KALANSEN 5
Ala sagonata ye mun lo ye dugukolo koo la?
1. Mun na Ala ye dugukolo dan?
Jehova ye dugukolo di adamadenw ma walisa a ka kɛ an sigiyɔrɔ ye. O la, Ala tun ma cɛɛ fɔlɔ Adama n’a muso Awa dan walisa u ka deenw wolo ka sankolo fa. Ala tun ye mɛlɛkɛw dan ka ban sankolo la (Zɔbu 38:4, 7). Nka, Ala tun ye Adama bila alijɛnɛ cɛɲumanba dɔ la min be weele ko Edɛn nankɔtu (Zɛnɛsi 2:15-17). Jehova tun ye jigiya min di ale n’a bɔnsɔn nataw ma, o tun ye ka ɲɛnamaya kɛ fɔɔ abada dugukolo kan.—Zaburuw 37:29; 115:16 kalan.
A daminɛ na, Edɛn nankɔtu dɔrɔn lo tun ye alijɛnɛ ye. Adama n’a muso tun ka kan ka deenw wolo ka dugukolo fa. Wagati dɔ tun bena se, u tun bena dugukolo kuru bɛɛ kolo ani k’a kɛ alijɛnɛ ye (Zɛnɛsi 1:28). Dugukolo tɛna halaki abada. A bena kɛ adamadenw sigiyɔrɔ ye kudayi.—Zaburuw 104:5 kalan.
Videwo nin filɛ: Mun na Ala ye dugukolo dan?
2. Mun na dugukolo tɛ alijɛnɛ ye bi?
Adama ni Awa ma mɛnni kɛ Ala fɛ. O kama Jehova y’u gwɛn ka bɔ alijɛnɛ nankɔtu la. Alijɛnɛ tununa ani adamaden si ma se k’a sigi a nɔɔ na. Bibulu b’a fɔ ko: “Dugukolo donna mɔgɔ jugu bolo.”—Zɔbu 9:24, ABM.—Zɛnɛsi 3:23, 24 kalan.
Jehova sagonata fɔlɔ tun ye min ye adamadenw koo la, yala a dɛsɛra k’o dafa wa? Ayi dɛ! Ala ye sebagayabɛɛtigi ye. A tɛ dɛsɛ foyi la (Ezayi 45:18). A tun b’a fɛ adamadenw ka kɛ min ye, a bena o kɛ k’a dafa.—Zaburuw 37:11, 34 kalan.
3. Ala bena segi ka alijɛnɛ kɛ cogo juman na?
Ala ye Yezu sigi masaya la. A ka masaya tuma na, alijɛnɛ bena segi ka kɛ dugukolo kan. Minw be ban ka Ala sago kɛ, Yezu bena Ala ka mɛlɛkɛw ɲɛminɛ ka na olu bɛɛ halaki Arimagedɔn kɛlɛ tuma na. O kɔ, a bena Sutana don kaso la saan 1 000 kɔnɔ. Ala sagokɛlaw bena kisi sabu Yezu bena u ɲɛminɛ ani k’u tanga. U bena ɲɛnamaya banbali kɛ alijɛnɛ kɔnɔ dugukolo kan.—Yirali 20:1-3; 21:3, 4 kalan.
4. Tɔɔrɔw bena ban tuma juman na?
Ala bena juguya ban dugukolo kan tuma juman na? Yezu ye “taamasiɲɛ” dɔ fɔ min tun bena a yira ko laban surunyana. Bi, duniɲa ka koow be adamadenw niin bila farati la ani u b’a yira ko an be “diɲɛ laban” wagati lo la.—Matiyo 24:3, 7-14, 21, 22 kalan.
Saan 1 000 kɔnɔ, Yezu bena to sankolo la ka dugukolo mara. O wagati lo la, a bena tɔɔrɔw bɛɛ ban (Ezayi 9:5, 6; 11:9). Ka fara a ka masaya baara kan, Yezu bena kɛ sarakalasebagaw Kuntigiba ye. Minw be Ala kanu, a bena olu ka jurumuw bɛɛ ban. O la, Ala bena tɛmɛ Yezu fɛ ka bana, kɔrɔya ani saya ban.—Ezayi 25:8; 33:24 kalan.
5. Jɔn lo bena alijɛnɛ nata sɔrɔ?
Masaya Boon na, i bena mɔgɔw sɔrɔ minw be Ala kanu ani u b’a ɲini k’u yɛrɛ koo diya a ye
Mɔgɔ minw be mɛnni kɛ Ala fɛ, olu lo bena ɲɛnamaya kɛ alijɛnɛ kɔnɔ (1 Zan 2:17). Yezu y’a ka kalandenw ci ko u ka taga mɔgɔ majigininw ɲini ani k’u kalan walisa u k’u yɛrɛ koo diya Ala ye. Bi, Jehova be mɔgɔ miliyɔn caaman labɛnna walisa u ka ɲɛnamaya kɛ alijɛnɛ nata kɔnɔ dugukolo kan (Sofoni 2:3). Jehova Seerew ka Masaya Boonw kɔnɔ, u be mɔgɔw kalan u ka kɛ furucɛw ni faa ɲumanw ye ani furumusow ni denba ɲumanw ye. Bangebagaw n’u deenw be Ala bato ɲɔgɔn fɛ ani kibaro diiman b’u dɛmɛ u k’u yɛrɛ degi ɲɛnamaya kɛcogo fisaman na.—Mise 4:1-4 kalan.
