ELE n’i ka Bibulu kalanden ye vɛrise min kalan ɲɔgɔn fɛ, a y’o faamu minkɛ, a y’a ɲɛɛw waga ninsɔndiya bolo! A y’a fɔ ni dususuman ye ko: “I b’a fɛ k’a fɔ ko Bibulu ka fɔta la, an be se ka ɲɛnamaya kɛ alijɛnɛ kɔnɔ fɔɔ abada yan yɛrɛ dugukolo kan wa?” I ka waajulikɛɲɔgɔn be yɛlɛmisɛn kɛ ani a b’a fɔ ko: “Ayiwa, ele yɛrɛ ye mun lo kalan Bibulu kɔnɔ?” Bibulu kalanden kabakoyara, a y’a kuun yuguyugu ani a y’a fɔ ko: “Ni bi tɛ, n’ ma deli k’o mɛn ka ye!” I hakili jigira ko a tun y’o ɲɔgɔn lo fɔ a lɔgɔkun damanin ye nin ye, a siɲɛ fɔlɔ k’a mɛn ko Ala tɔgɔ ko Jehova.

O koo ɲɔgɔn ye Ala sagokɛla caaman sɔrɔ ka ye. N’a sɔrɔ a delila ka ele fana sɔrɔ. O koo ɲɔgɔn b’an hakili jigi ko an ye nilifɛn nafamanba dɔ sɔrɔ, o min ye lɔnniya ye tiɲɛn koo la! Miiri k’a filɛ: I y’o nilifɛn sɔrɔ cogo di? An bena o jaabili sɔrɔ tilanyɔrɔ fɔlɔ nin na. Ala y’a sagokɛlaw dɛmɛ dɔɔni dɔɔni cogo min na ka faamuyali sɔrɔ Alako ta fan fɛ, o b’a yira ka gwɛ ko Ala ka Masaya ye tiɲɛnko lo ye. A saan 100 ye nin ye, Yezu Krista b’o Masaya kun na. A be Ala sagokɛlaw dɛmɛna u ka lɔnniya sɔrɔ tiɲɛn koo la.