1, 2. Batɛmuw ye ninsɔndiya sababu ye jɔn lo fɛ?

N’I YE Jehova sagokɛla ye kabi saan caaman, siga t’a la, i ye batɛmu kalan lamɛn siɲɛ caaman na an ka lajɛnbaw la. Nka o bɛɛ n’a ta, i mana batɛmu ɲinilaw ye u wulila ka lɔ jama ɲɛfɛ, o b’i dusu diya kosɔbɛ. O wagati la, jama ninsɔndiyanin be ŋunuŋunu dɔɔni, ani bɛɛ be tɛgɛrɛ fɔ. Ɲɛji be se ka na i ɲɛɛw na k’a ye ko mɔgɔ wɛrɛw y’a latigɛ ka kɛ Jehova ta ye. O wagatiw ye ninsɔndiya sababu ye an fɛ dɛ!

² Batɛmuw be kɛ an ɲɛɛ na siɲɛ damanin dɔrɔn saan kɔnɔ an ka mara la. Nka, nɛɛma dira mɛlɛkɛw ma ka batɛmuw filɛ siɲɛ caaman na. I ka miiri k’a filɛ u be “nisɔndiya sankolo la” cogo min na n’u ɲɛɛ b’a la ko duniɲa kuru bɛɛ kɔnɔ, lɔgɔkun o lɔgɔkun, mɔgɔ waa caaman be farala Jehova ka ɔriganisasiyɔn mɔgɔw kan dugukolo kan (Luka 15:7, 10). Siga t’a la, o ɲɛtaga sɔrɔli be mɛlɛkɛw ɲagali kosɔbɛ!—Aze 2:7.

3. Mun na Sutana be munumununa “i n’a fɔ jara” kasitɔ, ani a b’a fɛ ka mun lo kɛ?

³ Nka, batɛmu koo be mɛlɛkɛ wɛrɛw dimi kosɔbɛ. Sutana ni jinaw dimininba lo k’a ye ko mɔgɔ waa caaman b’u kɔɔ di duniɲa tolinin nin ma. U dimininba lo sabu  Sutana tun ye wasoya kɛ k’a fɔ ko adamaden si tɛna baara kɛ Jehova ye kanuya kosɔn ani ko mɔgɔ si tɛna kantigiya kɛ ni kɔrɔbɔli gwanniman b’a kan (Zɔbu 2:4, 5). Tuma o tuma, mɔgɔ mana a latigɛ k’a yɛrɛkun di Jehova ma, o b’a yira ko Sutana ye ngalontigɛla ye. A be kɛ komi u be Sutana tulo ci siɲɛ waa caaman na lɔgɔkun o lɔgɔkun saan kɔnɔ. A tɛ bari an na n’a fɔra ko a “be munumununa i n’a fɔ jara [kasitɔ], a b’a fɛ ka dɔ le minɛ k’a ɲimi.” (1 Piyɛri 5:8). O “jara” ka laɲinita ye k’an ɲimi, o kɔrɔ, k’an makosa Alako ta fan fɛ wala k’an ka jɛnɲɔgɔnya tiɲɛ pewu yɛrɛ ni Jehova ye.—Zaburuw 7:2, 3; 2 Timote 3:12.

4, 5. a) Jehova ye bali jɔnjɔn fila jumanw sigi Sutana ka setigiya kan? b) Kerecɛn sɔbɛ kɔni lanin be mun lo la?

⁴ Hali n’an kɛlɛbaga ka fari, kuun t’a la an k’an jaa tigɛ.  Mun na do? Jehova ye bali jɔnjɔn fila sigi o “jara” kasitɔ ka setigiya kan. O baliw ye mun ni mun lo ye? A fɔlɔ, Jehova tun kɔnna k’a fɔ ko kerecɛn sɔbɛw “jamaba” dɔ bena kisi “tɔɔrɔba” nata ma (Yirali 7:9, 14). Ala ka kiraya kumaw ye wulibali ye. O kama, Sutana yɛrɛ b’a lɔn ko ale tɛ se ka Ala ka mɔgɔw bɛɛ lajɛnnin lafili.

⁵ Bali filanan yirala ka gwɛ Ala sagokɛla kantigiman dɔ ka kuma jɔnjɔn fɛ. Galen, kira Azariya tun ye tiɲɛn kuma nin fɔ masacɛ Aza ye ko: “N’aw tora Masaba [Jehova] fɛ, a be to n’aw ye.” (2 Tilew Kibaru 15:2; 1 Korɛntikaw 10:13). Bibulu ka ɲɛyirali caaman b’a yira ko minw tora Ala gɛrɛfɛ galen, Sutana ma se k’olu lafili fewu (Eburuw 11:4-40). Bi fana, ni kerecɛn dɔ tora Ala gɛrɛfɛ, a bena se ka ban Sutana ma ani ka see sɔrɔ a kan yɛrɛ. Ala ka Kuma yɛrɛ b’an hakili sigi ko: “Aw . . . ka ban Sutana ma. O la, a bena aw ye k’aw to yen.”—Zaki 4:7.

6. Sutana be kerecɛnw kɛlɛ cogo di u kelen kelen?

⁶ Sutana tɛ se ka see sɔrɔ an bɛɛ lajɛnnin kan Alako kɛlɛ la. Nka, a be se k’an kelen kelen mako sa n’an m’an ɲɛmalɔ. Sutana b’a lɔn ko n’a sera ka an ni Jehova ka jɛnɲɔgɔnya tiɲɛ, o la a bena se k’an mako sa pewu. A b’o kɛ cogo di? A be fariya an ma, a b’an kɛlɛ an kelen kelen, ani a be nanbarakow kɛ. An k’o fɛɛrɛ jɔnjɔnw lajɛ.

7. Mun na Sutana be fariyara Jehova sagokɛlaw ma?

⁷ A be fariya an ma. Ciden Zan y’a fɔ ko: “Diɲɛ bɛɛ bɛ Sitanɛ fanga kɔrɔ.” (1 Zan 5:19, ABM ). Nin ye lasɔmini kumaw ye kerecɛn sɔbɛw bɛɛ fɛ. Komi Sutana sera ka Alalɔnbaliw ka duniɲa jugu nin bɛɛ yɛlɛma ka kɛ a ta ye ka ban, minw fosira ka bɔ a bolo ka kɛ Jehova sagokɛlaw ye, a b’a jija ka kɛlɛ gwan olu kun sisan (Mise 4:1; Zan 15:19; Yirali 12:12, 17). A dimininba lo sabu a b’a lɔn ko  a ka wagati tɔɔ man jan tugun. O lo y’a to a be fariyara ka taga le. Bi, i n’a fɔ kongosogo mandiminin, a dimininba lo an kama ani a be koow bɛɛ lajɛnnin kɛra walisa k’an halaki. O kama, bi ka tɛmɛ sanga ni wagati bɛɛ kan, an ka kan k’a “lɔn an be wagati min na ani an ka kan ka min kɛ.”—1 Tilew Kibaru 12:32, NW.

8. Ciden Pol ko an be “kɛlɛ kɛ” ni mɛlɛkɛ juguw ye, o kɔrɔ ko di?

⁸ A b’an kɛlɛ an kelen kelen. Ciden Pol y’a kerecɛnɲɔgɔnw lasɔmi ko: ‘An be kɛlɛ kɛ ni nijuguw ye minw be sankolo la.’ (Efɛzikaw 6:12). Gɛrɛkikan kumaden min bayɛlɛmana yan ko “kɛlɛ,” o kɔrɔ ko “bondori.” O b’a yira ko an ni an juguw be ɲɔgɔn na bolo ni bolo. Pol y’o kumaden fɔ walisa k’a yira ko an kelen kelen bɛɛ be kɛlɛ la ni mɛlɛkɛ juguw ye. An be jamana min na, mɔgɔw lanin be jinaw koo la wo, u lanin t’a la wo, an man kan ka ɲinɛ abada ko kabi an y’an yɛrɛkun di Jehova ma, an donna bondori fogo la. Kerecɛn mana a yɛrɛkun di Ala ma, wala ka kɔn o ɲɛ yɛrɛ, a seen b’o kɛlɛ la. O lo y’a to Pol y’a fɔ ka gwɛlɛya Efɛzi kerecɛnw ma ko u ka “lɔ ka ɲa” ani ko u “ka lɔ kelen kan.”—Efɛzikaw 6:11, 13, 14.

9. a) Mun na Sutana ni jinaw ka “namaraw” ka ca? b) Mun na Sutana b’a ɲini k’an ka miiriyaw yɛlɛma, ani an be se k’an yɛrɛ lafasa a kama cogo di? ( Ɲɛɛ 192-193 ka koorilen lajɛ.) c) An bena nanbarako juman lo lajɛ sisan?

⁹ A be nanbarakow kɛ. Pol ye kerecɛnw jija ko u ka lɔ kelen kan ka Sutana ka “namaraw kunbɛn” (Efɛzikaw 6:11). I k’a kɔrɔsi ko Pol tɛ kuma nanbara kelen koo la nka caaman. Jinaw be fɛɛrɛ jugu sifa caaman kɛ, ani kuun b’a la u fɛ. Kerecɛn dɔw tun lɔra kelen kan kɔrɔbɔli sifa dɔ la, nka tuma min na kɔrɔbɔli sifa wɛrɛ kɛra u sen kɔrɔ, u benna. O kama, Sutana n’a ka jinaw b’an kelen kelen bɛɛ ka tagamacogo kɔrɔsira kosɔbɛ walisa k’an ka fiyɛnw lɔn. O kɔ, u mana fiyɛn o fiyɛn kɔrɔsi an na Alako ta fan fɛ,  u be tɛmɛ o fɛ. Nka, a kɛra kunnadiya ye an fɛ, an be se ka Sutana ka fɛɛrɛ caaman lɔn sabu u kofɔra Bibulu kɔnɔ (2 Korɛntikaw 2:11). An ye baro kɛ ka tɛmɛ o nanbarako dɔw kan gafe nin kɔnɔ, i n’a fɔ nafolo kanuya, jɛnɲɔgɔn juguw ani kakalaya. Nka, an ka Sutana ka nanbarako wɛrɛ lajɛ sisan: jinamoriya n’a ɲɔgɔnnakow.

10. a) Kɛcogo jumanw fɛ mɔgɔ be se k’a seen don jinakow la? b) Jehova b’o kɛcogow jati cogo di? E do?

¹⁰ Mɔgɔ min be jinamoriya n’a ɲɔgɔnnakow kɛ, o tigi be sin ka kɛ mɛlɛkɛ juguw ka jɛnɲɔgɔn ye. Lagwɛri, subagaya, ka mɔgɔ siri wala ka suuw kili, o ye jinako dɔw ye. An kɔni b’a lɔn k’o ye “ko haramulenw” ye Jehova fɛ (Deteronɔmu 18:10-12, ABM; Yirali 21:8). Komi an fana ka kan ka “ko jugu haramu,” a daganin tɛ an k’a ɲini ka jɛn ni mɛlɛkɛ juguw ye (Ɔrɔmukaw 12:9, ABM ). N’an y’o kɛ, an y’an sankolola Faa Jehova janfa yɛrɛ le!

11. Mun na a bena kɛ kunkɔrɔtaba ye Sutana fɛ n’a sera k’an lasun an k’an seen don jinako dɔ la? Ɲɛyirali dɔ di.

¹¹ Komi Sutana b’a lɔn ko mɔgɔ min be jinamoriya n’a ɲɔgɔnnakow kɛ, o tigi be Jehova janfa yɛrɛ le, o kama a jijanin lo k’an lasun an k’o koow kɛ. Sutana mana se ka kerecɛn dɔ lasun a ka jinako dɔ kɛ, o be kɛ kunkɔrɔtaba ye a fɛ. Mun na do? An ka ɲɛyirali nin ta: N’u sera ka sɔrɔdasi dɔ kuun yɛlɛma walisa a k’a ka kɛlɛbolow janfa ani ka tugu a juguw kɔ, o be kɛ ɲagali sababu ye a juguw ka kɛlɛkuntigi fɛ. O kɛlɛkuntigi yɛrɛ be se k’o janfanci ta ka kɛ see sɔrɔli tagamasiɲɛ ye walisa k’o sɔrɔdasi ka kuntigi kɔrɔ nɛni bɛɛ ɲɛɛ na. O cogo kelen na, ni kerecɛn dɔ y’a seen don jinakow la, a b’a yira o sen fɛ ko a ye tugubanciya kɛ k’a kɔɔ di Jehova ma ani k’a yɛrɛ bila Sutana ka fanga kɔrɔ. I ka miiri k’a filɛ a bena diya Sutana  ye cogo min na k’o janfanci ta k’a yira ko ale ye see sɔrɔ kɛlɛ la! Yala an dɔ b’a fɛ k’o sababu di Sutana ma wa? Ayi dɛ! An tɛ janfanciw ye.

12. Sutana be tɛmɛ fɛɛrɛ juman lo fɛ walisa k’an ka miiriya yɛlɛma jinamoriya n’a ɲɔgɔnnakow ta fan fɛ?

¹² N’an tora ka jinamoriya n’a ɲɔgɔnnakow haramu, Sutana tɛna se k’an sɔrɔ o sen fɛ. O kama, a b’a lɔn ko a ka kan k’an ka miiriyaw lo yɛlɛma fɔlɔ. Cogo di do? A be fɛɛrɛ ɲini ka kerecɛnw hakili ɲagami fɔɔ dɔw b’a miiri ko “kojugu ye koɲuman ye, ko koɲuman ye kojugu ye.” (Ezayi 5:20). Walisa ka se k’o kɛ, tuma caaman na Sutana be tɛmɛ fɛɛrɛ dɔ fɛ min ye sanga sɔrɔ a bolo kabi galen: a be ɲiningali dɔw lawuli minw b’a to mɔgɔ be sigasiga.

13. Koo jumanw na Sutana ye ɲiningaliw lawuli minw b’a to mɔgɔ be sigasiga?

¹³ I k’a kɔrɔsi Sutana y’o kɛ cogo min na galen. Edɛn nankɔtu kɔnɔ, a ye Awa ɲininga ko: “Yala tiɲɛn lo ko Ala y’a fɔ ko aw kana nankɔtu la yiri si deen dumu wa?” Zɔbu ka wagati la, ka mɛlɛkɛw to ɲɔgɔnye dɔ la sankolo la, Sutana ye ɲiningali nin lawuli ko: “I be miiri ko Zɔbu be siran i ɲa gwansan le wa?” Yezu Krista ka cidenya baara daminɛ na dugukolo kan, Sutana y’a darabɔ k’a fɔ ko: “N’i ye Ala Deen ye, a fɔ ko kabakuru nunu ka yɛlɛma ka kɛ buru ye.” K’a sɔrɔ, a lɔgɔkun wɔɔrɔ ɲɔgɔn tun ye nin ye Jehova yɛrɛ tun y’a fɔ Yezu koo la ko: “Nin ye ne Dencɛ kanunin ye. A koo ka di ne ye haali.” I ka miiri k’a filɛ, Sutana y’a jaa gwɛlɛya ka Jehova lɔgɔbɔ o kumaw kosɔn!—Zɛnɛsi 3:1, NW; Zɔbu 1:9; Matiyo 3:17; 4:3.

14. a) Sutana be tɛmɛ a ka nanbarako fɛ cogo di walisa mɔgɔw k’a miiri ko farati bɛrɛ tɛ jinamoriya n’a ɲɔgɔnnakow la? b) An bena mun lo lajɛ sisan?

¹⁴ Bi, Sutana be tɛmɛ o fɛɛrɛ kelen kelen lo fɛ walisa  mɔgɔw k’a miiri ko farati bɛrɛ tɛ jinamoriya n’a ɲɔgɔnnakow la. A fɔ man di, nka a sera ka sigasigali miiriya don kerecɛn dɔw kuun na. U y’a daminɛ ka miiri ko jinamoriya n’a ɲɔgɔnnakow bɛɛ kɔni tɛ kojugu ye. Tiɲɛn na, u ka miiriya kɔrɔ ko ‘Yala tiɲɛn lo ko. . . ?’ (2 Korɛntikaw 11:3). An be se k’o ɲɔgɔnna mɔgɔw dɛmɛ cogo di u k’u ka miiriya latilen? An be se ka mun lo kɛ walisa Sutana ka nanbarakow kana an kuun yɛlɛma? Walisa k’o jaabili lɔn an ka koo fila lajɛ, Sutana be dogo ka minw nɔgɔ ni jinamoriya n’a ɲɔgɔnnakow ye. O ye ɲɛnagwɛkow ni furakɛcogow ye.

15. a) Tubabu jamanaw na, mɔgɔw ka teli ka jinakow jati cogo di? b) O ye nɔɔ juman to kerecɛn dɔw ka miiriya kan?

¹⁵ Tubabu jamanaw kɔni na, mɔgɔw ka teli ka jinako, subagayako n’a ɲɔgɔnnaw jati koo gwansanw ye. Filimuw, gafew, telewisɔn ani ɔridinatɛri kɔnɔ, u ka teli ka jinakow yira k’u kɛ tulonko ni ceguyako ye farati tɛ min na. Fɛɛn min be mɔgɔw lasun k’o filimuw filɛ wala k’o gafew kalan, o basiginin be jinakow lo kan. O filimu n’o gafe suguw koo be diyara mɔgɔw ye ka taga. Tiɲɛn na, jinaw sera ka mɔgɔw lasun u k’a miiri ko jinako tɛ kojugu ye. Yala o ye nɔɔ to kerecɛnw kan fana wa? U dɔw ka miiriya yɛlɛmana. Cogo di do? An ka kerecɛn dɔ ka koo lajɛ. A ye filimu dɔ filɛ min ɲɛsinna jinakow ma. A y’a fɔ ko: “Ne kɔni y’o filimu filɛ, nka ne ma n’ seen don jinako si la.” Mun na farati b’a la ka miiri nin cogo la?

16. Mun na farati b’a la k’an yɛrɛ ɲɛnagwɛ ni koo dɔw ye jinakow be minw na?

¹⁶ Tiɲɛn lo ko ka jinamoriya n’a ɲɔgɔnnakow filɛ ani k’u kɛ, o koo fila tɛ kelen ye. Nka, o kɔrɔ tɛ ko farati t’a la k’u filɛ dɛ. Mun na do? I ka miiri nin na: Ala ka Kuma b’a yira ko see tɛ Sutana n’a ka jinaw ye k’an kɔnɔkow  kalan. * Komi an y’a fɔ ka tɛmɛ, an be koo minw kɛ ani an b’an ɲɛnagwɛ ni fɛɛn minw ye, jinaw b’o lo kɔrɔsi kosɔbɛ walisa k’a lɔn an be min miiri ani fiyɛn minw b’an na Alako ta fan fɛ. Ni kerecɛn dɔ b’a yira a ka kɛcogow fɛ ko filimu ni gafe minw basiginin lo lagwɛriko, jinamoriyako, n’a ɲɔgɔnnakow kan, o lo ka di ale ye, a b’a kɔnɔkow lo fɔra jinaw ye. Tiɲɛn na, a b’a ka fiyɛn lo yirala u la! A y’o fiyɛn min yira, jinaw bena tɛmɛ o fɛ ka kɛlɛ gwan o kerecɛn kun fɔɔ ka see sɔrɔ a kan. Kerecɛn minw tun be ɲɛnagwɛlɛya kɛ ka to k’u yɛrɛ ɲɛnagwɛ ni jinakow ye, u labanna ka jinamoriya n’a ɲɔgɔnnakow yɛrɛyɛrɛ kɛ.—Galatikaw 6:7.

17. Sutana be se ka nanbarako juman kɛ ka banabagatɔw lafili?

¹⁷ Sutana tɛ tɛmɛ ɲɛnagwɛkow nege dɔrɔn fɛ k’a ɲini k’an sɔrɔ dɛ. Nka, komi an mako b’a la k’an yɛrɛ fura kɛ, a b’a ɲini k’an sɔrɔ o fana sen fɛ. Cogo di do? Kerecɛn min b’a jijara sɔbɛ la k’a yɛrɛ fura kɛ, o n’a ta bɛɛ ni a ka bana be juguyara ka taga, a jigi be se ka tigɛ (Mariki 5:25, 26). O be se ka sababu ɲuman di Sutana n’a ka jinaw ma u k’a lafili. U b’a lɔn ko Ala ka Kuma b’an lasɔmi ko an kana “kojugukɛlaw ka dɛmɛni” ɲini (Ezayi 31:2, ABM ). Nka ni jinaw y’a ye ko kerecɛn dɔ jigi tigɛnin lo a ka kɛnɛyako kosɔn, u be se k’a lasun a kana a janto Ala ka lasɔmini na ani a ka sɔn furakɛcogo dɔw la “jinamoriya” wala a ɲɔgɔnnakow be minw na (Ezayi 1:13, NW ). O ye kojuguba ye dɛ! Ni jinaw sera ka banabagatɔ nanbara o cogo la, jɛnɲɔgɔnya min b’o tigi ni Ala cɛ, o be se ka tiɲɛ. Cogo di do?

18. Kerecɛn tɛ sɔn furakɛcogo jumanw na, ani mun na do?

 ¹⁸ Israɛlden minw tun ye “jinamoriya” koow kɛ, Jehova y’u lasɔmi ko: “N’aw be daalili kɛra, ne bi n yɛrɛ dogo aw la. Hali n’aw y’aw ka daaliliw caya, ne tena mɛnni kɛ aw fɛ.” (Ezayi 1:15). Ayiwa, fɛɛn o fɛɛn be se k’a to Jehova be ban k’an ka delili lamɛn ani k’an dɛmɛ, sanko n’an man kɛnɛ, an b’an yɛrɛ kɔrɔsi o ma (Zaburuw 41:4). O kama, n’a yirala ko u be tɛmɛ jinamoriya n’a ɲɔgɔnnako dɔw fɛ k’a ɲini k’a lɔn bana min be mɔgɔ la wala k’a fura kɛ, kerecɛn sɔbɛ ka kan ka ban o la. * (Matiyo 6:13). O cogo la, a lanin b’a la ko a tɛna Jehova bali a k’a dɛmɛ.—Koorilen nin lajɛ  ɲɛɛ 194nan kan: “Kɔni jinako dɔ t’a la dɛ?”

19. a) Sutana ye mɔgɔ caaman lafili u ka mun lo miiri ale ka setigiya koo la? b) Kerecɛn sɔbɛw tɛ sɔn ka maana sifa jumanw jɛnsɛn?

¹⁹ Tubabu jamanaw na, mɔgɔ caaman t’a jati ko farati be Sutana ka sebagaya la. Nka, duniɲa faan wɛrɛw la, mɔgɔw be siran a ka sebagaya ɲɛ. O jamanaw na, Sutana ye mɔgɔ caaman lafili u k’a miiri ko ale ka setigiya ka  bon haali, k’a sɔrɔ o tɛ. Mɔgɔw be koo o koo kɛ u ka ɲɛnamaya kɔnɔ, dumuni wo, baara wo, sinɔgɔ wo, u b’o bɛɛ kɛ ni jinaw ɲɛsiranya ye. Maanaw tɛ lakali ka ban jinaw ka setigiya koo la. Mɔgɔw b’u lakali ni dusudiya ye ani u lamɛnbagaw be kabakoya. Yala an fana ka kan k’o maanaw jɛnsɛn wa? Ayi. Tiɲɛn Ala sagokɛlaw t’o kɛ koo jɔnjɔn fila kosɔn.

20. Mɔgɔ be se ka Sutana ka lafili kumaw jɛnsɛn cogo di i yɛrɛ ɲina ma?

²⁰ Fɔlɔ, n’an tora ka jinaw ka setigiya lakali, an be Sutana lo mako ɲɛna. Cogo di do? Ala ka Kuma kɔni b’a fɔ ko Sutana be se kabakow la. Nka a b’an lasɔmi fana ko Sutana be “mɔgɔw namara” ani a be mɔgɔ “lafili” (2 Tesalonikaw 2:9, 10). Komi Sutana ye mɔgɔ lafilibaga ŋana ye, jinamoriya n’a ɲɔgɔnnakow ka di minw ye, a b’a lɔn a be se k’olu ka miiriya yɛlɛma cogo min na walisa u  ka la koo dɔw la minw tɛ tiɲɛn ye. O ɲɔgɔnna mɔgɔw be se ka la a la sɔbɛ la k’u ye fɛɛn dɔw ye ani ka koo dɔw mɛn. Ani, u b’o lakali k’a fɔ ko tiɲɛnko lo. A laban, mɔgɔw b’o maanaw lakali k’u lakali fɔɔ k’a dama tɛmɛ. Ni kerecɛn dɔ y’o maanaw jɛnsɛn, tiɲɛn na a be Sutana sago lo kɛra, ale min ye “galon faa” ye. A be Sutana ka ngalon koow lo jɛnsɛnna.—Zan 8:44; 2 Timote 2:16.

21. An ka ɲi k’an ka barow basigi mun lo kan?

²¹ Filanan, hali ni kerecɛn dɔ ye kumaɲɔgɔnya kɛ ni jinaw ye fɔlɔ la, a man kan ka to k’o koow lakali k’a kerecɛnɲɔgɔnw ɲɛnagwɛ n’o ye. Mun na do? Bibulu b’an jija ko: “An k’an ɲaa lɔnin to Yezu kan ale min ye an ka lanaya bɔyɔrɔ ye, n’a laban ye.” (Eburuw 12:2). Tiɲɛn na, an ka kan k’an ɲɛɛ lɔnin to mɔgɔ min kan, o ye Yezu lo ye, Sutana tɛ. An k’a lɔn ko ka Yezu to dugukolo kan, a m’a ka kalandenw ɲɛnagwɛ ni maana dɔw ye jinaw koo la hali k’a sɔrɔ a tun be koo caaman lɔn Sutana ka setigiya koo la. Nka, Yezu tun ka teli ka kuma Ala ka Masaya koo lo la. O kama, n’an b’a fɛ ka Yezu n’a ka cidenw ladegi, an ka ɲi k’an ka barow basigi “Ala ka koba kɛninw” lo kan.—Kɛwaliw 2:11; Luka 8:1; Ɔrɔmukaw 1:11, 12.

22. An be se ka mun lo kɛ min b’a to ‘nisɔndiya be kɛ sankolo la’?

²² Tiɲɛn lo, Sutana be tɛmɛ nanbarako sifa caaman fɛ, i n’a fɔ jinamoriya n’a ɲɔgɔnnaw, walisa k’a ɲini k’an ka jɛnɲɔgɔnya tiɲɛ ni Jehova ye. Nka, n’an be koo jugu kɔniya ka nɔɔrɔ koo ɲuman na, an bena se ka lɔ kelen kan ka ban jinamoriya n’a ɲɔgɔnna koow bɛɛ la. O la, Sutana tɛna sababu si sɔrɔ k’an lafili n’o koow ye (Efɛzikaw 4:27). I ka miiri k’a filɛ ‘nisɔndiyaba’ min bena kɛ “sankolo la” n’an tora ka “lɔ ka ɲa ka Sutana ka namaraw kunbɛn” fɔɔ ka taga se a halaki tuma ma!—Efɛzikaw 6:11.