Tile tan Yezu kɔseginin kɔ sankolo la, hakili senu jigira a ka kalandenw kan. O kɛra saan 33 Pantekɔte fɛti loon na ani mɔgɔw bɔra yɔrɔ caaman na ka na o fɛti la Zeruzalɛmu. Yezu ka kalanden 120 ɲɔgɔn tun lajɛnin be sangaso dɔ kɔnɔ. Koo kabakoman dɔ barila ka kɛ. U ye fɛɛn dɔ ye i n’a fɔ tasuma, min tun be kalanden kelen kelen bɛɛ kuun sanfɛ ani u bɛɛ y’a daminɛ ka kaan wɛrɛw fɔ. Mankanba dɔ bɔra ka boon fa. O mankan tun be i n’a fɔ fɔɲɔba dɔ mankan.

Mɔgɔ minw tun bɔra dugu wɛrɛw la ka na Zeruzalɛmu, olu y’o mankan mɛn minkɛ, u bolila ka na a filɛ fɛɛn min be kɛra o boon kɔnɔ. U kabakoyara k’a ye ko kalandenw be kaan caaman fɔra. U ko: “Mɔgɔ minw be kumana wo, u bɛɛ te Galilekaw ye wa? A do kɛra di n’an bɛɛ b’u ka kuma mɛnna an ka kaan na?”

O kɔ, Piyɛri ni ciden tɔɔw wulila ka lɔ jama ɲɛfɛ. Piyɛri  y’a ɲɛfɔ u ye k’u tun ye Yezu faga ani ko Jehova y’a suu kunu. Piyɛri ko: ‘Sisan, Yezu siginin be Ala kinibolo fɛ sankolo la ani a ye hakili senu di an ma i ko a tun y’a daa di cogo min na. O lo kama aw b’o kabakow yera ani aw b’u mɛnna.’

Piyɛri ka kumaw ye jama dusukun sɔrɔ kosɔbɛ. U y’a ɲininga ko: “Balimaw, an ka kan ka mun kɛ?” A y’u jaabi ko: ‘Aw ye nimisa aw ka jurumuw la ani ka batize Yezu tɔgɔ la. Aw bena hakili senu sɔrɔ fana.’ O loon na, mɔgɔ 3 000 ɲɔgɔn batizera. Kabi o tuma, dɔ tora ka fara joona joona kalandenw hakɛ kan Zeruzalɛmu. Hakili senu ka dɛmɛ barika la, cidenw ye kafow sigi walisa ka kalandenw kalan Yezu ka ciiw bɛɛ la.