Dawuda ye Goliyati faga. O kɔ, masacɛ Sayuli y’a kɛ a ka kɛlɛbolo kuntigi ye. Dawuda ye see sɔrɔ kɛlɛ caaman na ani a tɔgɔ bɔra kosɔbɛ. A tun mana bɔ kɛlɛkɛyɔrɔ ka na, musow tun be bɔ ka dɔnkili la, ka dɔɔn kɛ ani k’a fɔ ko: ‘Sayuli ye mɔgɔ waa damanin faga, Dawuda ye mɔgɔ waa caaman faga!’ Dawuda ɲangoya ye Sayuli minɛ ani a b’a fɛ k’a faga.

Dawuda tun be se ngɔni la kosɔbɛ. Loon dɔ la, k’a to ngɔni fɔ la Sayuli ye, masacɛ Sayuli y’a ka taman ta k’a bon. Dawuda sinna ka jɛngɛ, taman tagara kogo sɔgɔ. O kɔ, Sayuli y’a ɲini siɲɛ caaman ka Dawuda faga. A laban, Dawuda bolila ka taga dogo kongokolon kɔnɔ.

Sayuli tagara Dawuda kɔ ni kɛlɛden waa saba ye. Dawuda n’a ka mɔgɔw tun dogora kuluwo min kɔnɔ, Sayuli donna o yɔrɔ la.  Dawuda ka mɔgɔw kumana u daa jukɔrɔ ko: ‘Nin ye sababu ye i fɛ ka Sayuli faga.’ Dawuda dɛndɛna ka taga Sayuli ka fani dagolo tigɛ. Sayuli ma bɔ o kala ma. Kɔfɛ, Dawuda dusu tiɲɛna kosɔbɛ sabu a ma bonya la Jehova ka masacɛ mɔlen kan. A ma sɔn a ka mɔgɔw ka Sayuli kɛlɛ. A yɛrɛ kulera k’a fɔ Sayuli ye ko ale tun be se k’a faga tuma min na a tun ye sababu sɔrɔ. Yala Sayuli y’a ka miiriyaw yɛlɛma Dawuda koo la wa?

Ayi. Sayuli tora ka Dawuda nɔgwɛn. Loon dɔ sufɛ, Dawuda n’a belenden Abisayi dogora ka don Sayuli n’a ka mɔgɔw ka sigiyɔrɔ la. Hali Sayuli ka garadi Abinɛri yɛrɛ tun be sinɔgɔra. Abisayi ko: ‘Nin ye sababu ɲuman ye an fɛ! A to ne k’a faga.’ Dawuda y’a jaabi ko: ‘Jehova lo bena Sayuli ka koo ɲɛnabɔ. An k’a ka taman n’a ka jiforoko dɔrɔn ta ka taga.’

Dawuda yɛlɛla kulu dɔ kan. K’a to o kulu kan, a tun be se ka Sayuli n’a ka sɔrɔdasiw ye. A kulera ko: ‘Abinɛri, mun na i ma i ka masacɛ latanga? Sayuli ka jiforoko n’a ka taman be min?’ Sayuli y’a lɔn ko Dawuda kaan lo ani a ko: ‘I tun be se ka ne faga, nka i m’o kɛ. Ne b’a lɔn ko ele lo bena kɛ Israɛl masacɛ ye ne nɔɔ na.’ Sayuli kɔsegira ka taga a ka masaso la. Nka, Sayuli ka somɔgɔw bɛɛ lo tun tɛ Dawuda kɔniya.