1, 2. a) N’i be mɔgɔba dɔ tɔgɔ dɔrɔn lɔn, o b’a yira ko i b’a tigi lɔn ka ɲɛ wa? A ɲɛfɔ. b) Mɔgɔw be mun lo miiri Yezu koo la?

MƆGƆ caaman tɔgɔ bɔra duniɲa kɔnɔ. N’a sɔrɔ i yɛrɛ be mɔgɔba dɔ tɔgɔ lɔn. Nka, o kɔrɔ tɛ ko i b’o tigi lɔn ka ɲɛ ani ko i b’a sɔɔn n’a ka kɛtaw bɛɛ lɔn.

² Yezu ye ɲɛnamaya kɛ dugukolo kan a saan 2 000 ɲɔgɔn ye nin ye. O bɛɛ n’a ta, n’a sɔrɔ i y’a koo mɛn ka ye. Nka, mɔgɔw fanba t’a lɔn Yezu tun ye mɔgɔ tigitigi min ye. Dɔw b’a fɔ ko a tun ye mɔgɔ ɲuman ye. Dɔw ko a tun ye kira ye. Dɔ wɛrɛw ko Yezu ye Ala ye. Ele ko di?—Kunnafoni wɛrɛw lajɛ, a 12nan.

3. Mun na a kɔrɔtanin lo i ka Jehova Ala ni Yezu Krista lɔn?

³ A kɔrɔtanin lo i ka tiɲɛn lɔn Yezu koo la. Mun na do? Bibulu b’a fɔ ko: “Ɲɛnamaya banbali ye nin de ye ko, u bɛ e dɔn ko i ye Ala sɛbɛ kelenpe ye, ka Yesu Krisita dɔn, i ye o min ci.” (Zan 17:3, ABM). O kɔrɔ ko n’i ye tiɲɛn lɔn Jehova ni Yezu koo la, i bena se ka ɲɛnamaya banbali sɔrɔ alijɛnɛ kɔnɔ dugukolo kan (Zan 14:6). Ka fara o kan, n’i ye tiɲɛn lɔn Yezu koo la, o bena i dɛmɛ. Cogo di do? An ka ɲi ka ɲɛnamaya kɛ ani ka mɔgɔw minɛ cogo min na, Yezu lo y’o ɲɛyira an na cogo fisaman na (Zan 13:34, 35). Kalansen fɔlɔ la, an ye tiɲɛn lɔn Ala koo la. Sisan, an k’a filɛ Bibulu be min fɔ Yezu koo la.

4. N’u ko “Masiya” wala “Krista,” o kɔrɔ ko di?

⁴ Wagatijan sanni Yezu ka wolo, Jehova kɔnna k’a fɔ Bibulu kɔnɔ ko ale bena Masiya, wala Krista, ci ka na dugukolo kan. “Masiya”, o ye Heburukan ye. “Krista,” o ye Gɛrɛkikan ye. O bonyali tɔgɔ fila bɛɛ kɔrɔ ko Ala ye mɔgɔ min sugandi ani ka lɔyɔrɔba di ma. Ala ka layiduw bɛɛ bena dafa Masiya sababu la. Yezu be se k’i dɛmɛ kabini sisan yɛrɛ. Nka, sanni Yezu ka wolo, mɔgɔ caaman tun b’u yɛrɛ ɲininga ko: ‘Jɔn lo bena kɛ Masiya ye?’

5. Yezu ka kalandenw tun tɛ sigasiga mun lo la?

⁵ Yezu ka kalandenw tun tɛ sigasiga hali dɔɔni ko Yezu lo ye Masiya ye, Jehova ye layidu ta min koo la (Zan 1:41). Ɲɛyirali fɛ, Simɔn Piyɛri y’a fɔ Yezu ma ko: ‘I ye Krista ye.’ (Matiyo 16:16, ABM). An be se ka la a la cogo di ko Yezu lo ye Masiya ye?

6. Jehova ye mɔgɔ kɔnɔgwɛw dɛmɛ cogo di u ka se ka Masiya faranfasi k’a lɔn?

⁶ Wagatijan sanni Yezu yɛrɛ ka wolo, Ala ka kiraw ye koo caaman sɛbɛ minw tun bena mɔgɔw dɛmɛ ka Masiya lɔn. Cogo di do? Miiri k’a filɛ: N’u ye i ci ko i ka taga mɔgɔ dɔ kunbɛn mobili gari la jamaba cɛma. I do m’o tigi ye ka ye. N’u y’o tigi cogoya lakali i ye ka ɲɛ, i bena se k’a faranfasi k’a lɔn. O cogo kelen na, Jehova tɛmɛna a ka kiraw fɛ k’a yira Masiya tun bena min kɛ ani koo minw tun bena a sɔrɔ. O kiraya kumaw bɛɛ dafara. O be mɔgɔ kɔnɔgwɛw dɛmɛ u k’a lɔn ko Yezu lo ye Masiya ye.

7. Kiraya kuma fila fɔ minw b’a yira ko Yezu lo ye Masiya ye.

⁷ An ka kiraya kuma fila lajɛ. A fɔlɔ, saan 700  ka kɔn Yezu wolotuma ɲɛ, kira Mise kɔnna k’a fɔ ko Masiya bena wolo dugu dennin dɔ la min tɔgɔ ko Bɛtilehɛmu (Mise 5:1). Yezu wolola o yɔrɔ lo la (Matiyo 2:1, 3-9). A filanan, kira Daniyɛli kɔnna k’a fɔ ko Masiya bena bɔ kɛnɛ kan saan 29 an tile la (Daniyɛli 9:25). An ye kiraya kuma fila dɔrɔn lo lajɛ. U b’a yira ka gwɛ ko layidu tara Masiya min koo la, o ye Yezu lo ye. Kiraya kuma caaman wɛrɛw be yen.—Kunnafoni wɛrɛw lajɛ, a 13nan.

8, 9. Yezu batize tuma na, mun lo kɛra min b’a yira ko Yezu lo ye Masiya ye?

⁸ Jehova y’a yira ka gwɛ ko Yezu lo ye Masiya ye. A y’a fɔ ko a bena tagamasiɲɛ dɔ yira Zan batizelikɛla la walisa k’a dɛmɛ ka Masiya lɔn. Zan y’o tagamasiɲɛ ye tuma min na Yezu tagara a fɛ ko a k’ale batize Zurudɛn baji kɔnɔ. O koo kɛra saan 29 an tile la. Bibulu b’a fɔ ko: “Yezu batizenin kɔ, a bɔra jii la. O yɔrɔnin bɛɛ, sankolo dayɛlɛla. Yezu ye Ala ka Nii jigitɔ ye a yɛrɛ kan i n’a fɔ tuganin. Kumakan dɔ bɔra sankolo la k’a fɔ ko: ‘Nin ye ne Dencɛ kanunin ye. A koo ka di ne ye haali.’ ” (Matiyo 3:16, 17). Koo min kɛra, Zan y’o ye ani a y’o mɛn minkɛ, a y’a lɔn ko Yezu lo ye Masiya ye (Zan 1:32-34). Yezu kɛra Masiya ye o loon na, tuma min na Ala ka hakili senu jigira a kan. O cogo la, Ala y’a sugandi k’a kɛ Kuntigi ani Masacɛ ye.—Ezayi 55:4.

 ⁹ Koo nunu y’a yira ko Yezu lo ye Masiya ye: Bibulu ka kiraya kumaw, Jehova yɛrɛ kumakan ani a ye tagamasiɲɛ min yira Yezu batize tuma na. Nka, Yezu bɔra min ka na dugukolo kan? Ani, a tun ye mɔgɔ sifa juman lo ye? An k’a filɛ Bibulu be min fɔ o koo la.

10. Bibulu ka fɔta la, sanni Yezu ka na dugukolo kan, a tun be min?

¹⁰ Bibulu b’a fɔ ko Yezu ye ɲɛnamaya kɛ sankolo la wagatijan kɔnɔ ka sɔrɔ ka na dugukolo kan. Kira Mise y’a fɔ ko Masiya “tun bɛ yen kabini fɔlɔfɔlɔ.” (Mise 5:1, ABM). Yezu yɛrɛ y’a fɔ tuma caaman na ko ale ye ɲɛnamaya kɛ sankolo la ka sɔrɔ ka na wolo adamaden cogo la (Zan 3:13; 6:38, 62; 17:4, 5 kalan). Sanni a yɛrɛ ka na dugukolo kan, jɛnɲɔgɔnya teriman tun be ale ni Jehova cɛ.

11. Mun na Yezu koo ka gwɛlɛ kosɔbɛ Jehova ma?

¹¹ Yezu koo ka gwɛlɛ kosɔbɛ Jehova ma. Mun na do? Sabu Ala kɔnna k’ale lo dan fɛɛn bɛɛ ɲɛ. O kama, Yezu be weele ko “danfɛn bɛɛ la fɔlɔ bangelen.” * (Kɔlɔsikaw 1:15, ABM). Koo wɛrɛ b’a to Yezu koo ka gwɛlɛ kosɔbɛ Jehova ma: Jehova ye ale kelenpe lo dan n’a yɛrɛ bolo ye. O lo y’a to Yezu be weele ko Ala “Denkɛ kelenpe” bangelen (Zan 3:16, ABM). Ka fara o kan, Jehova tɛmɛna Yezu kelenpe lo fɛ ka fɛɛn tɔɔw bɛɛ dan (Kɔlɔsikaw 1:16). Yezu kelenpe lo be weele ko “Kuma,” sabu Jehova tɛmɛna ale lo fɛ k’a ka cikanw lase mɛlɛkɛw ni adamadenw ma.—Zan 1:14.

12. An b’a lɔn cogo di ko Yezu ni Ala tɛ kelen ye?

¹² Dɔw b’a miiri ko Yezu lo ye Ala ye. Nka, Bibulu tɛ o fɔ. Bibulu b’a fɔ ko Ala lo ye Yezu dan. O kɔrɔ ko daminɛ be Yezu la. Nka, Jehova min ye fɛɛn bɛɛ  dan, daminɛ tɛ ale la (Zaburuw 90:2). Yezu ye Ala Dencɛ ye, a m’a ɲini abada k’a yɛrɛ kɛ Ala ye. Bibulu b’a fɔ ka gwɛ ko Faa ka bon ni Dencɛ ye (Zan 14:28 kalan; 1 Korɛntikaw 11:3). Jehova kelenpe lo ye “Ala Sebaayabɛɛtigi” ye (Zɛnɛzi 17:1, ABM). Ale lo ye kɔrɔtaninba ye ani a ka fanga ɲɔgɔn tɛ yen duniɲa kuru bɛɛ kɔnɔ.—Kunnafoni wɛrɛw lajɛ, a 14nan.

13. Mun na Bibulu b’a fɔ ko Yezu ye “Ala jaa ye, an tɛ se ka Ala min ye”?

¹³ Jehova n’a Dencɛ Yezu ye baara kɛ ɲɔgɔn fɛ teriya la saan miliyari caaman kɔnɔ sanni sankolo ni dugukolo ka dan. U koo tun ka di ɲɔgɔn ye kosɔbɛ! (Zan 3:35; 14:31). Yezu y’a faa jogow ladegi koɲuman fɔɔ Bibulu b’a fɔ ko a ye “Ala jaa ye, an tɛ se ka Ala min ye.”—Kɔlɔsikaw 1:15.

14. Cogo juman na Jehova Dencɛ kanulen wolola adamaden cogo la?

¹⁴ Jehova Dencɛ kanulen sɔnna ka bɔ sankolo la ka na wolo dugukolo kan adamaden cogo la. O koo tun be se ka kɛ cogo di? Jehova ye kabako dɔ lo kɛ: A y’a Dencɛ niin ta sankolo la k’a don npogotigi Mariyama wolonugu la. O lo y’a to Yezu facɛ ma kɛ adamaden ye. O cogo la, Mariyama ye dencɛ dafanin wolo k’a tɔgɔ la ko Yezu.—Luka 1:30-35.

15. Mun lo be se k’i dɛmɛ ka Jehova lɔn ka ɲɛ?

¹⁵ I bena koo caaman lɔn Yezu ka ɲɛnamaya n’a jogow koo la n’i ye Matiyo, Mariki, Luka ani Zan ka kitabuw kalan Bibulu kɔnɔ. Yezu bɔnin be a Faa ma tigitigi. O lo kama, i be min kalan Yezu koo  la, o bena i dɛmɛ ka Jehova lɔn ka ɲɛ. Yezu ko: “Ni mɔgɔ min ɲaa lara ne kan, o tigi ye n Faa fana ye.”—Zan 14:9.

16. Yezu ye mɔgɔw kalan mun lo la? O kalan bɔra jɔn lo fɛ?

¹⁶ Mɔgɔ caaman tun be Yezu weele ko “karamɔgɔ” (Zan 1:38; 13:13). A ye mɔgɔw kalan kobaba minw na, u la dɔ ye Ala ka “masaya kibaru diman” ye. O Masaya ye mun lo ye? Sankolola gofɛrɛnɛman lo min bena dugukolo kuru bɛɛ mara ani ka dugaw lase Ala sagokɛlaw ma (Matiyo 4:23). Yezu ye mɔgɔw kalan koo minw na, u bɛɛ bɔra Jehova lo fɛ. A ko: “Ne be mɔgɔw kalan koo minw na, u ma bɔ ne fɛ, u bɔra ne cibaga le fɛ.” (Zan 7:16). Yezu tun b’a lɔn ko Jehova b’a fɛ mɔgɔw ka kibaro diiman nin mɛn: Ala ka Masaya lo bena dugukolo mara.

17. Yezu tun be mɔgɔw kalan min? Mun na a y’a jija o la?

¹⁷ Yezu tun be mɔgɔw kalan min? A tun mana mɔgɔw sɔrɔ yɔrɔ o yɔrɔ: togondaw la, dugubaw la, dugu denninw na, lɔgɔfiyɛw la, batosow la ani soow kɔnɔ. A tun tɛ sigi ka mɔgɔw kɔnɔ u ka na ale fɛ. Ale lo tun ka teli ka taga u fɛ (Mariki 6:56; Luka 19:5, 6). Yezu y’a jija sɔbɛ la ani a ye wagati caaman ta ka mɔgɔw kalan. Mun na do? A tun b’a lɔn ko o lo ye Ala sago ye ani a tun be mɛnni kɛ a Faa fɛ tuma bɛɛ (Zan 8:28, 29). Yezu ye waajuli kɛ kuun wɛrɛ kama: a tun be hinɛ mɔgɔw la (Matiyo 9:35, 36 kalan). A ɲɛɛ tun b’a la ko diinan ɲɛmɔgɔw tɛ tiɲɛn fɔra mɔgɔw ye Ala n’a ka Masaya koo la. O lo kama a tun b’a fɛ ka mɔgɔ caaman dɛmɛ u ka kibaro diiman mɛn.

18. Yezu ka jogo jumanw lo ka di e ye kosɔbɛ?

¹⁸ Yezu tun be mɔgɔw kanu ani a tun b’a janto  u la. A tun ye mɔgɔ ɲuman ye ani mɔgɔw tun tɛ sigasiga ka kuma a fɛ. Hali denmisɛnw tun tɛ siran ka gwɛrɛ a la (Mariki 10:13-16). Yezu tun tɛ mɔgɔ tɔɲɔ abada. Nanbara ni tilenbaliyakow tun ka gwo a ye (Matiyo 21:12, 13). A ka wagati la, cɛɛw tun tɛ musow bonya ani u tun man teli ka joo di musow ma. Nka, Yezu kɔni tun b’u bonya ani a tun be danbe la u kan tuma bɛɛ (Zan 4:9, 27). Yezu majiginin tun lo sɔbɛ la fana. Loon dɔ la yɛrɛ, a y’a ka cidenw seenw ko k’a sɔrɔ baaraden lo tun ka kan k’o kɛ.—Zan 13:2-5, 12-17.

19. Mɔgɔw mako be min na tigitigi, mun lo b’a yira ko Yezu tun b’o lɔn ani ko a tun b’a fɛ k’u dɛmɛ?

¹⁹ Mɔgɔw mako be min na tigitigi, Yezu tun b’o lɔn ani a tun b’a fɛ k’u dɛmɛ. A y’o yira ka gwɛ tuma min na a ye mɔgɔw kɛnɛya cogo kabakoman na Ala ka hakili senu barika la (Matiyo 14:14). Ɲɛyirali fɛ, kunatɔcɛ dɔ gwɛrɛla a la k’a fɔ a ye ko: “N’i sɔnna, i be se ka ne kɛnɛya.” Yezu y’o cɛɛ ka dimi n’a ka tɔɔrɔ ye minkɛ, a hinɛ donna a la. A makari y’a minɛ ani a y’a ɲini k’a dɛmɛ. A y’a bolo sin ka maga cɛɛ la ani a y’a fɔ a ye ko: “N sɔnna, kɛnɛya.” Kunatɔcɛ kɛnɛyara! (Mariki 1:40-42). Miiri k’a filɛ o koo ye min kɛ o cɛɛ la!

20, 21. Yezu ɲɔgɔn tɛ yen Ala kanminɛli koo la. A y’o yira cogo di?

²⁰ Mɔgɔ si ma mɛnni kɛ Ala fɛ ka se Yezu ma. Koo o koo y’a sɔrɔ, ani a juguw ye tɔɔrɔ o tɔɔrɔ la a kan, o si m’a bali ka kantigiya kɛ a Faa ye. Ɲɛyirali fɛ,  Sutana ye Yezu kɔrɔbɔ, nka Yezu ma jurumu kɛ (Matiyo 4:1-11). A somɔgɔ dɔw tun lanin t’a la ko ale lo ye Masiya ye. U yɛrɛ tun b’a fɔ ko: “A kuun wilila.” Nka, Yezu tora ka Ala ka baara kɛ (Mariki 3:21). Tuma min na a juguw fariyara a ma, a m’a ɲini abada ka kojugu kɛ u la. A tora ka kantigiya kɛ Ala ye.—1 Piyɛri 2:21-23.

²¹ Yezu tɔɔrɔla kosɔbɛ ka sɔrɔ ka sa. Nka, a tora kantigiya la (Filipikaw 2:8 kalan). Miiri k’a filɛ a ye koo minw muɲu a salon na: U y’a minɛ, seere juguw y’a jalaki ko a ye Ala tɔgɔ tiɲɛ, kititigɛla nanbaratɔw ye kiti ben a kan, jama y’a lɔgɔbɔ, sɔrɔdasiw y’a tɔɔrɔ ani k’a gwengwe yiri kan. A satuma na, a  kulera ni kaanba ye ko: “Koo bɛɛ dafara.” (Zan 19:30). Nka, tile sabanan loon a sanin kɔ, Jehova y’a lakunu k’a kɛ danfɛn yebali ye (1 Piyɛri 3:18). Lɔgɔkun damanin o kɔ, a kɔsegira sankolo la. O yɔrɔ la, ‘a sigira Ala kinibolo la’ ka kɔnɔni kɛ Ala k’a kɛ Masacɛ ye.—Eburuw 10:12, 13.

22. Yezu ye kantigiya kɛ a Faa ye. O be sababu juman di an ma?

²² Yezu ye kantigiya kɛ a Faa ye. O sababu la, an be se ka ɲɛnamaya banbali sɔrɔ alijɛnɛ kɔnɔ dugukolo kan i ko Jehova tun b’a fɛ cogo min na. Kalansen nata bena a yira cogo min na o bena dafa Yezu ka saya barika la.