Ala b’a ɲini mɔgɔ sifaw bɛɛ fɛ u k’u magwɛrɛ ale la k’a deli (Zaburuw 65:3). Nka, a tɛ sɔn ka deliliw bɛɛ lamɛn. Ɲɛyirali fɛ, cɛɛ min t’a muso minɛ ka ɲɛ, Ala be ban k’o tigi ka deliliw lamɛn (1 Piyɛri 3:7). Tuma min na Israɛldenw banna ka kojugukɛ dabila, Ala fana banna k’u ka deliliw lamɛn. O b’a yira ko ka Ala deli, o tɛ tulonko ye. O bɛɛ n’a ta, hali ni mɔgɔ ye jurumuba kɛ ani a nimisara o la, Ala be sɔn k’a ka delili lamɛn.​—Ezayi 1:15; 55:7 kalan.

Videwo nin filɛ: Yala Ala be deliliw bɛɛ lamɛn wa?

Delili ye an ka batoli faan dɔ ye. O kama, an ka kan k’an Danbaga Jehova dɔrɔn lo deli (Matiyo 4:10; 6:9). Ka fara o kan, komi an dafanin tɛ, an ka kan ka Ala deli Yezu tɔgɔ la sabu ale lo sara an ka jurumuw kosɔn (Zan 14:6). Jehova t’a fɛ an ka delili dɔw degi ani ka to k’u fɔ an kunfɛ, wala k’u kalan kitabu dɔ kɔnɔ. A b’a fɛ an k’ale deli n’an dusukun bɛɛ ye.​—Matiyo 6:7; Filipikaw 4:6, 7 kalan.

An Danbaga be se k’an ka deliliw lamɛn hali n’an b’u fɔ an yɛrɛ kɔnɔ (1 Samuyɛli 1:12, 13). A b’a ɲini an fɛ an k’ale deli wagati bɛɛ, i n’a fɔ sɔgɔma, sufɛ, dumuni kɛtuma na ani ni gwɛlɛyaw b’an kan.​—Zaburuw 55:23; Matiyo 15:36 kalan.

A man nɔgɔ ka magwɛrɛ Ala la sabu an sigiɲɔgɔn caaman lanin tɛ Ala la. Ala ye layidu min ta ko a bena hɛɛrɛ kɛ dugukolo kan, u tɛ o ta sɔbɛ la (2 Timote 3:1, 4; 2 Piyɛri 3:3, 13). O lo kama an mako b’a la ka ɲɔgɔn lajɛn n’an balimaw ye walisa ka ɲɔgɔn jija.​—Eburuw 10:24, 25 kalan.

 Mɔgɔ minw be Ala kanu, n’an be jɛn n’olu ye, o b’an dɛmɛ an k’an magwɛrɛ Ala la. Jehova Seerew ka lajɛnw na, i bena sababu ɲumanw sɔrɔ k’i ka limaniya barika bonya.​—Ɔrɔmukaw 1:11, 12 (ABM) kalan.

I ye min kalan Bibulu kɔnɔ, n’i be miiri o kan, o be se k’i dɛmɛ i k’i magwɛrɛ Jehova la. A ye koo minw kɛ, a ye ladili minw di ani a ye layidu minw ta, i ka miiri o kan. Delili ni miirili b’an dɛmɛ an k’a faamu ko Ala ka kanuya n’a ka hakilitigiya nafa ka bon haali!​—Zozuwe 1:8; Zaburuw 1:1-3 kalan.

I be se k’i magwɛrɛ Ala la, nka fɔɔ i k’i jigi la a kan ani i ka limaniya a la. Nka, limaniya be komi yiri i ka kan ka min ladon. I ka to ka jatiminɛ kɛ i ka lannakow kan tuma bɛɛ walisa k’i janto i ka limaniya la.​—Matiyo 4:4; Eburuw 11:1, 6 kalan.

Mɔgɔ minw be Jehova kanu, a b’a janto olu la. Fɛɛn o fɛɛn be se k’u ka limaniya n’u ka ɲɛnamaya banbali jigiya bila farati la, a be se k’u tanga o ma (Zaburuw 91:1, 2, 7-10). A b’an lasɔmi ɲɛnamaya kɛcogo dɔw ma minw be se k’an ka kɛnɛya n’an ka hɛɛrɛ nagasi. Jehova b’a yira an na ɲɛnamaya kɛcogo min ka fisa.​—Zaburuw 73:27, 28; Zaki 4:4, 8 kalan.