Tuma min na Jehova ye denbaya juu sigi, a ye deenw kalifa u bangebagaw ma (Kɔlɔsikaw 3:20, ABM). E min ye bangebaga ye, i ka kunkanbaara lo k’i deen lamɔ walisa a ka Jehova kanu ani a ka kɛ baliku sɔbɛ ye (2 Timote 1:5, ABM; 3:15). I ka kan fana k’a ɲini k’i deen kɔnɔkow lɔn. Kana ɲinɛ ko e yɛrɛ ka ɲɛyirali kɔrɔtanin lo kosɔbɛ. I jija ka Jehova ka Kuma don i yɛrɛ dusukun na fɔlɔ. O la, i bena se k’i deen kalan a la koɲuman.—Zaburuw 40:9.

BIBULU BE MIN FƆ: “Lamɛnni kɛ ka ɲa, nga . . . kana teliya ka kuma.” (Zaki 1:19). A to i deenw k’a ye ko u be se ka kuma i fɛ u sago la. A to fana u k’a lɔn ko i labilanin lo k’u lamɛn n’u b’a fɛ ka kuma n’i ye. I jija hɛɛrɛ ka kɛ i ka denbaya kɔnɔ. O la, i deenw tɛna siran k’u kɔnɔkow fɔ i ye (Zaki 3:18). N’u b’a miiri ko i bena u sɔngɔ wala k’u kɔrɔfɔ, u be se k’u kɔnɔ dogo i la. I ka muɲu i deenw kɔrɔ ani u jigi sigi tuma bɛɛ ko i b’u kanu.—Matiyo 3:17; 1 Korɛntikaw 8:1.

I BE SE KA MIN KƐ:

• N’i deenw b’a fɛ ka kuma i fɛ, i yɛrɛ labila u ye

• To ka kuma n’i deenw ye tuma o tuma. Kana kuma n’u ye gwɛlɛya wagati dɔrɔn na

BIBULU BE MIN FƆ: “Mɔgɔ min be jatiminɛ kɛ koo la, o tigi ta be ɲa.” (Talenw 16:20). I deenw be min fɔ, tuma dɔw la kana dan o ma. A ɲini k’u dusukunnataw faamu. Denmisɛnw ka teli ka koow dama tɛmɛ wala ka fɛɛn dɔw fɔ k’a sɔrɔ u tɛ o lo miiri. “Mɔgɔ min be kuma jaabi k’a sɔrɔ a m’a mɛn ka ɲa, o tigi ye naloman ye.” (Talenw 18:13). Kana dimi joona.—Talenw 19:11.

I BE SE KA MIN KƐ:

• I deen be fɛɛn o fɛɛn fɔ, i jija k’i yɛrɛ minɛ. Banba i kana kuma tigɛ a daa

• Miiri k’a filɛ ele tun be koow jati cogo min na i denmisɛn tuma na

BIBULU BE MIN FƆ: “N deen, sɔn i faa ka ladili ma! Kana ban e bamuso darakan na.” (Talenw 1:8). Jehova ye bangebagaw fila bɛɛ lo kɛ denmisɛnw kuntigiw ye. I ka kan k’i deenw kalan u k’i bonya ani ka mɛnni kɛ i fɛ (Efɛzikaw 6:1-3). Ni bangebagaw ‘ka miiriyaw tɛ kelen ye’, denmisɛnw be se k’o kɔrɔsi (1 Korɛntikaw 1:10). Aw kana ɲɔgɔn sɔsɔ denmisɛnw ɲɛɛ na, n’o tɛ u tɛna aw bonya.

I BE SE KA MIN KƐ:

• A’ ye bɛn kelen ma denmisɛnw kolo cogo la

• Ni e n’i furuɲɔgɔn tɛ bɛnna kelen ma denmisɛnw lamɔ cogo la, a ɲini k’a ka miiriyaw faamu

BIBULU BE MIN FƆ: “Siraɲuman don i deen wilitɔkura seen kɔrɔ.” (Talenw 22:6). I tɛna se k’i deenw lamɔ ka ɲɛ n’i ma dɔ kɛ dɔ ye. Kɔn k’a latigɛ i b’a fɛ k’u lamɔ ani k’u kolo cogo min na (Zaburuw 127:4; Talenw 29:17). Ka deenw kolo, o kɔrɔ tɛ k’u ɲangi dɔrɔn. Nka, o kɔrɔ ko i k’u dɛmɛ u k’a faamu fɛɛn min kama i be cikan dɔw dira u ma (Talenw 28:7, ABM). U dɛmɛ fana Jehova ka Kuma koo ka diya u ye ani u k’a faamu miiriya jɔnjɔn minw b’a kɔnɔ (Zaburuw 1:2). N’i y’o kɛ, o bena i deenw dɛmɛ u ka ɲuman ni juguman lɔn ka bɔ ɲɔgɔn na.—Eburuw 5:14.

I BE SE KA MIN KƐ:

• A to i deenw k’a lɔn ko Ala be yen tiɲɛn tiɲɛn na ani ko u be se k’u jigi la a kan

• Farati dɔw be ɛntɛrɛnɛti kan minw be mɔgɔ sɔɔn tiɲɛ. I deenw dɛmɛ u k’u faranfasi k’u lɔn ani u k’u yɛrɛ tanga u ma. Mɔgɔ dɔw be denmisɛnw dɛndɛ kakalaya kama. A yira i deenw na cogo min na u be se k’u yɛrɛ tanga olu ma