1. Yezu ye suu laban min kɛ dugukolo kan, k’a to adamaden cogoya la, a ye mun lo fɔ ka gwɛlɛya?

YEZU ye suu laban min kɛ dugukolo kan, k’a to adamaden cogoya la, a y’a yira ko a be jɔrɔ kosɔbɛ a ka kalandenw ka sini hɛɛrɛ koo la. A yɛrɛ y’a Faa deli u kosɔn ko: “Ne te i daali ko i k’u ta ka bɔ diɲɛ na, nga i k’u tanga juguman ma. U tɛ diɲɛ mɔgɔw ye i n’a fɔ ne fana te diɲɛ mɔgɔ ye cogo min na.” (Zan 17:15, 16). O deliliba b’a yira ko Yezu b’a ka kalandenw kanu kosɔbɛ. A b’a yira fana ko Yezu kɔnna ka kuma minw fɔ u dɔw ye o suu kelen na, u barika ka bon. A tun y’a fɔ u ye ko: “Aw te diɲɛ ta ye.” (Zan 15:19). Tiɲɛn na, Yezu tun b’a fɛ sɔbɛ la a ka kalandenw k’u mabɔ duniɲa na!

2. Yezu tun kaan be “diɲɛ” juman lo ma?

² Yezu tun kaan be “diɲɛ” min ma, o ye adamadenw ye minw bɛɛ y’u mabɔ Ala la ani u kɛra Sutana ka jɔɔnw ye. Hasiriya ni kuncɛbaya miiriya min be Sutana la, o lo be olu fana kɔnɔ (Zan 14:30; Efɛzikaw 2:2; 1 Zan 5:19). Tiɲɛn na, mɔgɔ min b’o ‘diɲɛ koo diya a yɛrɛ ye, o tigi ni Ala te bɛn.’ (Zaki 4:4). O la do, mɔgɔ minw bɛɛ b’a fɛ ka to Ala ka kanuya la, cogo di u be se ka to duniɲa kɔnɔ ani k’u mabɔ a la? An bena o kɛcogo duuru lajɛ: 1) ka kantigiya kɛ Ala ka Masaya ye Krista be min kun na ani k’an seen bɔ duniɲa ka politikikow la, 2) k’an yɛrɛ tanga duniɲa ka hakili ma, 3) ka fani bɛnninw don, 4) k’an ɲɛɛ jɔlen to koo kelen kan, ani 5) ka hakili senu ka kɛlɛkɛminanw ta.

3. a) Mun na Yezu ma sɔn k’a seen don politikikow la a ka wagati la? b) Mun na a be se ka fɔ ko Yezu ka kalanden mɔlenw ye lasigidenw ye? (Jukɔrɔla kunnafoni lajɛ fana.)

³ Yezu m’a seen don politikikow la a ka wagati la, nka a y’a cɛsiri ka waajuli kɛ Ala ka Masaya koo la. Ale lo tun bena kɛ o sankolola gofɛrɛnɛman nata Kuntigi ye (Daniyɛli 7:13, 14; Luka 4:43; 17:20, 21). O lo y’a to a sera k’a fɔ Ɔrɔmu ka gofɛrɛnɛrɛ Pɔnsi Pilati ɲɛɛ na ko: “Ne ka masaya te diɲɛ nin ta ye.” (Zan 18:36). A ka kalanden kantigimanw b’o ɲɔgɔn lo kɛ. U be kantigiya kɛ Krista n’a ka Masaya ye ani u b’o Masaya kofɔ duniɲa kɔnɔ (Matiyo 24:14, ABM). Ciden Pol y’a sɛbɛ ko: “An kɛra Krista ka lasigidenw ye. . . An b’aw daali Krista tɔgɔ kosɔn, ko aw ka sɔn ka bɛn ni Ala ye.” *—2 Korɛntikaw 5:20.

4. Kerecɛn sɔbɛw bɛɛ y’a yira cogo di k’u be kantigiya kɛ Ala ka Masaya ye? ( Ɲɛɛ 52 ka koorilen lajɛ.)

⁴ Lasigidenw ye mɔgɔw ye masa dɔ wala jamana dɔ ye minw sigi jamana wɛrɛw la u yɛrɛ tɔgɔ la. Komi u ye lonanw ye, u t’u seen don o jamanaw ka koow la. Nka, u ye gofɛrɛnɛman min ka lasigidenw ye, u b’o gofɛrɛnɛman lo ka nafa ɲini. O kelen lo ni Krista ka kalanden mɔlenw ye sabu u “faso be sankolo la.” (Filipikaw 3:20). U ka kisɛya kosɔn Masaya waajuli baara la, u sera ka Krista ka “saga dɔ wɛrɛw” miliyɔn caaman dɛmɛ u ka “bɛn ni Ala ye.” (Zan 10:16; Matiyo 25:31-40). O “saga dɔ wɛrɛw” be i ko Krista ka ciradenw, u be Yezu ka balima mɔlenw dɛmɛ u ka baara la. O jɛnkulu fila ye sagakulu kelen ye min be Masiya ka Masayakow yiriwa ani u b’u seen bɔ pewu duniɲa ka politikikow la.—Ezayi 2:2-4.

5. Faranfasi juman be yen kerecɛn kafo ni Israɛl siya cɛ, ani kerecɛnw b’o faranfasi yira cogo di?

 ⁵ Kerecɛn sɔbɛw be kantigiya min kɛ Krista ye, o dɔrɔn t’a to u b’u seen bɔ duniɲa ka politikikow la. An tɛ i n’a fɔ Israɛl siya, Ala tun ye jamana tigitigi dɔ di o min  ma a dan na galen. Nka an ye balimaya kelen ye min mɔgɔw jɛnsɛnnin be jamana caaman kɔnɔ (Matiyo 28:19; 1 Piyɛri 2:9). O kama, n’an seen tun be an ka jamanaw ka politikikow la, mɔgɔw tun tɛna an jati mɔgɔ sɔbɛw ye n’an be kumana Masaya koo la. Kelenya min be yen kerecɛnya jɛnkulu kɔnɔ, o tun bena kɛ faratiba la fana (1 Korɛntikaw 1:10). Ka fara o kan, ni kɛlɛ wulila, an n’an balimaw tun bena ɲɔgɔn kɛlɛ k’a sɔrɔ a fɔra an ye ko an k’u kanu (Zan 13:34, 35; 1 Zan 3:10-12). O kama, joo tun be Yezu fɛ k’a fɔ ko a ka kalandenw k’u ka kɛlɛkɛmuru don a nɔɔ na. A yɛrɛ y’a fɔ ko u k’u juguw kanu.—Matiyo 5:44; 26:52 ; Koorilen nin lajɛ gafe  ɲɛɛ 55 kan : “Yala ne be ban faso kanuyakow la wa?”

6. Komi i ye i yɛrɛkun di Ala lo ma, o kosɔn i ka kan ka faamanw jati cogo di?

⁶ An ye kerecɛn sɔbɛw ye, an y’an yɛrɛkun di Ala lo ma. An m’an yɛrɛkun di adamaden si, jamana si wala adamadenw ka jɛnkulu si ma. An b’a kalan 1 Korɛntikaw 6:19, 20 kɔnɔ ko ‘aw te aw yɛrɛ ta ye tugu, Ala le y’aw kunmabɔ.’ O kama, fɛɛn min ye faamanw ta ye, i n’a fɔ bonya, lanpo ani kololi ka kɛɲɛ ni Ala ka sariya ye, Yezu ka kalandenw kɛtɔ k’o di u ma, u be “Ala ta di Ala ma” fana (Mariki 12:17; Ɔrɔmukaw 13:1-7). Ala ka fɛɛn dɔw ye: ka Ala bato, k’a kanu n’i dusukun bɛɛ ye, ani ka mɛnni kɛ a fɛ ni kantigiya ye. Hali n’u ka kan ka sa o kosɔn, u labɛnnin lo k’o kɛ.—Luka 4:8; 10:27; Kɛwaliw 5:29; Ɔrɔmukaw 14:8.

7, 8. Duniɲa ka hakili ye mun lo ye, ani a be “baara kɛ” cogo di mɔgɔ kɔnɔ?

⁷ Kerecɛnw b’u mabɔ duniɲa na cogoya wɛrɛ la: u b’u yɛrɛ tanga duniɲa ka hakili jugu ma. Ciden Pol y’a sɛbɛ ko: “An kɔni, an ye hakili min sɔrɔ, o te diɲɛ ta ye, nga an ye Ala ka Nii lo sɔrɔ.” (1 Korɛntikaw 2:12). A y’a fɔ Efɛzikaw ye ko: “Aw tun bɛ taama olu la fɔlɔ ka nin diɲɛ  cogo ta ka kɛɲɛ ni fiɲɛ fanga kuntigi cogo ye, o ni min bɛ baara kɛ kan bilali denw kɔnɔ.”—Efɛzikaw 2:2, 3, ABM.

⁸ Duniɲa ka “fiɲɛ,” o kɔrɔ duniɲa ka hakili, ye fanga ye min be mɔgɔ lasun a ka muruti Ala ma. A fana be “farisogo nigɛlakow, ɲadenw ka miyɛntɔya” don mɔgɔ la (1 Zan 2:16; 1 Timote 6:9, 10). O hakili be “fanga” digi mɔgɔ kan sabu a be mɔgɔ farisogo jurumutɔ nɛgɛ dɔɔni dɔɔni, i tɛ bɔ a kala ma joona. A be yen tuma bɛɛ ani yɔrɔ bɛɛ la i n’a fɔ fiɲɛ min b’an lamini. Ka fara o kan, a be “baara kɛ” mɔgɔw kɔnɔ dɔɔni dɔɔni ka sɔɔn dɔw don u la minw man di Ala ye i n’a fɔ hasiriya, kuncɛbaya, natabaya ani yɛrɛta miiriya ni murutili hakili. * K’a fɔ ka surunya, duniɲa ka hakili b’a to Sutana ka sɔɔnw be yɛlɛma dɔɔni dɔɔni mɔgɔ kɔnɔ.—Zan 8:44; Kɛwaliw 13:10; 1 Zan 3:8, 10.

9. Duniɲa ka hakili be se ka don ani ka sigiyɔrɔ sɔrɔ an hakili n’an dusukun na cogo di?

⁹ Yala duniɲa ka hakili be se ka don ani ka sigiyɔrɔ sɔrɔ i hakili n’i dusukun na wa? Ɔnhɔn a be se, nka fɔɔ n’i y’a to a ka don. Cogo di do? N’i tɛ i janto i yɛrɛ la (Talenw 4:23, ABM). Tuma caaman na, a b’a daminɛ ka don mɔgɔ la dɔɔni dɔɔni a ɲina ma. O be se ka kɛ a gɛrɛfɛ mɔgɔ dɔw sababu fɛ minw be i ko mɔgɔ ɲumanw lo, k’a sɔrɔ u tɛ Jehova kanu (Talenw 13:20; 1 Korɛntikaw 15:33). A be se ka yɛlɛma i la fana fɛɛn nunu fɛ: gafe minw be mɔgɔ sɔɔn tiɲɛ, porno ani murutili kalan minw be sɔrɔ ɛntɛrɛnɛti kan, ɲɛnagwɛko nɔgɔninw wala farikoloɲanagwɛ minw be kɛ ni ɲɔgɔndan hakili jugu ye. Tiɲɛn na, mɔgɔ o mɔgɔ wala fɛɛn o fɛɛn be ni Sutana n’a ka duniɲa ka miiriya ye, o be se k’o hakili jugu nin yɛlɛma i la.

10. An be se k’an yɛrɛ tanga duniɲa ka hakili ma cogo di?

 ¹⁰ Duniɲa ka hakili be yɛlɛma mɔgɔ la dɔɔni dɔɔni a ɲina ma. An be se k’an yɛrɛ tanga a ma cogo di ani ka to Ala ka kanuya la? Fɔɔ an k’a ɲini ka nafa bɛrɛbɛrɛ sɔrɔ Alako labɛnw na, Jehova ye minw latigɛ, ani an ka hakili senu deli a fɛ tuma bɛɛ. Jehova fanga ka bon ni Sutana n’a ka duniɲa ta ye fɔɔ ka taga ka na (1 Zan 4:4). O kama, a kɔrɔtanin lo kosɔbɛ an magwɛrɛnin ka to Jehova la delili sababu fɛ!

11. Duniɲa ka hakili ye nɔɔ juman to mɔgɔw ka fani doncogo kan?

¹¹ Mɔgɔ ka faniw, a sawura ani a saniyacogo b’a yira hakili min b’a lasun ka koow kɛ. Duniɲa yɔrɔ caaman na, mɔgɔw tɛ fani don cogo bɛnnin na tugun. O y’a to telewisɔn baarakɛla dɔ y’a fɔ ko yanni dɔɔni, an tɛna se tugun ka tutumusow woloma ka bɔ mɔgɔ tɔɔw la. Hali sungurudenninw fana b’o fani modɛliw don. Zurunali dɔ kɔnɔ, a fɔra ko: “U b’u fari yɔrɔ caaman lakolon to yen ani u man teli k’u maloyɔrɔw dogo tugun.” Ka fara o kan, dɔw ka faniw ferekenin lo. O b’a yira ko murutili hakili b’u la ani u tɛ danbe ni bonya la u yɛrɛw kan.

12, 13. An ka kan ka tugu miiriya jumanw lo kɔ fani doncogo ni sawura koo ta fan fɛ?

¹² An minw ye Jehova sagokɛlaw ye, a bɛnnin lo an ka kɛ ni sawura ɲuman ye. O kɔrɔ, ka faniw don minw saniyanin lo, u ferekenin tɛ, u tɛ mɔgɔ kɔnɔ gwan ani u bɛnnin lo koow cogoya ma. Tuma bɛɛ la, an ka sawura ka kan k’a yira ko an be koow kɛ ni ‘hakilitigiya ye ani k’a dama kɛɲɛ.’ O jogow ani “kɛwale ɲumanw” bɛnnin lo mɔgɔw bɛɛ ma, cɛɛw ni musow, o minw b’a fɔ “ko u be siran Ala ɲɛ.” Tiɲɛn na, an ɲɛnako fɔlɔ ye min ye, o tɛ k’an yɛrɛ yira mɔgɔw la, nka ka “to Ala ka kanuya la.” (1 Timote 2:9, 10, NW; Zude 21). An b’a fɛ an ka masirifɛnw ka kɛ “kɔnɔna masirili dogolen ye . . . A sɔngɔ ka bon Ala ɲɛ na haali.”—1 Piyɛri 3:3, 4, ABM.

¹³ An kana ɲinɛ ko an ka fani doncogo n’an ka sawura cogoya be se k’a to mɔgɔw b’u mako don tiɲɛn batoli koo la wala u t’a ta sɔbɛ la. Gɛrɛkikan kumaden min bayɛlɛmana ko “k’a dama kɛɲɛ,” n’a ɲɛsinna tagamacogo ma, a kɔrɔ ko k’i janto mɔgɔ wɛrɛw dusukunnakow la, k’u bonya ani ka siran ka don u gasi la. O kama, hali n’an b’a miiri ko joo b’an fɛ ka fani don cogo dɔ la, an ka kan k’an janto tɔɔw ka dusukunnakow la fɔlɔ.  Min kɔrɔtanin lo ka tɛmɛ o bɛɛ kan, o ye ka bonya la Jehova n’a ka jama kan ani k’a yira ko an ye Ala sagokɛla ɲumanw ye minw be koo “bɛɛ kɛ ka boɲa la Ala kan.”—1 Korɛntikaw 4:9; 10:31; 2 Korɛntikaw 6:3, 4; 7:1.

14. Ka taga an sawura cogoya ani an saniyacogo ta fan fɛ, an ka kan k’an yɛrɛ ɲininga mun ni mun lo la?

¹⁴ An ka fani doncogo, an sawura cogoya ani an saniyacogo kɔrɔtanin lo kosɔbɛ n’an be waajuli kɛra wala n’an be kafo ka lajɛnw na. I k’i yɛrɛ ɲininga ko: ‘Yala ne sawura cogoya ani ne farikolo saniyacogo be mɔgɔ ɲɛɛ sama ne kan kojugu wa? Yala u be mɔgɔ kɔnɔ gwan wa? Joo min be ne fɛ o fan fɛ, yala ne b’o fisaya ni nɛɛma baara sɔrɔli ye kafo kɔnɔ wa?’—Zaburuw 68:7; Filipikaw 4:5; 1 Piyɛri 5:6.

15. Fani doncogo, sawura cogoya ani saniyacogo minw bɛnnin lo, mun na Bibulu t’o pereperelatigɛ?

¹⁵ Fani doncogo, sawura cogoya ani saniyacogo minw bɛnnin lo, Bibulu t’o pereperelatigɛ kerecɛnw ye. Jehova t’a fɛ k’an bali an ka sugandili kɛ an yɛrɛ ma. A fana t’a fɛ k’an bali an ka miiri. Nka, a b’a fɛ an ka kɛ mɔgɔ kɔgɔninw ye minw be se ka jatiminɛ kɛ Bibulu ka sariyaw kan. A b’a fɛ fana an k’an yɛrɛ deli a la ka se ka “ɲumaman ni juguman lɔn ka bɔ ɲɔgɔn na.” (Eburuw 5:14). Min kɔrɔtanin lo ka tɛmɛ o bɛɛ kan, o ye ko a b’a fɛ an ka koow bɛɛ kɛ ni  kanuya ye: Alakanu ani an mɔgɔɲɔgɔn kanu (Mariki 12:30, 31). Nka o dantigɛli be sira di an ma ka sugandili caaman kɛ fani doncogo ni sawura koo ta fan fɛ. Jehova sagokɛlaw ka koo b’o tiɲɛntigiya yira. U mana lajɛn yɔrɔ o yɔrɔ duniɲa kɔnɔ, an b’a ye k’u ninsɔndiyanin lo ani fani kulɛri sifa caaman b’u kaan na.

16. Duniɲa ka hakili be Yezu ka fɔta sɔsɔ cogo di? An ka kan k’an yɛrɛ ɲininga mun ni mun lo la?

¹⁶ Duniɲa ka hakili be mɔgɔ lafili: a ye mɔgɔ miliyɔn caaman lasun u k’a miiri ko wari ni bololafɛnw lo be se ka hɛɛrɛ lase u ma. Nka, Yezu y’a fɔ ko: “Hali ni nafolo ka ca mɔgɔ fɛ cogo o cogo, o te se ka kɛ a tigi nii suturanin ye.” (Luka 12:15). Yezu kɔni ma mɔgɔw jija u ka ban farikolo negelakow bɛɛ la. Nka a ye mɔgɔw kalan ko minw “y’a dɔn  ko u ye faantanw ye Ala ta fan fɛ” ani u “ɲɛkisɛw ka kɛnɛ,” o kɔrɔ, u ɲɛɛ jɔlen be Alakow lo kan, olu lo be ɲɛnamaya ni hɛɛrɛ sɔbɛ sɔrɔ (Matiyo 5:3; 6:22, 23, ABM). I k’i yɛrɛ ɲininga ko: ‘Yezu ye min fɔ, yala ne lanin b’o la sɔbɛ la, wala “galon faa” ka miiriya lo ye ne kuun minɛ wa? (Zan 8:44). Ne ka kumaw, ne ka laɲinitaw, ne ɲɛnakow ani ne ka ɲɛnamaya kɛcogo be mun lo yira?’—Luka 6:45; 21:34-36; 2 Zan 6.

17. Minw ɲɛɛ jɔlen be koo kelen kan, olu be duga minw sɔrɔ, i k’u dɔw fɔ.

¹⁷ Yezu y’a fɔ ko “Jo bɛ di Ala ka hakilitigiya ma a ka kɛtaw fɛ.” (Matiyo 11:19, ABM). Minw ɲɛɛ jɔlen be koo kelen kan, olu be duga minw sɔrɔ, an k’u dɔw filɛ. Ala ka Masaya baara b’u dusu lafiya sɔbɛ la (Matiyo 11:29, 30). U tɛ hami kojugu. O la, u b’u yɛrɛ tanga hakili ɲagami ni dusukasiko caaman ma (1 Timote 6:9, 10). Komi dumuni ni fɛɛrɛbɔ n’a ɲɔgɔnnaw b’u wasa, u be wagati caaman sɔrɔ ka kɛ n’u denbaya n’u kerecɛnɲɔgɔnw ye. O la, u be se ka sinɔgɔ ka ɲɛ (Waajulikɛla 5:11). Komi u b’u seko kɛ ka mɔgɔw sɔn, u be ninsɔndiyaba sɔrɔ o la (Kɛwaliw 20:35). U be ni “jigisɔbɛ” ye, u hakili siginin lo, ani min b’u bolo o b’u wasa (Ɔrɔmukaw 15:13; Matiyo 6:31, 32). Tiɲɛn na, o dugaw ɲɔgɔn tɛ yen!

18. Bibulu be an jugu n’a ka kɛlɛkɛcogo lakali cogo di? An seen be kɛlɛ sifa juman lo la?

¹⁸ Minw be to Ala ka kanuya la, olu latanganin lo Alako ta fan fɛ. O la, Sutana be jijali min kɛ k’u bali ka hɛɛrɛ ni ɲɛnamaya banbali sɔrɔ, a tɛna se u kɔrɔ (1 Piyɛri 5:8). Pol y’a fɔ ko: “An te kɛlɛ kɛ ni adamadenw ye, nga an be kɛlɛ kɛ ni diɲɛjugu kuntigiw ye, ni sanfɛ fangatigiw, ni setigi minw be dibi la, ani nijugu minw be sankolo la.” (Efɛzikaw 6:12). Gɛrɛkikan kumaden min bayɛlɛmana yan ko “kɛlɛ,”  o kɔrɔ ko “bondori.” O b’a yira ko an t’an juguw kɛlɛ k’an to yɔrɔjan kuluwo dɔ kɔnɔ, nka an ni an juguw be ɲɔgɔn na bolo ni bolo. Ka fara o kan, Pol be kuma “diɲɛjugu kuntigiw,” “setigi minw be dibi la,” ani “sanfɛ fangatigiw” koo la. O kumadenw b’a yira ko mɛlɛkɛ juguw be kɛlɛ latigɛ ani u b’a labɛn koɲuman anw lo kama.

19. I ka kerecɛnw ka Alako kɛlɛkɛminanw cogo lakali.

¹⁹ Nka an adamadenw ka barikantanya bɛɛ n’a ta, an be se ka see sɔrɔ o kɛlɛ la. Cogo di do? An kɛtɔ ka “Ala ka kɛlɛkɛminanw bɛɛ ta.” (Efɛzikaw 6:13). O kɛlɛkɛminanw cogo lakalila Efɛzikaw 6:14-18 la ko: “Aw ye jija ka tiɲɛ kɛ aw ka cɛsirilan ye, ani tilenninya ka kɛ aw ka nigɛkunbɛnnan ye. Aw ye jija ka kibaru diman fɔ, min ye hɛrɛkuma ye, o ka kɛ i n’a fɔ aw ka sennasanbara. Lanaya min b’aw la, aw k’o kɛ i n’a fɔ kɛlɛden ka nigɛkunbɛnnan, ka se ka Sutana ka biɲɛ tasumaman bɛɛ faga n’o ye. Aw ka kisili nigɛfugulan biri, ani ka Nii Senuman ka murujan ta min ye Ala ka kuma ye. Aw ka Ala daali kosɔbɛ tuma bɛɛ Nii Senuman barika la ni daalili sifa bɛɛ ye. Aw ye jija o la kosɔbɛ ka daalili kɛ Ala ka mɔgɔw bɛɛ ye.”

20. Kɔrɔ juman na an ka kɛlɛ tɛ i n’a fɔ sɔrɔdasi yɛrɛyɛrɛ ta?

²⁰ Komi Ala lo y’o kɛlɛkɛminanw di an ma, an be se k’an bolo la u kan, nka fɔɔ u ka kɛ an kun tuma bɛɛ. An ka kɛlɛ tɛ i n’a fɔ sɔrɔdasi yɛrɛyɛrɛw ta. Tuma dɔw la, olu be lafiɲɛ wagatijan kɔnɔ, u tɛ kɛlɛ la. Nka kerecɛnw seen be kɛlɛ la tuma bɛɛ ani u niinw be farati la fana. U ka kɛlɛ tɛna dabila fɔɔ ni Ala nana Sutana ka duniɲa nin halaki ani ka mɛlɛkɛ juguw datugu dingɛdunba kɔnɔ (Yirali 12:17; 20:1-3). O kama, hali n’i be fiyɛn dɔw wala negelajugu dɔw kɛlɛla, i kana bondori dabila. An bɛɛ ka kan k’an “farikolo gosi” walisa an ka se ka to kantigiya la Jehova ye (1 Korɛntikaw 9:27, ABM). Tiɲɛn na, an ka kan ka hami n’an tɛ bondori kɛra!

21. Mun lo bena an dɛmɛ ka see sɔrɔ an ka Alako kɛlɛ la?

 ²¹ Ka fara o kan, an yɛrɛ ka fanga tɛ se k’a to an be see sɔrɔ o kɛlɛ la. O lo y’a to Pol b’an hakili jigi ko a kɔrɔtanin lo an ka Jehova deli “tuma bɛɛ Nii Senuman barika la.” An fana ka kan ka mɛnni kɛ Jehova fɛ an kɛtɔ k’a ka Kuma kalan ani k’an lajɛn tuma o tuma n’an balimaw ye minw “b’an dɛmɛ kɛlɛ la” sabu an kelen dɔrɔn tɛ o kɛlɛ la! (Filemɔn 2; Eburuw 10:24, 25). Minw be kantigiya kɛ o koow bɛɛ la, olu bena see sɔrɔ. U fana bena se k’u ka limaniya lafasa bɛrɛbɛrɛ ni dɔw b’a kɔrɔbɔra.

22, 23. a) Mun na an labɛnni ka kan ka to tuma bɛɛ k’an ka limaniya lafasa, ani an ka kan k’an yɛrɛ ɲininga mun ni mun lo la? b) Kalansen nata barokun bena kɛ mun lo ye?

²² Yezu y’a fɔ ko: “Aw te diɲɛ ta ye . . . o le kama, diɲɛ mɔgɔw b’aw kɔniya.” (Zan 15:19). O kama kerecɛnw labɛnni ka kan ka to tuma bɛɛ k’u ka limaniya lafasa. U ka kan k’o kɛ ni bonya ni dususuman ye (1 Piyɛri 3:15). I k’i yɛrɛ ɲininga ko: ‘Yala ne b’a faamu fɛɛn min kama Jehova Seerew ka koo kɛcogo tɛ kelen ye ni jama ta ye koo dɔw la wa? N’o koo ɲɔgɔn ye ne sɔrɔ, yala ne lanin b’a la tigitigi ko Bibulu ni jɔncɛ kantigiman jɛnkulu be min fɔ, o lo ye tiɲɛn ye wa? (Matiyo 24:45; Zan 17:17). Koo min tilennin lo Jehova ɲɛɛ na, yala ne be sɔn k’o kɛ hali ni jama ka kɛcogo be dan na wa? Ani yala a yɛrɛ ka di ne ye ka kɛ dan na jama la wa?’—Zaburuw 34:3, ABM; Matiyo 10:32, 33.

²³ An kɔni t’a fɛ ka kɛ duniɲa ta ye. Nka tuma caaman na, duniɲa ka koo dɔw be se k’an kɔrɔbɔ ani an yɛrɛ tɛ bɔ o kala ma joona. Ɲɛyirali fɛ, komi an y’a fɔ ka tɛmɛ cogo min na, Sutana b’a ɲini ka Jehova sagokɛlaw kɛ duniɲa ta ye a kɛtɔ k’u sama duniɲa ka ɲɛnagwɛkow fɛ. Ɲɛnagwɛko minw be se ka barika don an na ani u t’an dusukun kɛlɛ, an be se k’olu sugandi cogo di? O bena kɛ kalansen nata barokun ye.