Israɛlden dɔ, min tɔgɔ ko Ɛlikana, a tun be ni muso fila ye: Anɛ ani Penina. Nka, Anɛ lo koo tun ka di a ye kosɔbɛ. Komi deen caaman tun be Penina fɛ, a tun be Anɛ lɔgɔbɔ tuma bɛɛ sabu deen tun tɛ Anɛ fɛ. Saan o saan, Ɛlikana tun be taga Ala bato n’a somɔgɔw ye fanibugu la Silo. Loon dɔ, k’u to o yɔrɔ la, Ɛlikana y’a kɔrɔsi ko a muso kanulen Anɛ dusu kasinin lo kosɔbɛ. A ko: ‘Sabari Anɛ, kana kasi. Ne be yen. I koo ka di ne ye.’

Kɔfɛ, Anɛ bɔra ka taga delili kɛ a kelen. A tora ka kasi ani ka Jehova deli ko a k’ale dɛmɛ. A y’a daa di Jehova ma ko: ‘Jehova, n’i ye ne sɔn dencɛ la, a bena kɛ ele ta ye. A bena baara kɛ i ye a sii bɛɛ la.’

Sarakalasebagaw kuntigiba Eli ye Anɛ ye a be kasira. A y’a miiri ko Anɛ ye dɔrɔ lo min. Anɛ y’a jaabi ko: ‘Ayi Matigi, ne ma dɔrɔ min. Gwɛlɛyaba dɔ lo be ne kan, ani ne b’o fɔra Jehova ye.’ Eli y’a ye ko ale filila ani a y’a fɔ Anɛ ye ko: ‘I be fɛɛn min fɛ, Ala k’o d’i ma.’ Anɛ dusu sumana ani a y’a ka sira ta. Saan kelen yɛrɛ ma dafa, a ye dencɛ sɔrɔ ani a y’a tɔgɔ la ko Samuyɛli. Miiri k’a filɛ Anɛ ninsɔn diyara cogo min na!

 Anɛ ye layidu min ta Jehova ye, a ma ɲinɛ o kɔ. A ye Samuyɛli daa bɔ siin na dɔrɔn, a tagara n’a ye fanibugu kɔnɔ walisa a ka baara kɛ yen. A y’a fɔ Eli ye ko: ‘Ne tun be delili kɛra walisa ka deen min sɔrɔ, ale lo ye nin ye. Ne b’a kalifa Jehova ma a sii bɛɛ la.’ Ɛlikana ni Anɛ tun be to ka taga bɔ Samuyɛli ye saan o saan ani u tun be forokiya kura di a ma. Jehova ye deen wɛrɛw di Anɛ ma: dencɛ saba ani denmuso fila.