I YE pɔmu diiman dɔ tigɛ a yiri kan, k’a kasa sunsun ani k’a don i ka minan kɔnɔ, o min fara ka ban. A lɛri caaman ye nin ye i be baara kɛra, nka i fari bele foninin lo ani i labɛnnin lo ka baara kɛ dɔɔni tugun. I bamuso be yiri dɔ kɔrɔ i gɛrɛfɛ ani a ninsɔndiyanin be baara kɛra. A be baro kɛra n’aw somɔgɔ wɛrɛw ani aw teriw ye minw be aw dɛmɛna ka pɔmuw tigɛ. A kɛra sunguru ye! I hakili b’a la ko a tun b’o cogo lo la tuma min na i tun ye denmisɛn ye a saan caaman ye nin ye. A ka gwɛlɛ i ma ka la a la ko i tun y’a kɔrɔnin ye duniɲa dɔ kɔnɔ o min tɛ yen tugun. I tun y’a ye bana y’a nagasi cogo min na. O kɔ, a sara k’a bolo to i bolo ani i kasira a ka kaburu kan. Nka, a ye nin ye, ale ni mɔgɔ caaman wɛrɛw be niin na tugun ani u ka kɛnɛ kosɔbɛ!

An b’a lɔn k’o koow bena kɛ yɛrɛ yɛrɛ la loon dɔ. An lanin b’o la sabu Ala ka layiduw be dafa tuma bɛɛ. Tilanyɔrɔ nin na, an bena Ala ka layidu dɔw lajɛ, a ka Masaya bena minw dafa yanni dɔɔni ani k’a kɛ Arimagedɔn kɛlɛ be daminɛ. O kɔ, Ala ka Masaya bena layidu ɲuman minw dafa, an bena u dɔw lajɛ fana. Tuma min na o Masaya bena dugukolo kuru bɛɛ mara, a bena kɛ ninsɔndiyaba ye an fɛ k’a ye ko fɛɛnw bɛɛ kɛra kura ye!