1. An bena kuma delili juman lo koo la?

MƆGƆ miliyɔn caaman be delili nin lɔn min be daminɛ ko “an Faa min be sankolo la.” Yezu y’o delili kɛ walisa k’a ka kalandenw degi delili kɛcogo la. A ye delili kɛ mun lo koo la? Mun na o delili nafa ka bon an fɛ bi?

2. Yezu ko an ka delili kɛ fɛɛnba saba jumanw lo koo la?

² Yezu ko: “Aw ka kan ka Ala daali cogo min na, o filɛ: ‘An Faa min be sankolo la, i tɔgɔ ka boɲa [wala a ka saniya]. I ka masaya ka na. I sago ka kɛ dugukolo kan i ko a be kɛ sankolo la cogo min na.’ ” (Matiyo 6:9-13 kalan). Mun na Yezu ko an ka delili kɛ o fɛɛn saba koo la?—Kunnafoni wɛrɛw lajɛ, a 20nan.

3. An ka ɲi ka mun lo lɔn Ala ka Masaya koo la?

³ An y’a ye ko Ala tɔgɔ ko Jehova. Ala sagonata ye min ye adamadenw ni dugukolo koo la, an y’o ye fana. Yezu ye delili kɛ ko: “I ka masaya ka na.” O kuma kɔrɔ ko di? Ala ka Masaya ye mun lo ye? A bena mun lo kɛ? A bena a kɛ cogo di Ala tɔgɔ ka saniya? An bena o lo ye.

4. Ala ka Masaya ye mun lo ye ani jɔn lo ye a Masacɛ ye?

⁴ Jehova ye gofɛrɛnɛman dɔ sigi sankolo la ani a ye Yezu kɛ Masacɛ ye o kun na. Bibulu b’o gofɛrɛnɛman  weele ko Ala ka Masaya. Yezu ye “masaw ka Masa, matigiw ka Matigi” ye (1 Timote 6:15). Adamadenw ka kuntigi si tɛ se ka koo ɲuman kɛ ka se Yezu ma. A fanga ka bon fana ka tɛmɛ u bɛɛ lajɛnnin ta kan.

5. Ala ka Masaya bena to yɔrɔ juman na ka kuntigiya kɛ? A bena kuntigiya kɛ mun lo kun na?

⁵ Tile 40 Yezu suu kununi kɔ, a kɔsegira sankolo la. Kɔfɛ, Jehova y’a sigi masaya la (Kɛwaliw 2:33). Ala ka gofɛrɛnɛman bena to sankolo la ka dugukolo mara (Yirali 11:15). O lo kama Bibulu be Ala ka Masaya weele ko “sankolo masaya.”—2 Timote 4:18, ABM.

6, 7. Mun na adamadenw ka masacɛ si ma se Yezu ma?

⁶ Bibulu b’a fɔ ko adamadenw ka masacɛ si ma se Yezu ma sabu “ale kelen le te sa.” (1 Timote 6:16). Adamadenw ka kuntigiw bɛɛ be laban ka sa, nka Yezu kɔni tɛna sa abada. Yezu bena koo ɲuman minw bɛɛ kɛ an ye, u bena an nafa fɔɔ abada!

⁷ Bibulu ka kiraya kuma dɔ b’a fɔ ko Yezu bena kɛ Masacɛ tilennin ye ani a bena hinɛ mɔgɔw la. An b’a kalan ko: “Masaba ka Nii bena to n’a ye, ale min be lɔnniya, ni koo faranfasili see di, ka koo ɲanabɔli see, ni fanga di, ka Masaba lɔnko n’a ɲasiranko see di. Ka siran Masaba ɲa, o le bena diya a ye. A tena kiti tigɛ ka kɛɲɛ n’a ɲaa ka yeta ye. A tena koo latigɛ ka kɛɲɛ n’a tulo ka mɛnta ye. A bena dɛsɛbagatɔw ka kiti tigɛ tilenninya la.” (Ezayi 11:2-4). Yala i tɛ o Masacɛ ɲɔgɔn fɛ wa?

8. An b’a lɔn cogo di ko Yezu kelen tɛna kuntigiya kɛ?

⁸ Ala ye adamaden dɔw sugandi u ka kuntigiya kɛ ni Yezu ye sankolo la. Ɲɛyirali fɛ, ciden Pol y’a fɔ  Timote ye ko: “N’an jijara ka tɔɔrɔ muɲu n’a ye, an bena kuntigiya kɛ n’a ye.” (2 Timote 2:12). Mɔgɔ joli lo bena kuntigiya kɛ ni Yezu ye?

9. Mɔgɔ joli lo bena masaya kɛ ni Yezu ye? Ala y’a daminɛ k’u sugandi tuma juman?

⁹ An y’a ye kalansen 7nan na ko ciden Zan ye Yezu ye Masaya la sankolo la. Masacɛ 144 000 tun be n’a ye. Olu ye jɔn lo ye? Zan y’a ɲɛfɔ ko Yezu “tɔgɔ ni a Fa tɔgɔ sɛbɛnnen tun bɛ o mɔgɔw tenw na.” Zan y’a fɔ fana ko “Sagaden [o kɔrɔ, Yezu] bɛ taa yɔrɔ o yɔrɔ, olu bɛ tugu a nɔfɛ. U kunmabɔra ka bɔ mɔgɔw cɛma.” (Yirali 14:1, 4 kalan, ABM). Mɔgɔ 144 000 nunu ye kerecɛn kantigiw ye. Ala y’u sugandi walisa u ka fara Yezu kan ka dugukolo mara. U mana sa, u be kunu ka taga sankolo la (Yirali 5:10). Kabi Yezu ka cidenw ka wagati la, Jehova y’a daminɛ ka kerecɛn kantigiw sugandi walisa u ka kɛ masacɛ 144 000 nunu dɔw ye.

10. Jehova ye Yezu ni mɔgɔ 144 000 sigi masaya la adamadenw kun na. Mun na o ye kanuyako ye?

¹⁰ Jehova b’a janto an na kosɔbɛ. O lo kama, a ye labɛn kɛ walisa mɔgɔ dɔw ka masaya kɛ ni Yezu ye. Yezu bena kɛ Masacɛ ɲuman ye sabu a b’an faamu. A kɛra adamaden cogoya la ka ye ani a tɔɔrɔla. Pol y’a fɔ ko Yezu be makari an na ani a be se “k’an faamu an ka dɛsɛyɔrɔ la. A ye kɔrɔbɔli sifa bɛɛ sɔrɔ i n’a fɔ anw.” (Eburuw 4:15; 5:8). Mɔgɔ 144 000 nunu fana b’an faamu sabu u tun ye adamadenw ye. Dafabaliyakow ye u tɔɔrɔ ani u ye banaw muɲu. O kama, an be se ka la a la ko Yezu ni mɔgɔ 144 000 nunu b’an ka dusukunnakow n’an ka kunkow faamu.

11. Mun na Yezu y’a fɔ a ka kalandenw ye ko u ka delili kɛ walisa Ala sago ka kɛ sankolo la?

¹¹ Mun na Yezu ko a ka kalandenw ka delili kɛ walisa Ala sago ka kɛ sankolo la? Kalansen 3nan na, an y’a ye ko Sutana Naafigi murutira Jehova ma. Jehova y’a to ale ni jinaw, o kɔrɔ mɛlɛkɛ murutininw, ka wagati dɔɔni kɛ sankolo la. O wagati la, bɛɛ tun tɛ Ala sago kɛra sankolo la. Kalansen 10nan na, an bena koo wɛrɛw kalan Sutana ni jinaw koo la.

12. Yirali 12:10 be kooba fila jumanw lo lakali?

¹² Bibulu b’a ɲɛfɔ ko wagati dɔɔni Yezu siginin kɔ Ala ka Masaya kun na, a tun bena Sutana kɛlɛ (Yirali 12:7-10 kalan). Vɛrise 10nan kɔnɔ, kooba fila lakalila. A fɔlɔ, Ala ka Masaya sigira sen kan ani Yezu lo ye Masacɛ ye. A filanan, Sutana gwɛnna ka jigi dugukolo kan. O koow kɛra ka ban. Kɔfɛ an bena baro kɛ o kan.

13. Mun lo kɛra sankolo la Sutana gwɛnnin kɔ?

¹³ Bibulu b’a fɔ ko Sutana n’a ka jinaw gwɛnnin kɔ ka bɔ sankolo la, mɛlɛkɛ kantigimanw ninsɔndiyara. An b’a kalan ko: “O de kosɔn, sankolow ani u kɔnɔ fɛnw, aw ka ɲagali.” (Yirali 12:12, ABM). Sisan, bɛɛn ni hɛɛrɛ be sankolo la kosɔbɛ sabu bɛɛ be Ala sago kɛra yen.

14. Mun lo kɛra dugukolo kan sabu Sutana gwɛnna ka bɔ sankolo la?

¹⁴ Nka dugukolo kan, koow be cogo wɛrɛ la. Bɔnɛ be adamadenw kan sabu “Sutana dimininba jigira aw fɛ. A b’a lɔn ko a halakilon tɔɔ man jan tugu.”  (Yirali 12:12). Sutana dimininba lo. A gwɛnna ka bɔ sankolo la ani a b’a lɔn ko yanni dɔɔni a bena halaki. A b’a seko bɛɛ kɛra ka bɔnɛ ni tɔɔrɔ lase dugukolo kuru bɛɛ kan.

15. Ala sagonata ye mun lo ye dugukolo koo la?

¹⁵ Nka Ala sagonata ye min ye dugukolo koo la, o ma yɛlɛma. Ala bele b’a fɛ mɔgɔ dafaninw ka ɲɛnamaya kɛ fɔɔ abada alijɛnɛ kɔnɔ dugukolo kan (Zaburuw 37:29). Ala ka Masaya bena o dafa cogo di?

16, 17. Daniyɛli 2:44 be mun lo yira Ala ka Masaya koo la?

¹⁶ Daniyɛli 2:44 b’a fɔ ko: “Ayiwa, o masa nunu ka tile la, Sankolotigi Ala ben’a kɛ masacɛ wɛrɛ be wili min ka masaya tena nagasi abada, a ka masaya tena bɔ a bolo ka di siya wɛrɛ ma. Ale bena masaya tɔ nunu bɛɛ ka koo nagasi ka ban pewu. Ale bena to a ka masaya la tuma bɛɛ.” O kiraya kuma be mun lo yira Ala ka Masaya koo la?

¹⁷ A fɔlɔ, a b’a yira ko Ala ka Masaya tun bena sigi sen kan “o masa nunu ka tile la.” O kɔrɔ ko, tuma min na Ala ka masaya tun bena kuntigiya daminɛ, gofɛrɛnɛman wɛrɛw tun bena kɛ hali bi dugukolo kan. A filanan, o kiraya kuma b’a yira ko Ala ka Masaya bena to kudayi ani gofɛrɛnɛman si tɛna sigi a nɔɔ na abada. A sabanan, kɛlɛ bena kɛ Ala ka Masaya ni duniɲa ka gofɛrɛnɛmanw cɛ. Ala ka Masaya lo bena see sɔrɔ u bɛɛ kan ani ale kelenpe lo bena dugukolo mara. O la, adamadenw bena gofɛrɛnɛman ɲuman sɔrɔ min ɲɔgɔn ma deli ka kɛ yen.

18. Kɛlɛ laban min bena kɛ Ala ka Masaya ni adamadenw ka gofɛrɛnɛmanw cɛ, o tɔgɔ ko di?

¹⁸ Ala ka Masaya bena dugukolo bɛɛ mara cogo di?  Sanni Arimagedɔn kɛlɛ ka se, mɛlɛkɛ juguw bena ngalon jɛnsɛn walisa ka “diɲɛ kɔnɔ masaw lajɛn ɲɔgɔn kan waasa ka kɛlɛ wili Setigi Ala ka lonba loon na.” Adamadenw ka gofɛrɛnɛmanw bena Ala ka masaya kɛlɛ. O kɛlɛ laban lo be weele ko Arimagedɔn.—Yirali 16:14, 16; Kunnafoni wɛrɛw lajɛ, a 10nan.

19, 20. Mun na an mako b’a la ko Ala ka Masaya ka dugukolo mara?

¹⁹ Mun na an mako be Ala ka Masaya la? An mako b’a la kuun saba ɲɔgɔn kosɔn. A fɔlɔ, an ye jurumutɔw ye, ani o kama an be bana ani an be sa. Nka, Bibulu b’a fɔ ko Ala ka Masaya wagati la, an bena ɲɛnamaya kɛ fɔɔ abada. Bibulu yɛrɛ b’a fɔ ko: “Ala ye diɲɛ kanu haali, fo a ye a Denkɛ kelenpe di, walisa mɔgɔ o mɔgɔ dara a Denkɛ la, o kana halaki, nka o ka ɲɛnamaya banbali sɔrɔ.”—Zan 3:16, ABM.

²⁰ Kuun filanan min kama an mako be Ala ka Masaya la, o ye ko duniɲa fanin be mɔgɔ juguw la. Mɔgɔ caaman be ngalon tigɛ, u be nanbara kɛ ani ka jatɔya kɛ. See t’an ye k’o mɔgɔw tunu ka bɔ duniɲa kɔnɔ. Nka, Ala bena u tunu ka bɔ yen. Minw be to ka koo jugu kɛ, olu bena halaki Arimagedɔn tuma na (Zaburuw 37:10 kalan). Kuun sabanan, o ye ko adamadenw ka gofɛrɛnɛmanw ka jugu ani u be nanbarakow kɛ. U tɛ mɔgɔw dɛmɛ ka Ala sago kɛ. Bibulu b’a fɔ ko: “Adamaden le be kuntigiya kɛ a tɔɲɔgɔn kan k’a tɔɔrɔ.”—Waajulikɛla 8:9.

21. Cogo di Ala ka Masaya ben’a kɛ Ala sago be kɛ dugukolo kan?

²¹ Arimagedɔn kɛlɛ kɔ, Ala ka Masaya bena kɛ sababu ye Ala sago be kɛ dugukolo kan. Ɲɛyirali fɛ,  a bena Sutana n’a ka jinaw halaki (Yirali 20:1-3). A laban, mɔgɔ si tɛna bana wala ka sa tugun. Kunmabɔsara sababu la, mɔgɔ kantigiw bena se ka sigi alijɛnɛ kɔnɔ fɔɔ abada (Yirali 22:1-3). Ala ka Masaya bena Ala tɔgɔ saniya. O kɔrɔ ko, wagati min na Ala ka gofɛrɛnɛman bena dugukolo mara, mɔgɔ bɛɛ bena bonya la Jehova tɔgɔ kan.—Kunnafoni wɛrɛw lajɛ, a 21nan.

22. Ka Yezu to dugukolo kan wala a suu kununi kɔ dɔrɔn, a ma kɛ Masacɛ ye. An b’o lɔn cogo di?

²² Yezu ko a ka kalandenw ka Ala deli ko: “I ka masaya ka na.” A gwɛnin lo ko Ala ka Masaya tun ma na fɔlɔ. Jehova tun bena a ka Masaya sigi fɔlɔ ka sɔrɔ ka Yezu sigi a kun na. Yezu yɛlɛnin kɔ sankolo la, yala a sinna ka kɛ Masacɛ ye wa? Ayi, a tun ka ɲi  ka kɔnɔni kɛ fɔlɔ. Piyɛri ni Pol y’o lo yira ka gwɛ. Dɔɔni Yezu suu kununi kɔ, u y’a fɔ ko Zaburu 110:1 ka kiraya kuma ɲɛsinna Yezu lo ma. Jehova y’a fɔ o kiraya kuma kɔnɔ ko: “Sigi ne kinibolo fɛ fɔɔ ne k’i juguw cɔnkɔn i seen kɔrɔ.” (Kɛwaliw 2:32-35; Eburuw 10:12, 13). Jehova tun bena Yezu kɛ Masacɛ ye. Nka, Yezu tun ka kan ka kɔnɔni kɛ fɔɔ wagati juman?

23. a) Yezu sigira Ala ka Masaya kun na tuma juman? b) An bena mun lo lajɛ kalan nata la??

²³ Saan caaman ka kɔn saan 1914 ɲɛ, kerecɛn sɔbɛ dɔw y’a faamu ko saan 1914 kɔrɔtanin lo Bibulu ka kiraya kuma kɔnɔ. Koo minw kɛra duniɲa kɔnɔ kabi o saan na, u b’a yira k’o kerecɛnw tun ma fili. O saan lo la Yezu sigira Masaya la (Zaburuw 110:2). Dɔɔni o kɔ, Sutana gwɛnna ka jigi dugukolo kan. Sisan, “a halakilon tɔɔ man jan tugu.” (Yirali 12:12). Kalan nata la, an bena koo wɛrɛw lajɛ minw b’a yira ko an b’o wagati lo la. An bena a ye fana ko yanni dɔɔni, Ala ka Masaya ben’a kɛ Ala sago be kɛ dugukolo kan.—Kunnafoni wɛrɛw lajɛ, a 22nan.