1. Gafe nin kalannin kɔ koɲuman, i ka ɲi k’i yɛrɛ ɲininga mun lo la?

GAFE nin kalan y’i dɛmɛ ka koo caaman faamu Bibulu kɔnɔ minw ye tiɲɛn ye, i n’a fɔ: Ala ye layidu min ta ɲɛnamaya banbali koo la, suuw cogoya ani sukununi jigiya (Waajulikɛla 9:5; Luka 23:43; Zan 5:28, 29; Yirali 21:3, 4). N’a sɔrɔ i y’a daminɛ ka taga Jehova Seerew ka lajɛnw na ani i lara a la ko u ka batoli ye tiɲɛn ye (Zan 13:35). N’a sɔrɔ i fana y’a daminɛ ka jɛnɲɔgɔnya teriman kɛ ni Jehova ye ani i  y’a latigɛ ka baara kɛ a ye. O la, i be se k’i yɛrɛ ɲininga ko: “Ne ka ɲi ka mun lo kɛ sisan walisa ka baara kɛ Ala ye?”

2. Mun na Etiyopika dɔ tun b’a fɛ ka batize?

² Etiyopika dɔ y’a yɛrɛ ɲininga o lo la Yezu wagati la. Dɔɔni Yezu suu kununi kɔ, a ka kalanden Filipu y’o cɛɛ waaju. Filipu y’a yira a la ka gwɛ ko Yezu lo ye Masiya ye. A ka kumaw ye Etiyopika dusu sɔrɔ fɔɔ o cɛɛ sinna k’a fɔ ko: “Jii filɛ nin ye, mun be se k’i bali ka ne batize?”—Kɛwaliw 8:26-36.

3. a) Yezu ye cikan juman lo di a ka kalandenw ma? b) Mɔgɔ ka kan ka batize cogo juman na?

³ Bibulu b’a fɔ ka gwɛ ko n’i b’a fɛ ka Jehova sago kɛ, fɔɔ i ka batize. Yezu y’a fɔ a ka kalandenw ye ko: “Aw ye taga siyaw bɛɛ kɛ ne ka kalandenw ye k’u batize.” (Matiyo 28:19). Yezu yɛrɛ ye ɲɛyirali di an ma a kɛtɔ ka batize. U ma jii seriseri a kuun kan dɔrɔn nka, u y’a fari kuturu bɛɛ lo tunu jii kɔnɔ (Matiyo 3:16). Bi fana, n’u b’a fɛ ka mɔgɔ batize k’a kɛ kerecɛn ye, u ka kan k’a tigi fari kuturu bɛɛ lo tunu jii kɔnɔ.

4. I be mun lo yira bɛɛ la i ka batɛmu fɛ?

⁴ Batɛmu fɛ, i b’a yira bɛɛ ɲɛɛ na ko i b’a fɛ sɔbɛ la ka kɛ Ala teri ye ani ka baara kɛ a ye (Zaburuw 40:8, 9). O kama, i be se k’i yɛrɛ ɲininga ko: “Ne ka kan ka mun lo kɛ walisa ka batize?”

5. a) I ka kan ka mun lo kɛ fɔlɔ ka sɔrɔ ka batize? b) Mun na nafa b’a la kosɔbɛ i ka taga an ka lajɛnw na?

⁵ I ka kan k’a ɲini ka lɔnniya sɔrɔ Jehova ni Yezu  koo la fɔlɔ ka sɔrɔ ka batize. Tiɲɛn lo ko i y’a daminɛ k’o lo kɛ i ka bibulukalan sababu fɛ (Zan 17:3 kalan). Nka, o dama tɛ bɔri kɛ. Bibulu b’a fɔ ko i ka kan ka Jehova “sago lɔn kosɔbɛ.” (Kɔlɔsikaw 1:9). Jehova Seerew ka lajɛnw bena i dɛmɛ ka teriya kɛ ni Jehova ye. O lo kama nafa b’a la kosɔbɛ i ka to ka taga o lajɛnw na.—Eburuw 10:24, 25.

6. Sanni i ka batize, i ka kan ka Bibulu lɔn ka se hakɛ juman ma?

⁶ Jehova t’a ɲini i fɛ i ka Bibulu bɛɛ lɔn ka sɔrɔ ka batize. A m’a ɲini Etiyopika nin fɛ a ka fɛɛn bɛɛ lɔn ka sɔrɔ ka batize (Kɛwaliw 8:30, 31). An bena to ka lɔnniya sɔrɔ Ala koo la fɔɔ abada (Waajulikɛla 3:11). Nka sanni i ka batize, i ka ɲi ka Bibulu ka kalan jɔnjɔnw kɔni lɔn ani ka sɔn u la.—Eburuw 5:12.

7. I ka bibulukalan y’i dɛmɛ cogo di?

⁷ Bibulu b’a fɔ ko: “Mɔgɔ koo te se ka diya Ala ye n’o tigi ma l’a la.” (Eburuw 11:6). O kama, i ka kan ka limaniya Ala la ka sɔrɔ ka batize. Bibulu b’a fɔ ko Korɛntika dɔw tun ye Yezu ka kalandenw ka waajuli lamɛn minkɛ, ‘u lara Matigi la, ani u batizera.’ (Kɛwaliw 18:8). O cogo kelen na, i ka bibulukalan ye i dɛmɛ ka la Ala ka layiduw la. A y’i dɛmɛ fana ka limaniya ko Yezu ka saraka be se k’an kisi jurumu ni saya ma.—Zozuwe 23:14; Kɛwaliw 4:12; 2 Timote 3:16, 17.

8. I ye koo minw kalan, mun lo bena i lasun k’u fɔ mɔgɔw ye?

⁸ N’i tora ka Bibulu ka kalanw lɔn ani i y’a ye ko  a ka ladiliw b’i dɛmɛna, dɔ bena fara i ka limaniya barika kan. I ye min kalan, a nege bena kɛ i la k’o fɔ mɔgɔw ye (Zeremi 20:9; 2 Korɛntikaw 4:13). Nka, i ka ɲi k’u fɔ jɔn lo ye?

9, 10. a) I ye min kalan, i be se k’a daminɛ k’o kofɔ jɔn lo ye? b) N’i b’a fɛ ka waajuli kɛ ni kafo ye, i ka ɲi ka mun lo kɛ do?

⁹ I ye min kalan, n’a sɔrɔ a bena diya i ye k’o fɔ i somɔgɔw, i teriw, i sigiɲɔgɔnw ani i ka baarakɛɲɔgɔnw ye. O ye koo ɲuman ye. Nka, i k’o kɛ ni ɲumanya ni kanuya ye tuma bɛɛ. Wagati dɔ bena se, i bena se ka waajuli kɛ ni kafo ye. N’i y’a ye ko i labɛnnin lo k’o kɛ, Jehova Seere min be bibulukalan kɛra n’i ye, i k’o fɔ a ye. N’ale y’a ye ko i labɛnnin lo tiɲɛn na ani ko i be Bibulu ka sariyaw labato, o la, diinan mɔgɔkɔrɔ fila bena baro kɛ ni aw ye.

¹⁰ Mun lo bena kɛ o ɲɔgɔnye la do? Diinan mɔgɔkɔrɔw bena baro kɛ n’i ye k’a filɛ n’i be Bibulu ka kalan jɔnjɔnw faamu ani i lanin b’u la. U bena a filɛ fana n’i be Bibulu ka sariyaw labato loon o loon, ani n’i b’a fɛ sɔbɛ la ka kɛ Jehova Seere dɔ ye. I hakili to a la ko diinan mɔgɔkɔrɔw b’u janto kafodenw bɛɛ la, hali ele yɛrɛ. O kama, kana siran ka kuma u fɛ (Kɛwaliw 20:28; 1 Piyɛri 5:2, 3). O ɲɔgɔnye kɔ, diinan mɔgɔkɔrɔw bena a fɔ i ye n’i be se ka waajuli daminɛ ni kafo ye.

11. Mun na a ka ɲi i ka yɛlɛmani dɔw kɛ ka sɔrɔ ka waajuli daminɛ ni kafo ye?

¹¹ N’a sɔrɔ diinan mɔgɔkɔrɔw bena a fɔ i ye ko i ka kan ka yɛlɛmani wɛrɛw kɛ ka sɔrɔ ka waajuli daminɛ ni kafo ye. Mun na a ka ɲi i k’o yɛlɛmaniw kɛ do? An ye  Jehova ka lasigidenw ye sabu an b’a kofɔ mɔgɔw ye. O kama, an ka ɲɛnamaya kɛcogo ka kan ka bonya la a kan.—1 Korɛntikaw 6:9, 10; Galatikaw 5:19-21.

12. Mun na bɛɛ lo ka kan ka nimisa?

¹² I ka kan ka koo wɛrɛ kɛ ka sɔrɔ ka batize. Ciden Piyɛri y’a fɔ ko: “Aw ye nimisa ka faran aw ka hakɛw la ka segi Ala ma, janko a k’aw ka hakɛw yafa.” (Kɛwaliw 3:19). Ka nimisa, o kɔrɔ ko di? O kɔrɔ ko i ye koo jugu minw kɛ, o tun-k’a-lɔn b’i sɔrɔ. Ɲɛyirali fɛ, n’i tun be kakalayakow kɛ, fɔɔ i ka nimisa. Hali n’i tun b’i jija ka koo ɲuman kɛ, waajibi lo i ka nimisa fana. Mun na do? Sabu an bɛɛ be jurumu kɛ ani an mako b’a la ka Ala deli a k’an ka jurumuw yafa.—Ɔrɔmukaw 3:23; 5:12.

13. Ka “segi Ala ma,” o kɔrɔ ko di?

¹³ Ka nimisa an ka jurumuw na, yala o dɔrɔn be bɔri kɛ wa? Ayi. O tɛ bɔri kɛ! Ciden Piyɛri ko: “Aw ye . . . segi Ala ma.” O kɔrɔ ko an ka kan ka koo jugu sifa bɛɛ dabila ani k’a daminɛ ka koo tilennin kɛ. Ɲɛyirali fɛ, miiri k’a filɛ ko i be tagara dugu dɔ la ani i siɲɛ fɔlɔ lo ka taga o yɔrɔ la. Wagati dɔ nana se, i y’a kɔrɔsi ko i filila sira ma. I bena mun lo kɛ do? Siga t’a la, i bena lɔ ani ka kɔsegi walisa ka sira ɲuman ta. O cogo kelen na, bibulukalan kɛtɔ, i be se k’a kɔrɔsi ko i ka kan ka yɛlɛmani dɔw kɛ wala ka delinanko dɔw dabila. I ka sɔn ka “segi Ala ma.” O kɔrɔ ko, i ka sɔn ka yɛlɛmaniw kɛ. O kɔ, i k’a daminɛ ka koo tilennin kɛ.

14. K’i yɛrɛkun di Ala ma, o kɔrɔ ko di?

¹⁴ Kooba wɛrɛ be yen i ka kan ka min kɛ ka sɔrɔ ka batize. I ka kan k’i yɛrɛkun di Jehova ma. K’i yɛrɛkun di Jehova ma, o kɔrɔ ko i be delili kɛ k’i daa di a ma ko i bena ale dɔrɔn lo bato ani k’a sago kɛ i ɲɛnako fɔlɔ ye.—Deteronɔmu 6:15.

15, 16. Mun lo be mɔgɔ lasun a k’a yɛrɛkun di Ala ma?

¹⁵ K’i daa di ko i bena Jehova dɔrɔn sago kɛ, a be komi k’i daa di i ka mɔgɔ kanulen ma ko i bena i ka ɲɛnamaya tɔɔ bɛɛ kɛ n’a ye. Miiri k’a filɛ: Cɛɛ dɔ be teriya kɛra ni muso dɔ ye furu kama. N’a tora k’o muso lɔn ka ɲɛ, a koo bena diya a ye ani a bena a ɲini k’a furu. Hali ni o ye desizɔnba ye, o cɛɛ labɛnnin lo ka sɔn furu kunkanbaara ma sabu a be o muso kanu.

¹⁶ N’i tora ka Jehova lɔn ka ɲɛ, i bena a kanu ani i bena a ɲini k’i seko bɛɛ kɛ k’a sago kɛ. O bena i lasun k’i daa di a ma delili la ko i bena a sago kɛ. Bibulu b’a fɔ ko mɔgɔ o mɔgɔ b’a fɛ ka tugu Yezu kɔ, o tigi ka kan ka “ban a yɛrɛ la.” (Mariki 8:34, ABM). O kɔrɔ ko di? O kɔrɔ ko min ka ɲi ka kɛ i ɲɛnako fɔlɔ ye, o ye ka mɛnni kɛ Jehova fɛ. Jehova be min fɛ, o kɔrɔtanin lo ka tɛmɛ e negelakow n’i ɲɛnakow kan.—1 Piyɛri 4:2 kalan.

17. Mun na dɔw t’a fɛ k’u yɛrɛkun di Jehova ma?

¹⁷ Dɔw t’a fɛ k’u yɛrɛkun di Jehova ma sabu u be siran ko u tɛna se ka kantigiya kɛ a ye. U t’a fɛ ka Jehova dusu tiɲɛ wala n’a sɔrɔ u b’a miiri ko n’u  ma u yɛrɛkun di Jehova ma, a tɛna u ɲininga u ka kɛwalew la.

18. Mun lo bena i dɛmɛ i kana siran ko i bena Jehova dusu tiɲɛ?

¹⁸ Komi i be Jehova kanu, o bena i dɛmɛ i kana siran ko i bena a dusu tiɲɛ. I bena i seko bɛɛ kɛ fana k’i ka layidu dafa (Waajulikɛla 5:3; Kɔlɔsikaw 1:10). I tɛna a miiri ko a ka gwɛlɛ kojugu ka Jehova sago kɛ. Ciden Zan y’a sɛbɛ ko: “K’a fɔ ko Ala koo ka d’i ye, o be bɔ a ka ciiw batocogo la. A ka ciiw batoli fana man gwɛlɛ.”—1 Zan 5:3.

19. Mun na i man kan ka siran k’i yɛrɛkun di Jehova ma?

¹⁹ Waajibi tɛ i ka kɛ mɔgɔ dafanin ye ka sɔrɔ k’i yɛrɛkun di Jehova ma. A tɛ koo si ɲini an fɛ abada min be tɛmɛ an seko daan kan (Zaburuw 103:14). A bena i dɛmɛ ka koo ɲuman kɛ (Ezayi 41:10). I k’i jigi bɛɛ la Jehova kan. O la, “a bena i ka sira gwɛya i ye.”—Talenw 3:5, 6.

20. N’i ye i yɛrɛkun di Jehova ma, i ka kan ka mun lo kɛ o kɔ?

²⁰ E ka miiri la, yala i labɛnnin lo k’i yɛrɛkun di Jehova ma wa? N’i ye i yɛrɛkun di Jehova ma ka ban, i labɛnnin lo ka koo wɛrɛ kɛ: i ka kan ka batize.

21, 22. I be se k’i ka limaniya “kofɔ bɛɛ ɲɛɛ na” cogo di?

²¹ A fɔ diinan mɔgɔkɔrɔw jɛnkulu ka koow labɛnbaga ye ko i ye i yɛrɛkun di Jehova ma ani ko i b’a fɛ ka batize. A bena labɛn kɛ walisa diinan mɔgɔkɔrɔ dɔw ka baro kɛ n’i ye Bibulu ka kalan  jɔnjɔnw koo la. N’o diinan mɔgɔkɔrɔw sɔnna a la ko i be saratiw dafa, u bena a fɔ i ye ko i be se ka batize Jehova Seerew ka lajɛnba nata la. O lajɛnba la, kalan dɔ bena kɛ ka batɛmu kɔrɔ ɲɛfɔ. Kalankɛla bena a ɲini batɛmu ɲinilaw fɛ, u ka ɲiningali nɔgɔman fila  jaabi walisa k’u ka limaniya “kofɔ bɛɛ ɲɛɛ na.”—Ɔrɔmukaw 10:10, NW.

²² O kɔ, i bena batize. Walisa k’i batize, balimacɛ dɔ bena i fari kuturu bɛɛ tunu jii kɔnɔ. Batɛmu fɛ, i b’a  yira bɛɛ ɲɛɛ na ko i ye i yɛrɛkun di Jehova ma ani ko sisan i kɛra Jehova Seere dɔ ye.

23. Ka batize “Faa, ni Dencɛ ni Nii Senuman tɔgɔ la,” o kɔrɔ ko di?

²³ Yezu y’a fɔ ko a ka kalandenw bena batize “Faa, ni Dencɛ ni Nii Senuman tɔgɔ la.” (Matiyo 28:19 kalan). O kɔrɔ ko di? O kɔrɔ ko i be sɔn Jehova ka kuntigiya ma. I fana be sɔn ko Yezu be ni lɔyɔrɔba ye Ala sagonata koo la ani ko Ala b’a sago dafa hakili senu barika la.—Zaburuw 83:19; Matiyo 28:18; Galatikaw 5:22, 23; 2 Piyɛri 1:21.

24, 25. a) Batɛmu kɔrɔ ye mun ye? b) An bena kuma mun lo koo la kalansen laban na?

²⁴ Batɛmu ye fɛɛn dɔ tagamasiɲɛ lo ye min kɔrɔtanin lo kosɔbɛ. N’i fari kuturu bɛɛ tununa jii kɔnɔ, o b’a yira ko i ye i ka ɲɛnamaya kɛcogo kɔrɔ dabila. N’i bɔra jii la, o kɔrɔ ko i be nana ɲɛnamaya kɛcogo kura daminɛ Ala sago kɛli la. O b’a yira ko kabi sisan i bena baara kɛ Jehova ye. I hakili to a la ko i ma i yɛrɛkun di adamaden, jɛnkulu, wala baara dɔ ma. I ye i yɛrɛkun di Jehova lo ma.

²⁵ Komi i ye i yɛrɛkun di Jehova ma, o bena i dɛmɛ ka teriya sɔbɛ kɛ n’a ye (Zaburuw 25:14). Nka, batɛmu dɔrɔn lo t’a to mɔgɔ be kisi. Ciden Pol y’a sɛbɛ ko: “Aw ka jija ka baara kɛ aw ka kisili kosɔn ni Alaɲasiran ye kosɔbɛ.” (Filipikaw 2:12). Batɛmu ye koow daminɛ dɔrɔn lo ye. Nka, i magwɛrɛnin be se ka to Jehova la cogo di? An bena o ɲiningali jaabi kalansen laban na.