aw si tagamacogo la. Min b’aw bolo, o k’aw wasa. Bari Matigi yɛrɛ le ko: ‘Ne tena i to i kelen, n tena i bila abada.’ ” (Eburuw 13:5). Jehova t’a fɛ an ka hami tuma bɛɛ an ka denbaya balo koo la. A y’a yira siɲɛ caaman na ko a be se k’a sagokɛlaw mako wasa (Matiyo 6:25-32). An ka baara koo mana kɛ cogo o cogo, an be Bibulu kalan, ka waajuli kɛ ani ka taga lajɛnw na tuma bɛɛ.—Matiyo 24:14; Eburuw 10:24, 25.

20. An be se k’an ka ɲɛnamaya kɛcogo nɔgɔya cogo di?

²⁰ Kana i ɲɛji caya (Matiyo 6:22, 23 kalan). O kɔrɔ ko k’i ka ɲɛnamaya kɛcogo nɔgɔya walisa ka se ka Jehova ka baara kɛ bɛrɛbɛrɛ. Fɛɛn dɔw be se ka an ni Jehova ka teriya nagasi, i n’a fɔ: wari, fɛɛn minw be sanga la, ani k’a ɲini ka duniɲa diyabɔ a ɲɛɛ ma. Hakilintanyako lo k’a to o fɛɛnw k’o teriya nagasi. O kama, mun lo bena an dɛmɛ ka koo kɔrɔtaninw kɛ an ɲɛnako fɔlɔ ye? An k’an seko kɛ walisa an kana juru ta. Ni juru b’i kan ka ban, labɛn kɛ walisa k’a sara ka bɔ i kun wala k’a sara dɔɔni dɔɔni. N’an m’an janto, bololafɛnw koo be se k’an ka wagati caaman ta ani k’an sɛgɛn kosɔbɛ. O yɛrɛ be se k’a  to an tɛ wagati sɔrɔ ka delili kɛ, ka kalan kɛ, wala ka waajuli kɛ. Sanni an k’a to bololafɛnw koo k’an degun, an k’a to an makoyafɛn jɔnjɔnw k’an wasa, i n’a fɔ “daladumuni” ni “fani” (1 Timote 6:8). An ka koow cogoya mana kɛ min o min ye, a ka ɲi an ka miiri tuma dɔw la k’a filɛ an be se ka baara kɛ Jehova ye bɛrɛbɛrɛ cogo min na.

21. Mun na an ka ɲi k’a latigɛ fɛɛn min ye an ɲɛnako fɔlɔ ye?

²¹ Alakow kɛ i ɲɛnako fɔlɔ ye. An ka ɲi ka baara kɛ hakilitigiya la n’an ka wagati, an ka fanga ani an  bololafɛnw ye. Kalanbabaw ni nafolo kɔrɔtanin tɛ ka se Alakow ma. N’an m’an janto, o fɛɛnw be se k’an ka wagati fanba ta. Yezu y’a fɔ ko: “Aw ka Ala ka masaya . . . ɲini fɔlɔ.” (Matiyo 6:33). An ka desizɔnw, an delinankow, an ka loon o loon baaraw ani an ka laɲinitaw b’a yira min y’an ɲɛnako fɔlɔ ye.

22, 23. a) Kerecɛnw fɛ, baara juman lo kɔrɔtanin lo ka tɛmɛ baara bɛɛ kan? b) Mun lo bena an dɛmɛ ka ninsɔndiya sɔrɔ an ka baara la?

²² Ka baara kɛ Jehova ye ani ka kibaro diiman fɔ, o lo kɔrɔtanin lo ka tɛmɛ baara bɛɛ kan (Matiyo 24:14; 28:19, 20). I ko Yezu, an ka ɲi k’an seko bɛɛ kɛ o baara la. Dɔw tagara sigi yɔrɔ min na weleweledalaw man ca walisa ka dɛmɛ don waajuli baara la. Dɔw fana be kaan wɛrɛ degira walisa ka se ka kibaro diiman fɔ mɔgɔ wɛrɛw ye o kaan na. Minw y’o koo ɲɔgɔn kɛ, baro kɛ n’u ye o koo la. U ben’a fɔ i ye k’u ninsɔndiyara kosɔbɛ ani k’u ye kuun sɔrɔ u ka ɲɛnamaya la.—Talenw 10:22 kalan, ABM.

²³ Bi, mɔgɔ caaman ka kan ka lɛri caaman kɛ baara la wala ka baara caaman yɛrɛ kɛ walisa ka se k’u ka denbaya mako wasa. Jehova b’o lɔn ani an be jijali min kɛra ka se k’an janto an ka denbaya la, o ka di a ye. O kama, an bɛɛ ka to ka Jehova ni Yezu ladegi: an ka baara mana kɛ min o min ye, an k’an jija o la. An k’a to an hakili la fana ko baara min kɔrɔtanin lo ka tɛmɛ baara bɛɛ kan, o ye ka baara kɛ Jehova ye ani ka Ala ka Masaya kibaro diiman fɔ. O lo bena an ninsɔndiya sɔbɛ la.