Loon dɔ la, ka Awa to a kelen, saa dɔ kumana a fɛ. Saa ko: ‘Tiɲɛn lo ko Ala ko aw kana yiri si deen dumu wa?’ Awa ko: ‘An be se ka yiriw bɛɛ deenw dumu fɔɔ kelenpe dama. N’an y’o deen dumu, an bena sa.’ Saa ko: ‘Aw tɛna sa. Nka tiɲɛn na, n’aw y’o yiriden dumu, aw bena kɛ komi Ala.’ Yala o tun ye tiɲɛn ye wa? Ayi, ngalon tun lo. Nka Awa lara o la. Awa tora k’o yiriden filɛ fɔɔ a lɔgɔ gwanna a la. A y’o yiriden dumu ani ka dɔ di Adama ma. Adama tun b’a lɔn k’u bena sa n’u ma mɛnni kɛ Ala fɛ. O n’a ta bɛɛ, a y’o yiriden dumu.

Kɔfɛ, o loon yɛrɛ la, Jehova kumana Adama ni Awa fɛ. A y’u ɲininga ko mun na u ma mɛnni kɛ ale fɛ. Awa ye saa jalaki, ani Adama ye Awa jalaki. Komi Adama ni Awa ma mɛnni kɛ Jehova fɛ, a y’u gwɛn ka bɔ Edɛn nankɔtu kɔnɔ. Ala ye mɛlɛkɛw ni murujan tasumaman dɔ bila Edɛn nankɔ donda la walisa k’u bali ka don yen tugun.

Jehova y’a fɔ ko mɔgɔ min ye ngalon tigɛ Awa ye, a bena ale fana ɲangi. Min kumana Awa fɛ, saa yɛrɛ yɛrɛ tun tɛ. Jehova ye saaw dan cogo min na, u tɛ se ka kuma. Mɛlɛkɛ jugu dɔ lo y’a kɛ saa kumana. A y’o kɛ walisa ka Awa lafili. O mɛlɛkɛ be weele ko Sutana Naafigi. Jehova bena Sutana halaki. O la, a tɛna se ka mɔgɔw lafili ka don koo jugu la tugun.