Miiri k’a filɛ: Timote n’a teriw be tulon kɛra. A ye balɔn fili a tagara ben u sigiɲɔgɔn dɔ ka mobili vitiri kan k’a ci.

N’i tun be Timote nɔɔ na, i tun bena mun lo kɛ do?

I BE SE KA KOO SABA KƐ:

1. Ka boli.

2. Ka mɔgɔ wɛrɛ jalaki.

3. Min kɛra, i b’o ɲɛfɔ i sigiɲɔgɔn ye ani i b’a ɲini k’i ka tiɲɛni lalaga.

N’a sɔrɔ i bena a ɲini ka fɛɛrɛ fɔlɔ lo kɛ. Nka, i ye vitiri lo ci wo wala i ye fɛɛn wɛrɛ lo tiɲɛ wo, min ka fisa, o ye ka sɔn i ka filiw ma.

1. O lo bɛnnin lo.

   Bibulu ko: “Anw kɔni lanin b’a la ko an kɔnɔ gwɛnin lo, ko an b’a fɛ an tagamacogo ka ɲa tuma bɛɛ.”—Eburuw 13:18.

2. Minw be sɔn u ka filiw ma, mɔgɔw ka teli ka yafa olu lo ma.

   Bibulu ko: “Mɔgɔ min bɛ a ka hakɛw dogo, o ka kɛtaw tɛ ɲɛ, nka min bɛ i jɔ u la ka u dabila, makari na kɛ o la.”—Talenw 28:13, ABM.

3. Min yɛrɛ kɔrɔtanin lo, o ye k’o lo ka di Ala ye.

   Bibulu ko: “Galontigɛla koo ka go Masaba ye. Nka tiɲɛfɔla koo ka d’a ye.”—Talenw 12:22.

Karina be ni saan 20 ye. Loon dɔ a ye mobili boli vitɛsi la kojugu ani a ye alamani sara o kosɔn. A y’o koo dogo a facɛ la. Nka, a ma se k’o dogo fɔɔ abada. Karina ko: “Saan kelen ɲɔgɔn o kɔ, n’ facɛ y’o alamani sɛbɛ ye. O ye ne hakili bɛɛ ɲagami!”

O be mun lo yira an na? Karina ko: “N’i ye i ka tiɲɛnikow dogo, o be koo tɔɔ juguya le. A nɔfɛkow tɛ taga k’i dan!”

Bibulu ko: “An bɛɛ be fili cogo caaman na.” (Zaki 3:2). Nka, n’i be sɔn i ka filiw ma yɔrɔnin kelen, o b’a yira ko i majiginin lo ani ko i ye mɔgɔ sɔbɛ ye.

Ka fara o kan, a to i ka filiw k’i kolo. Vera ye sungurunin ye ani a ko: “Ne fɛ, filiw be mɔgɔ kolo. N’ b’a ɲini ka hakili sɔrɔ n’ ka filiw kelen kelen bɛɛ la walisa ka n’ sɔɔn fisaya ani ka koow kɛ cogo wɛrɛ la siɲɛ wɛrɛ.” An k’a filɛ i be se k’o kɛ cogo min na.

I ye i facɛ ka nɛgɛso deli ani a tiɲɛna i bolo. I bena mun lo kɛ do?

• I tɛ foyi fɔ i facɛ ye ani i jigi b’a la ko a tɛna bɔ o kala ma.

• I be tiɲɛn fɔ i facɛ ye.

• I b’a fɔ i facɛ ye min kɛra, nka i be mɔgɔ wɛrɛ jalaki.

I ka ɛkizamɛn ma ɲɛ i bolo sabu i ma kalan kɛ. I bena mun lo kɛ do?

• I b’a fɔ ko ɛkizamɛn tun ka gwɛlɛ kojugu.

• I be sɔn a ma ko a bɔra ele lo la sabu i ma kalan kɛ.

• I b’a fɔ ko i koo man di kalanfa ye, o lo kosɔn i ma i ka ɛkizamɛn sɔrɔ.

 Segi ɲɛyirali tɛmɛninw kan ani a ɲini k’i yɛrɛ bila 1) i facɛ ani 2) i ka kalanfa nɔɔ na. I facɛ n’i ka kalanfa tun bena mun lo miiri n’i sɔnna i ka filiw ma? N’i y’i ka filiw dogo, u bena mun lo miiri i koo la?

Sisan, miiri i ka fili dɔ la i ye min kɛ salon ani ɲiningali nunu jaabi:

O tun ye fili juman lo ye? I ye mun lo kɛ o kɔ?

• N’ y’a dogo.

• N’ ye mɔgɔ wɛrɛ jalaki.

• N’ sɔnna yɔrɔnin kelen ko ne lo y’a kɛ.

N’i tun ma sɔn o fili ma, o ye mun lo kɛ i la kɔfɛ?

• N’ dusu tun ka di: koo bɔra n’ kun na!

• N’ ye n’ yɛrɛ jalaki: n’ tun ka ɲi ka tiɲɛn fɔ.

I tun be se ka koow kɛ cogo fisaman na cogo di?

I ye kalan juman lo sɔrɔ o koo la?

Mun na mɔgɔ dɔw tɛ sɔn u ka filiw ma?

Mɔgɔw bena mun lo miiri i koo la, n’i be to k’i ka filiw dogo? Nka, n’i be sɔn i ka filiw ma, u bena mun lo miiri i koo la?—Luka 16:10.