Siri masacɛ Bɛnadadi tora ka Israɛl kɛlɛ. Nka tuma o tuma kira Elize tun be Israɛl masacɛ lasɔmi. O tun be kɛ sababu ye Bɛnadadi ka koo be tiɲɛ. O kama, Bɛnadadi y’a latigɛ ka Elize minɛ. A y’a mɛn ko Elize be Dotan dugu la. O kama, a ye Siri kɛlɛbolo ci ka taga a minɛ.

Sirikaw tagara Dotan dugu la sufɛ. O dugusagwɛ, Elize ka baaraden bɔra k’a ye ko sɔrɔdasi caaman ye dugu lamini. A jaa tigɛra ani a kulera ko: ‘An bena kɛ di Elize?’ Elize y’a fɔ a ye ko: ‘Minw be ni anw ye, u ka ca ka tɛmɛ minw be n’olu ye.’ O wagati yɛrɛ la, Jehova y’a kɛ Elize ka baaraden ye kuluw fanin ye soow ni kɛlɛkɛ wotoro tasumamanw na, u ye dugu yɔrɔ bɛɛ lamini.

Siri sɔrɔdasiw tun be ɲini ka Elize minɛ tuma min na, Elize ye Jehova deli ko: ‘Jehova, sabari k’u ɲɛɛw fiɲɛ.’ Yɔrɔnin kelen, sɔrɔdasiw m’a lɔn u be yɔrɔ min na hali k’a sɔrɔ u be yeli kɛra. Elize y’a fɔ u ye ko: ‘Aw filila dugu ma. Aw be cɛɛ min kɔ, a’ ye  tugu ne kɔ, n’ bena taga n’aw ye a fɛ.’ U tugura Elize kɔ fɔɔ Samari, Israɛl masacɛ tun siginin be dugu min na.

Sirikaw ma bɔ a kala ma joona u tun be yɔrɔ min na. Israɛl masacɛ ye Elize ɲininga ko: ‘Ne k’u faga wa?’ Yala Elize y’a jati k’o mɔgɔ minw tun b’a fɛ ka kojugu kɛ ale la, sababu dira a ma k’a yɛrɛ mɔnɛbɔ u la wa? Ayi. Elize ko: ‘Kana u faga. Dumuni di u ma u k’a dumu, o kɔ, i k’u bila ka taga.’ Masacɛ ye dumuniba labɛn u ye. O kɔ, a y’u bila ka taga u ka dugu la.