Israɛlden caaman segira tugun ka to ka joow bato. O kama Jehova y’a to Filisitikaw y’u ka duguw bɔsi u la. Nka Jehova koo tun ka di Israɛlden dɔw ye. Manowa tun ye u dɔ ye. Ale n’a muso tun ma deen sɔrɔ. Loon dɔ la, Jehova ye mɛlɛkɛ dɔ ci Manowa ka muso fɛ. Mɛlɛkɛ y’a fɔ a ye ko: ‘I bena dencɛ sɔrɔ. A bena Israɛldenw kisi Filisitikaw bolo. A bena kɛ Naziricɛ ye.’ I b’a lɔn Naziricɛw ye mɔgɔ sifa minw ye wa? Olu tun ye Jehova sagokɛla dɔw ye minw tun be dan na tɔɔw la. Naziricɛw tun man kan k’u kuun li.

Manowa muso nana dencɛ wolo ani Manowa y’a tɔgɔ la ko Samusɔn. Samusɔn kɔrɔbayara tuma min na, Jehova y’a kɛ fangabatigi ye. A tun be se ka jara faga n’a bolow dɔrɔn ye. Loon dɔ, Samusɔn ye Filisitika 30 faga a kelen. A koo tun ka gwo Filisitikaw ye ani u tun b’a ɲɛɲinina k’a faga. Loon dɔ sufɛ, ka Samusɔn to sinɔgɔ la Gaza dugu kɔnɔ, u tagara kɔnɔni kɛ dugu donda la ka se k’a faga sɔgɔma. Nka dugutilama, Samusɔn wulila ka taga dugu donda koonw walo. A y’u ta k’u la a gamanw kan ka yɛlɛ n’u ye fɔɔ kulu sanfɛ, Eburɔn gɛrɛfɛ!

Kɔfɛ, Filisitikaw tagara Samusɔn ka sunguru Dalila fɛ k’a fɔ a ye ko: ‘An bena warigwɛ waa caaman d’i ma n’i sera k’a lɔn fɛɛn min kama fangaba be Samusɔn fɛ. An b’a fɛ k’a minɛ k’a don kaso kɔnɔ.’ Dalila tun be wari fɛ. O kama, a sɔnna. A daminɛ na, Samusɔn tun banna k’a fɔ a ye fɛɛn min kama fangaba b’a fɛ. Nka Dalila y’a ɲɛɛ gwan fɔɔ Samusɔn dɛsɛra k’a ka gundo fɔ a ye. A ko: ‘Ne kuun ma li ka ye sabu ne ye Naziricɛ ye. Ni ne kuun lira, ne fanga be ban.’ Samusɔn ye min kɛ ten, o ye filiba ye. Tiɲɛn tɛ?

Dalila sinna k’a fɔ Filisitikaw ye ko: ‘Ne y’a ka gundo lɔn!’  Dalila y’a kɛ Samusɔn sinɔgɔra a seenw kan ani a y’a to dɔ y’a kuun li. O kɔ, Dalila pɛrɛnna ko: ‘Samusɔn, Filisitikaw nana i kama!’ Samusɔn kununa, a y’a ye ko a fanga banna. Filisitikaw y’a minɛ, k’a ɲɛɛw ci ani u y’a don kaso la.

Loon dɔ la, Filisitika waa caaman lajɛnna u ka ala Dagɔn batoso kɔnɔ. U pɛrɛnna ko: ‘An ka ala ye Samusɔn don an bolo! A’ ye na ni Samusɔn ye an k’a lɔgɔbɔ.’ U y’a to a lɔra soo kɔnɔ samasen fila cɛma ani u y’a lɔgɔbɔ. Samusɔn kulera ko: ‘Oh Jehova, sabari ka fanga di ne ma tugun.’ O tuma na, Samusɔn kunsigi tun falenna tugun fɔɔ ka janya. A ye u ka batoso ka samasenw ɲɔndi n’a fanga bɛɛ ye. Mɔgɔ minw bɛɛ tun b’a kɔnɔ, boon nin benna k’u bɛɛ faga ani Samusɔn fana sara.