Jehova * Ala lo ye cɛɛ fɔlɔ ni muso fɔlɔ ka furu siri. Bibulu b’a fɔ ko a ye muso fɔlɔ dan “ka na n’a ye cɛɛ fɛ.” Adama ninsɔn diyara kosɔbɛ fɔɔ a y’a fɔ ko: “Cɔ! A ɲana! Ne dɔ le ye nin ye, ne kolow dɔ lo!” (Zɛnɛzi 2:22, 23). Jehova bele b’a fɛ mɔgɔ furuninw ka kɛ hɛɛrɛ la.

N’i furula, i be se k’a miiri ko koow bɛɛ bena ɲɛ i bolo. Nka, an ka sɔn a ma ko hali ni cɛɛ n’a muso be ɲɔgɔn kanu cogo o cogo, u bena gwɛlɛya dɔw sɔrɔ (1 Korɛntikaw 7:28). Bibulu ka ladili dɔw be sɔrɔ kitabunin nin kɔnɔ. N’i ye u sira tagama, hɛɛrɛ bena sɔrɔ i ka furu n’i ka denbaya kɔnɔ.—Zaburuw 19:9-12.

BIBULU BE MIN FƆ: Furucɛ lo ye denbaya kuntigi ye.—Efɛzikaw 5:23.

N’i ye furucɛ ye, Jehova b’a ɲini i fɛ i k’i muso minɛ ni dususuman ye (1 Piyɛri 3:7). A ye muso dan k’a kɛ i dɛmɛbaga ye, ani a b’a fɛ i k’a kanu ani ka danbe la a kan (Zɛnɛzi 2:18). I ka kan k’i muso kanu kosɔbɛ fɔɔ ka sɔn k’ale ɲɛnakow bila e taw ɲɛ.—Efɛzikaw 5:25-29.

N’i ye furumuso ye, Jehova b’a ɲini i fɛ i k’i cɛɛ bonya kosɔbɛ. Ala b’a fɛ i k’i cɛɛ dɛmɛ a k’a ka kunkanbaaraw dafa (1 Korɛntikaw 11:3; Efɛzikaw 5:33). A mana min latigɛ, i ka sɔn o ma ani i k’i kɔnɔ gwɛ k’a dɛmɛ (Kɔlɔsikaw 3:18). N’i y’o kɛ, i bena kɛ muso ye min cɛ ka ɲi i furucɛ ni Jehova ɲɛɛ kɔrɔ.—1 Piyɛri 3:1-6.

I BE SE KA MIN KƐ:

• I furuɲɔgɔn ɲininga i be se ka min kɛ walisa ka kɛ furucɛ wala furumuso ɲuman ye hali bi. I tulo malɔ ka mɛnni kɛ, ani i seko kɛ walisa k’i ka furu cogoya fisaya

• I ka muɲuli kɛ. Aw fila bɛɛ mako be wagati la walisa k’a lɔn cogo min na aw be se ka ɲɔgɔn ladiya

BIBULU BE MIN FƆ: I ka kan k’i mako don i furuɲɔgɔn ka koow la (Filipikaw 2:3, 4). A to i furuɲɔgɔn koo ka gwɛlɛya i ma kosɔbɛ. Kana ɲinɛ ko Jehova b’a ɲini a sagokɛlaw fɛ u ka mɔgɔw bɛɛ minɛ ni “dusu sumalen ye.” (2 Timote 2:24, ABM). “Mɔgɔ min be kuma a kunfɛ, a be digi mɔgɔ la i ko murujan. Nga lɔnnikɛla [hakilitigi] ka kuma be mɔgɔ dusu suma.” O kama, i bena min fɔ, i janto o la kosɔbɛ (Talenw 12:18). Jehova ka hakili senu bena i dɛmɛ i ka kuma ni ɲumanya ni kanuya ye.—Galatikaw 5:22, 23; Kɔlɔsikaw 4:6.

I BE SE KA MIN KƐ:

• Ni aw b’a fɛ ka baro kɛ koo sɔbɛ dɔw kan, i ka kɔn ka Jehova deli a k’i dɛmɛ i dusu sumanin ka to ani a k’i dɛmɛ i kana sigasiga i furuɲɔgɔn ka kuma na

• I bena min fɔ, ani i bena a fɔ cogo min na, i ka miiri koɲuman o la

BIBULU BE MIN FƆ: N’i furula, e n’i furuɲɔgɔn be “jɛn ka kɛ kelen ye.” (Matiyo 19:5). O bɛɛ n’a ta, aw bele ye mɔgɔ fila ye ani aw ka koow filɛcogo be se ka kɛ dan na dan na. O kama, a’ y’a ɲini k’a lɔn cogo min na aw be se k’aw ka miiriyaw n’aw ka dusukunnataw kɛ kelen ye (Filipikaw 2:2). A kɔrɔtanin lo aw ka bɛn kelen ma ni aw be koo dɔ latigɛra. Bibulu b’a fɔ ko: “Mɔgɔ ka koo latigɛnin be ɲa ladiliw barika la.” (Talenw 20:18). Ni aw be kooba dɔw latigɛra ɲɔgɔn fɛ, a’ ye tugu Bibulu ka ladiliw kɔ.—Talenw 8:32, 33.

I BE SE KA MIN KƐ:

• I kana dan k’i ka miiriyaw wala kunnafoni dɔw fɔ i furuɲɔgɔn ye dɔrɔn. Nka, i dusukunnataw fɔ a ye fana

• N’i b’a fɛ k’i daa di koo dɔ la, kuma n’i furuɲɔgɔn ye fɔlɔ